آرڊر آرڊر آرڊر هي جھنگل جي عدالت آهي ڪا عام عدالت ناهي جنهن ۾ اوهان گوڙ ڪري رهيا آهيون سڀ خاموش ٿي وڃو. جج جي ڪرسيءَ تي ويٺل بگھڙ جج ٽيبل تي ڪاٺ جو مترڪو زور سان لڳائي حڪم جاري ڪيو عدالت ۾ خاموشي ٿي ويئي. بگھڙ جج ٻيهر ڳالهائڻ شروع ڪيو. جوابدار تي ڪيس چارج ڪيو وڃي. سرڪار جي گنجي گدڙ، وڪيل چشمو نڪ تي رکيو ۽ پوليس جو پيش ڪيل چالان ۽ ايف آءِ آر جو متن پڙهڻ شروع ڪيو. مي لارڊ، هن ڪٽهڙي ۾ بيٺل جوابدار جنهن جو نالو شينهن آهي، تنهن جھنگل جي قانوني جي خلاف بغاوت ڪئي آهي، هن کي هن ڳالهه تي فخر آهي ته هي باغي آهي، هي جھنگل جي قانون کي قبول ڪرڻ کان انڪاري آهي. هن جھنگل جي ٽوپيءَ واري بادشاهه جي خلاف تقريرون ڪيون آهن. هن اخبارن ۾ ليک ڏنا آهن ۽ ڪمزور پکين جھرڪن، ڳيرن، ڪبوترن، مورن، ڊيلن ۽ طوطن کي بغاوت لاءِ ڀڙڪايو آهي. مي لارڊ، هن رڻ ٻاري ڏنو آهي هيءَ اوهانجي بگھڙن جي عدالت جو پڻ منڪر آهي، جنهن ڪري هن کي جھنگل جي شريف پوليس وڏي مقابلي کانپوءِ گرفتار ڪري پڃري ۾ بند ڪري پيش ڪيو آهي. مي لارڊ، هن تي هيٺيان الزام آهن هيءَ جمهوريت جو حمايتي ۽ آمريت جو انڪاري آهي. هي پاڻ کي هن جنت النظير ملڪ ۾ غلام سمجھي ٿو. هي سڀني کي برابر جا حق ڏيڻ جو حمايتي آهي. هي هن ملڪ کي مختلف وطنن جي فيڊريشن ڏسڻ جو ڏوهي آهي. مي لارڊ، هي هر قوم جي ٻولي جيارڻ چاهي ٿو ۽ برابري جا خواب ڏسي ٿو. هي ڏوهي دل جو ڪنجوس آهي هي سخاوت جي خلاف آهي هن جي دعوى آهي ته هن جي پيرن جي هيٺيان موجوده زمين ۾ ڪوئلو، تيل، گئس، سمنڊ، درياءَ ۽ مڙني معدني وسيلن تي پهرين سندس ديس وارن جو حق آهي. مي لارڊ، هي مذهب کي رياست کان الڳ ڪرڻ جو حامي آهي، هي هن جھنگل جي قانون جو باغي آهي کيس اوهانجي عدالت ۾ ان لاءِ حاضر ڪيو ويو آهي، جيئن کيس اوهان ڦاهي تي لٽڪايو جيئن هنن جهڙن ٻين باغين کي سبق ملي. مي لارڊ، هي پاڻ کي قومپرست سڏائي ٿو ۽ مذهبي، اقليتن جي هن لاءِ مظاهرا ڪرائي ٿو، عدالت ۾ جهرڪين، مورن، ڊيلن، ڳيرن، ڪبوترن ۽ طوطن نعرا هڻڻ شروع ڪيا مان باغي آهيان! مان باغي آهيان! آرڊر آرڊر آرڊر بگھڙ جج ٻيهر خاموش رهڻ جو حڪم ڪيو، سرڪاري گدڙ وڪيل الزام پڙهندي پاڻي گلاس پيئڻ جي لاءِ ساهي پٽي ته جوابدار شينهن جي وڪيل باز ڳالهائڻ شروع ڪيو، مي لارڊ، منهنجي موءُڪل تي لڳايل سمورا الزام بي بنياد ۽ غلط آهن. دراصل جھنگل جي پوليس ٻوڙي پوليس آهي، جيڪي کيس لکي ڏنو وڃي ٿو سو هو پڙهي چالان ٺاهي اوهان جي عدالتن ۾ پيش ڪري ٿو. منهنجي هن عدالت کي استدعا آهي ته منهنجي موءُڪل کي هڪ ته جوابدار چوڻ کان پرهيز ڪئي وڃي پيو ته منهنجي موءُڪل جو وسيع دل سان موقف ٻڌو وڃي. سرڪار جي گدڙ، وڪيل ڊگھي اوناڙ ڪري چيو. مي لارڊ، قطعي نه، اهڙي ملڪ جي دشمن جو موقف ٻڌڻ معنى بغاوت کي هٿي ڏيڻ، سومان اوهانکي استدعا ڪريا نٿو ته پوليس چالان قبول ڪندي مٿين الزامن تحت جنهن جي سزا جھنگل جي قانون مطابق ڦاهي آهي. جوابدار شينهن کي ڦاهي ڏني وڃي. جھرڪيون مور، ڊيلون، ڳيرا، ڪبوتر ۽ طوطا وري گڏجي اياز جو نظم پڙهن ٿا، تون ڪنهن کي ڪنهن کي خاموش ڪندي اعلان هزارين مان نه رڳو بگھڙ جج ڪاوڙ ۾ ڳاڙهو ٿي وڃي ٿو، زور زور سان ٽيبل تي ڪاٺ جو مترڪو هڻي آرڊر آرڊر آرڊر جا آواز نڙي مان ڪڍي ٿو. جھنگل جي عدالت ۾ خاموش ٿي وڃي ٿي. جوابدار شينهن جو وڪيل باز ٻيهر اٿي بيهي ٿو. مي لارڊ، اسين ايڪويهين صديءَ ۾ جي رهيا آهيون، هيءَ صدي سهپ ۽ رواداري جي صدي آهي، هيءَ صدي برابري ۽ جھموريت جي صدي آهي، اوهان دنيا کان اڳتي نڪرڻ بدران صديون پوئتي وڃي رهيا آهيو. جھنگل جي هن عدالتن ۾ جيڪڏهن اوهان منهنجي موءُڪل کي نه ٻڌندا ته سڀاڻي جي تاريخ اوهانکي ڏوهي قرار ڏيندي لحاطه منهنجي استدعا قبول ڪئي وڃي، منهنجي موءُڪل جي موقف کي پڻ ٻڌو وڃي. سرڪاري گدڙ وڪيل ڦڙ تي سان اٿي اچي بگھڙ جج جي سامهون بيٺو. مي لارڊ، جوابدار کان ها ۽ نه ۾ جواب پڇيو وڃي پاڻيءَ جو پاڻي کير جو کير ٿي ويندو بگھڙ جج، سرڪاري گدڙ وڪيل کي مخاطب ٿيو. سرڪار جا گدڙ وڪيل اوهان جوابدار کان سوال ڪريو، سرڪاري گدڙ وڪيل، جوابدار شينهن، توکي ها يا نه ۾ جواب ڏيڻا آهن ڇا تون جمهوريت جو حمايتي ۽ آمريت جو انڪاري آهين پنڃري ۾ بند شينهن خاموشي سان سرڪاري گدڙ وڪيل ڏانهن نهاريو. مي لارڊ، سرڪاري گدڙ وڪيل اوناڙ ڏني، جهنگل جي عدالت جا جج بگھڙ صاحب ڏسو جوابدار مونکي آئين سان ڌمڪائي رهيو آهي. جوابدار شينهن جي وڪيل باز ڳالهائڻ شروع ڪيو. انصاف جي تقاضا آهي ته اوهان منهنجي موءُڪل جو موقف ٻڌو سرڪاري گدڙ، وڪيل ٻيهر اعتراض واريو. بگھڙ جج ٻنهي وڪيلن کي خاموشي رهڻ جو حڪم ڏيندي جوابدار کان لڳايل الزامن جي قبوليت جي بابت پڇيو ڇا توهان قبول ڪريو ٿا ته اوهانتي لڳايل الزام درست آهن، بگھڙ جج جوابدار شينهن کان سوال ڪيو. جوابدار شينهن جيڪو ڪافي وقت کان جھنگل جي عدالت جي پڃري ۾ خاموش بيٺل هو تنهن گجگوڙ ڪري ڳالهائڻ شروع ڪيو، جھنگل جي عدالت جا بگھڙ جج مان 45 هزار سال عظيم تهذيب رکندڙ قوم جو فرد آهيان مان سڀتيا جو تخليقڪار آهيان، منهنجي ماضيءَ جي تاريخ ۾ مون ڪنهن به ٻئي ملڪ تي حملو نه آهي ڪيو، مان عالمي امن ۽ بائيچاري جو پرچارڪ آهيان، منهنجي وڏن هن اوهان جي جھنگل جھڙي ملڪ ۾ جبر نه پر خوشيءَ سان هڪ واعدو تحت شموليت ڪئي هئي ته ملڪ ۾ موجوده سڀني قومن جا رشتا برابري جي بنياد تي هوندا، هي جڏهن چاهيندا پنهنجا آزاد وطن جوڙي سگھندا. جھنگل جي عدالت جا بگھڙ جج تاريخ شاهد آهي ته منهنجي قوم هميشه مذهبي انتها پسندي جي خلاف رهي آهي، منهنجي ڌرتي خوشحال ڌرتي رهي آهي، جنهن جي انچ انچ ۾ خدا منهنجي ۽ منهنجي نسل جي خوشحالي لاءِ خزانه دفن ڪيا آهن، اوهان جي جھنگل جي حڪومت اسان کي بکيو مارڻ جو فيصلو ڪيو آهي، ٿر ۾ سوين ٻار بک وگھي اڄ مري رهيا آهن، منهنجي ڌرتيءَ جا نوجوانن بيروزگاري جي ڪري خود ڪشيون ڪري رهيا آهن منهنجي وطن جي شهرن ۽ بحرن تي ڌارين جو قبضو آهي منهنجي قوم جي ٻولي کي اسڪولن عدالتن ۽ آفيسن توڙي مارڪيٽن مان نيڪالي ڏني وئي آهي. بگھڙ ۽ گدڙ گڏجي منهنجي وطن جي جهرڪين، مورن، ڊيلن، ڪبوترن ۽ طوطن جھڙن معصوم دل رکندڙ عوام کي حقن کان محروم رکيو ويو آهي. مون جيان جنهن به پنهنجي وطن لاءِ آواز اٿاريو آهي ته ان کي يا ته تخت دار تي لٽڪايو ويو يا راولپنڊيءَ جي رڻ ۾ گوليءَ جو نشانو بنايو ويو يا بنديخانن ۾ بند ڪيو ويو. جھنگل جي عدالت جا بگھڙ جج!! هيءَ منهنجي ڌرتي آهي، جيڪا خدا مونکي عطا ڪئي آهي. هن جي هر نعمت جو پهريون حقدار مان ۽ منهنجا ايندڙ نسل آهن، ها مان هن جبر جي نظام کان بغاوت جو اظهار ٿو ڪريان ها مان توهان جي بگھڙ عدالتن جو انڪاري آهيان ها مان مڃان ٿو مان رياست ۽ مذهب کي الڳ سمجھانٿو مان دهشت ۽ وحشت جي راڄ جي خلاف آهيان ها مان هن وطن تي مڪمل پنهنجي مالڪي چاهيان ٿو. مان جھرڪين، مورن، ڊيلن، ڳيرن، ڪبوترن ۽ طوطن جي خوشحالي زندگي ڏسڻ چاهيان ٿو. مان شينهن آهيان ان ڪري مان سوءُ سالن جي غلامي جي زندگي کان انڪار ڪندي هڪ ڏينهن جي عزت جي ۽ آزادي جي زندگي چاهيا نٿو. انقلاب زنده آباد، انقلاب زنده آباد. جھرڪيون، مور، ڊيلون، ڳيرا، ڪبوتر ۽ طوطا نعرا هڻن ٿا. جھنگل جي عدالت جو بگھڙ جج ٻيهر زور زور سان ڪاٺ جو مترڪو ٽيبل تي هڻندي آرڊر آرڊر آرڊر چوي ٿو. عدالت ۾ چند گھڙين لاءِ خاموشي ٿي وڃي ٿي. سرڪاري گدڙ وڪيل ڪرسي تان اٿي اوناڙي ڏيئي ٿو مي لارڊ مون اڳئي اوهانکي عرض ڪيو هو ته هي باغي آهي. هن کي موت جي سزا ڏيو. سرڪاري عدالت جو بگھڙ جج فيصلو ٻڌائڻ شروع ڪري ٿو جيئن ته جوابدار شينهن پاڻ اعتراف ڪيو آهي ته هو مذهب ۽ رياست کي الڳ سمجھي ٿو انهن جو مقصد ته هو هن مذهبي رياست جي خلاف آهي جيڪو دهشت گردي جو ڏوهه آهي ان جوابدار شينهن پنجويهه هزار سالن جي تاريخ جو ذڪر ڪيو آهي، جڏهن ته هن جنگھل ملڪ جي عمر اٺهٺ سال آهي، انهيءَ جو مقصد ته هي جنگھل ملڪ جي پڻ انڪاري آهي، جنهن جي سزا ڦاسي آهي. جھنگل جي هي عدالت حڪم ڏيئي ٿي ته جوابدار شينهن کي هن رياست جي باغي هجڻ جي ڏوهه ۾ ست دفعا ڦاهي تي لٽڪايو وڃي. سرڪاري عدالت جو بگھڙ جج سزا لکي قلم جي نڀ کي زور ڏيئي ڀڃي وجھي ٿو ۽ پنهنجي چيمبر ڏانهن هليو وڃي ٿو پويان، جھرڪيون، مور، ڊيلون، ڪبوتر، ڳيرا ۽ طوطا گڏجي عدالتي ڪمري ۾ گيت جھونگارين ٿا. پنهنجي رت ۾ ريٽو جھنڊو اڀ تائين جھوليندو اهڙو ڏينهن به ايندو ساٿي اهڙو ڏينهن به ايندو. رت جو بدلو رت ئي آهي هر ڪو بدلو نندو اهڙو ڏينهن به ايندو ساٿي اهڙو ڏينهن به ايندو. جوابدار شينهن پڃري ۾ گجگوڙ ڪري انقلاب زنداباد جا نعرا هڻي ٿو ۽ سرڪاري وڪيل گدڙ نڪ تي چشمو رکي جھنگل عدالت ۾ موجوده بگھڙ جج جي ڪاٺ جي مترڪي ۾ اکيون وجھي ٽهڪ ڏيئي ٿو.
