ميزبان آسٽريليا جي ٽيم هن وقت تائين ٽورنامينٽ ۾ ناقابل شڪست رهندڙ ڀارتي ٽيم کي سيمي فائنل ۾ 95 رنسن تان شڪست ڏئي آسانيءَ سان فائنل ۾ پهچي وئي جتي سندس مقابلو نيوزيلينڊ سان ٿيندو.
سڊني ۾ ٿيندڙ ميچ ۾ آسٽريلوي ڪپتان مائيڪل ڪلارڪ ٽاس کٽي پهريان بيٽنگ ڪئي. ڊيوڊ وارنر جي آئوٽ ٿيڻ کانپوء ٽورنامينٽ ۾ آئوٽ آف فارم رهندڙ ايرون فنچ سان گڏ ايشيائي ٽيمن ۽ خاص ڪري اسپنرن خلاف بهترين کيڏاري اسٽيو سمٿ شاندار بيٽنگ ڪئي. ٻنهي جي وچ ۾ 217 رنسن جي پارٽنر شپ ٿي. سمٿ صرف 93 بالن تي 105 رنسون ٺاهيون. فنچ 81 رنسون ٺاهي آئوٽ ٿيو. آسٽريليا جون 4 وڪيٽون هڪ ئي وقت ڪريون ته اسڪورنگ ريٽ به گهٽيو ۽ 50 اوورن ۾ آسٽريلوي ٽيم 328 رنسون جوڙيون جيڪو ورلڊ ڪپ سيمي فائنلز جو هن وقت تائين سڀ کان گهڻو اسڪور آهي. اميش يادو 4 وڪيٽون ورتيون.
جواب ۾ ڀارتي ٽيم جي شروعات شاندار رهي. صرف 12 اوورن ۾ اسڪور 76 رنسن تي پهتو ته شيڪر ڌاون تيز کيڏڻ جي چڪر ۾ آئوٽ ٿي ويو. جلد ئي ڪوهلي به آئوٽ ٿي ويو. بس پوء ته وڪيٽون ڪرنديون رهيون. سواء ڌوني جي جنهن 65 رنسون ٺاهيون، ڪوبه بيٽسمين اسڪور ۾ وڏو اضافو ڪري ڪونه سگهيو. پوري ٽيم 47 اوورن ۾ 233 رنسون ٺاهي آئوٽ ٿي وئي. مچل اسٽارڪ شاندار بالنگ ڪندي 9 اوورن ۾ صرف 28 رنسون ڏئي 2 وڪيٽون ورتيون. فلڪنر 59 رنسون ڏئي 3 وڪيٽون ورتيون.
اسٽيو سمٿ کي شاندار سينچري ڪرڻ تي مين آف دي ميچ جو اوارڊ مليو.
مڪمل اسڪور لاءِ هن لنڪ تي ڪلڪ ڪيو.
