جيڪي ڪمپيوٽر استعمال ڪندڙ پنهنجي برائوزر ۾ اشتهار بلاڪ ڪرڻ لاءِ ڪو ايڪسٽينشن استعمال نه ٿا ڪن اهي اڪثر برائوزنگ جي دوران انتهائي اذيت محسوس ڪندا آهن.. ڇو ته هر ويب سائيٽ تي چمڪا ڏيندڙ اشتهار ويب پيج جي سائيز وڌائي ڇڏيندا آهن.. جنهن ڪري پيج لوڊ ٿيڻ ۾ دير ڪندو آهي... ان کان علاوه اڪثر بيهوده اشتهار سامهون اچڻ تي خفگي پڻ محسوس ٿيندي آهي... ان کان علاوه جيڪڏهن توهان ڪنهن ويب سائيٽ تان ڪجهه ڊائونلوڊ ڪرڻ ويندو ته اهڙا اشتهار اصل جان ئي نه ڇڏين.. ڊائونلوڊ بٽڻ جي آس پاس ۾ ايترا اشتهار موجود هوندا آهن جو خبر ئي نه پوندي آهي ته اصل ڊائونلوڊ جو آپشن ڪهڙو آهي.. ۽ اڪثر نه ڄاڻو دوست غلطي سان پنهنجي ضرورت جي فائيل بجاءِ ڪو مال ويئر يا ٽروجن ڊائونلوڊ ڪري وٺندا آهن.. ياد رکو ڪو به سافٽويئر ڪنهن غير معروف ويب سائيٽ تان ڊائونلوڊ ڪريو ته هميشه پهريان ان کي پنهنجي اينٽي وائرس سان اسڪين ڪري وٺو .. ان کان علاوه پنهنجي برائوزر ۾ اشتهارن کي بلاڪ ڪرڻ لاءِ “ايڊ بلاڪ پلس” ضرور انسٽال ڪري رکو ته جيئن ڌوڪا ڏيندڙ اشتهارن کان بچي سگهجي... اشتهار رڳو ويب برائوزر تائين محدود ناهن هوندا .. هاڻي ته اهي ميڊيا پليئر کان وٺي هر پروگرام ۾ پڻ ڏيکاريا پيا وڃن.. جن کان بچڻ لاءِ توهان وٽ اهڙو پروگرام هجڻ ضروري آهي جيڪو سمورن پروگرامزبشمول ويب برائوزرس ۾ ايندڙ اشتهارن کي بلاڪ ڪرڻ جي سگهه رکندو هجي.. ان سلسلي ۾ مهنجي نظر ۾ هڪ بهترين پروگرام Ad Muncher آهي... ايڊ منچر ڪارڪردگيءَ جي لحاظ کان لاجواب پروگرام آهي.. پهريان ان جي قيمت 30 آمريڪي ڊالر هئي.. پر هاڻي ان جي ڊيولپر هن کي مفت ڪري ڇڏيو آهي. هي پروگرام سائيز ۾ هلڪو ۽ استعمال ۾ انتهائي آسان آهي... هن کي انسٽال ڪرڻ کان پوءِ توهان کي وڌيڪ ڪنفگريشن ناهي ڪرڻي پوندي.. بلڪه هي پاڻ مرادو ئي ڪم شروع ڪري ڏيندو آهي.. توهان کي اهو ٻڌي اڃان وڌيڪ حيرت ٿيندي ته ايڊ منچر گذريل 15 سالن کان استعمال ڪيو پيو وڃي ۽ ٻين ايڊ بلاڪر وانگر هي ڪو برائوزر ايڪسٽينشن يا ايڊان نه آهي ان ڪري هر برائوزر لاءِ هي اڪيلو ئي ڪافي آهي.. هن پروگرام کي انسٽال ڪرڻ کان پوءِ برائوزر کولي ڪا ويب سائيٽ کوليو.. توهان ڏسندو ته ڪوبه اشتهار موجود نه هوندو ڇو ته پهريان کان ڪنفيگر ٿيل هي پروگرام هر طرح جا اشتهار بند ڪري ڇڏيندو آهي.. پر ان باوجود توهان ايڊ منچر کي پنهنجي ضرورت تحت پڻ ڪنفيگر ڪري سگهو ٿا... ته پوءِ رڳو 548 ڪلو بائيٽ سائيز جو هي پروگرام هاڻي ئي سندس آفيشل سائيٽ تان ڊائونلوڊ ڪري وٺو..
