بنگلاديش ۾ غداريءَ جي الزام ۾ مقدما هلائي ڦاهين جون سزائون ڏنيون پيون وڃن جنهن تي سدائين وانگيان اردو ميڊيا هنگامو برپا ڪيو آهي ته پاڪستان سان محبت جي عيوض انهن ماڻهن کي ڦاهين جون سزائون ڏنيون پيون وڃن ـ سچائي اها آهي ته جماعت اسلاميءَ 2 دهشتگرد تنظيمون البدر ۽ الشمس ٺاهيون هيون جن هٿيارن جي زور تي ساري بنگلاديش (ان وقت اوڀر پاڪستان صوبو) ۾ ظلم جي باهه ٻاري ڏني هئي ۽ قتلام ڪيو هو ـ هاڻ انهن تي مقدما هلائي کين ڦاهين جي سزائون ڏنيون پيون وڃن ته اردوميڊيا هنگامو ڪري ڇڏيو آهي ـ جيڪڏهن اهڙن ماڻهن تي مقدما هلائڻ ۾ ڪا ڪوتاهي ٿي رهي آهي ته اها ضرور دور ٿيڻ گھرجي ۽ انصاف جون سڀ گھرجون پوريون ڪرڻ گھرجن ـ ڇا ماڻهو وساري ويٺا آهن ته هزارن جي انگ ۾ بنگالين جون اجتماعي قبرون مليون هيون؟ مون پاڻ ڊاڪا کان اٽڪل 50 ڪلوميٽر پري ساور ۾ اهڙين قبرون تي ٻه ڀيرا حاضري ڀري آهي ـ
