سردار شاهه مرڻ جو روز سوچين پيو، مرڻ ۾ ڇا رکيو آهي؟

[سليمان وساڻ]

نظم

سردار شاهه

مرڻ جو روز سوچين پيو
مرڻ ۾ ڇا رکيو آهي؟

حياتيءَ ۾ ڪجهه هلڪو ٿي
هوائن تي هلي ڏس تون
وِڄُن جي واڳ وٺ هٿ ۾
گهٽائن تي گهُمي ڏس تون
زمين کوٽين ۽ پورين پيو
سدا سوچي اڳيون جڳ تون
وصل جا کيت چارين پيو
وڇوڙن جا وٺي وڳ تون
مڃون ٿا هڪ جنم آ هيءُ
جنم ۾ سئو جنم جي وٺ
ڪڏهن تون پاڻ پوڄا ٿي
ڪڏهن سهڻو صنم جي وٺ
ملڻ جي مهل ماڻي وٺ
ڇڏي ڏي تون جدائيءَ کي
ڪڏهن تو ڪونه سمجهيو آ
خيالن جي خدائيءَ کي
ڪٿي آ دشت امڪان جو ؟
وڏي آ ديد جي دنيا
رُلي سوئي ويو آ ،جنهن
ڇڏي آ ديد جي دنيا
اگر ماڻهو مٽي آهي
مٽي مرڻي ڪڏهن ناهي
گذر تنهنجو جتان ٿيندو
گهٽي مرڻي ڪڏهن ناهي
ڇڻندا گل برابر پيا
گلن جو واس ڪيئن مرندو؟
ازل ۽ ابد جي وچ ۾
سدا پيو واءُ ۾ ترندو
اڃا تائين ٽڙيو ناهين
ڇڻڻ جو روز سوچين پيو
مرڻ جو روز سوچين پيو
مرڻ ۾ ڇا رکيو آهي؟

 

[عاشق سولنگي]

ڇڻندا گل برابر پيا
گلن جو واس ڪيئن مرندو؟

بلڪل گل پنھنجي خوشبي سان ماحول خوشبودار ڪندا آھن

 

[عباس علي انڙ]

بھترين ادا