سنڌي لئنگئيج اٿارٽيءَ طرفان جڏهن پنهنجي تيار ڪيل سمورين ڊڪشنريز کي سهيڙي هڪ شاندار پورٽل تيار ڪيو ويو جتي ڪنهن به لفظ جي ڳولا جا نتيجا اهڙا ته شاندار مليا جو هڪ ئي وقت سنڌي لفظن جي متبادل معنيٰ، سنڌي کان انگريزي، ديواناگري يا وري نه رڳو سنڌي لغت تحت مفصل تفصيل پر ڳوليل لفظن تحت سنڌي جي پهاڪن، چوڻين ۽ مهارتي اصطلاحن جا تفصيل به مليو وڃن... تڏهن خيال ٿيو ته ڇو نه ان اصطلاحي خزاني جنهن ۾ بقول سنڌي لينگويج اٿارٽي لڳ ڀڳ ٽن لک لفظن کان وڌيڪ ڄاڻ موجود آهي کي سوشل نيٽ ورڪ سميت سمورين ويب سائيٽس سان اهڙو ته مطابقت رکندڙ بڻائجي جو استعمال ڪندڙ آساني سان ويب سائيٽس تي موجود لفظن جا مطلب چاهي ته انگريزي ۾ يا وري چاهي ته مفصل سنڌي ۾ حاصل ڪري سگهي.. خيال کي عملي شڪل ۾ آڻڻ لاءِ سنڌ سلامت جي هونهار رڪن عبيدالله ”عبيد“ ٿهيم سان گڏجي SLA Dictionary نالي اهڙو برائوزرس ايڪسٽينشن تيار ڪيو ويو آهي جيڪو انٽرنيٽ تي ڪم ڪندڙن کي بس هڪ ٻن ڪلڪ سان سندن مطلوبا لفظن جا مفصل تفصيل مهيا ڪري سگهي ٿو.. اهڙي طرح سوشل نيٽ ورڪ تي گهڻو وقت گذاريندڙن کي سنڌي لينگويج اٿارٽي جي هن املهه خزاني مان سولائي سان معلومات ملي سگهندي.. في الحال ان قسم جو ايڪسٽينشن ٻن مشهور برائوزرس گوگل ڪروم ۽ فائر فاڪس لاءِ تيار ڪيو ويو آهي.. هن جي خوبين ۾ شامل آهن: هڪ ڪلڪ انسٽاليشن آئڪان جو برائوزرس ۾ نمايان ظاهر هجڻ چونڊيل لفظ جي هڪ ڪلڪ عارضي پاپ اپ تحت مختصر معلومات چونڊيل لفظ جي هڪ ڪلڪ پاپ ونڊوز تحت مفصل معلومات هڪ ئي وقت سنڌي، انگريزي ۽ ديواناگري لفظن جي ڳولا سان مطابقت ايڪسٽينشن کي سولائي سان سمجهڻ لاءِ تيار ڪيل وڊيو پڻ پيش ڪجي ٿي.. جيئن ته ڊڪشنريز کي گڏ ڪري ان جو هڪ جامع پورٽل ٺاهڻ جهڙو بي انتها محنتي ڪم سنڌي لينگويج اٿارٽي طرفان ٿيل هيو .. ان ڪري سنڌ سلامت طرفان هن ڪارآمد ايڪسٽينشن کي سڀني حقن ۽ واسطن سميت سنڌي لينگويج اٿارٽي حوالي ڪيو ويو .. جن طرفان اڄ ٻنهي برائوزرس لاءِ ايڪسٽينشن کي رليز ڪيو ويو آهي.. گوگل ڪروم استعمال ڪندڙ هيٺين لنڪ تان ايڪسٽينشن انسٽال ڪري سگهن ٿا https://chrome.google.com/webstore/detail/sla-dictionary/phpjjbogglpbjgnlldjdlinieejiamel جڏهن فائرفاڪس استعمال ڪندڙ هيٺين لنڪ تان ايڊان انسٽال ڪري سگهن ٿا.. https://addons.mozilla.org/en-US/firefox/addon/sla-dictionary/
هڪ لاجواب ڪم ..... سنڌي لينگيوئيج اٿارٽي جي ويب پورٽل تعريف لائق آهي. هي ايڪسٽينشن ته لاجواب آهي، جنهن آسانيون پيدا ڪري ڇڏيون. سيڪنڊن ۾ نتيجا سامهون ....
محترم عبيدالله ”عبيد“ ٿهيم سميت سنڌ سلامت سٿ جي خدمت ۾ سلام عرض ڪيانٿو . ساراهڻ جوڳو عمل آهي . لک قرب سدا سلامت هجو
بهترين ڪم، اسان جهڙا گوگلنگ جا شوقين انگريزي جي نخرن جي ڪري ذري گهٽ گوگل کان ائين ڀڄي رهيا هياسين جهڙو گنجو ڀڄي پاڪي کان، ڪڏهن ڪڏهن انڌي منڊي انگريزي پڙهندي پڙهندي ۽ پنهنجي مطلب جي معني ڪڍندي ڪو انگريزي لفظ اسپيڊ بريڪر بڻجي اسان جهڙن جوانن جا حوصلا پست ڪري وجهندو آهي، اڳي ئي ڊنل وري جو بنهه ڏکيو، اهڙو ڏکيو جو اُچار ۾ ئي منجهي وڃون ۽ ڪنهن يار دوست کان معني پڇون ته همراهه کل ۾ اونڌو ٿي اسان واري اندر جي انگريز خلاف 1857ع واري آزادي جي جنگ جو اعلان ڪري ڇڏيندو آهي جيئن هڪ ڏينهن عبدالحفيظ لغاري کان فون ڪري پڇا ڪيم ته ادا گوگل ”چروم“ بابت ڪا ڄاڻ آهي؟ ڪم جي شي آهي يا نه؟ همراهه جواب ته الائي ڏنو ڪه نه پر بڇڙو اهڙو ڪيو جو اڄ تائين اسان اهڙن حساس معاملن تي ڪنهن کان پڇا ئي ناهيون ڪندا، سو اسان جهڙن لا اها ايڪسٽينشن نعمت کان گهٽ ناهي. پر ڇوته مسئلا ختم ٿيڻا ناهن سو هتي به هڪ مسئلو آهي جيڪر ممڪن هجي ته ان جو حل ڳولهيو، مسئلو هي آهي ته ڊڪشنري معني ڊڪشنري هجڻ گهرجي، ماڻهو ڪو خاص ليک پڙهندڙ هجي ۽ ان ليک ۾ ڪو لفظ اچي ٿو، ان جي معني ڳولهڻ لا ايڪسٽينشن کي عرض ڪيم ته معني ته کوليائين پر ان سان گڏ محاورو ۽ ٻيو اهڙو مواد کلي ويو جنهن مون کي اصل مواد تان ئي هٽائي ڇڏيو، منهنجي خيال ۾ لفظ جي معني الڳ ونڊو ۾ کلڻ جي بجا ساڳئي ونڊو ۾ باڪس ۾ کلي ته ڪم جو تسلسل برقرار رهندو، پر بهرحال فقير جي ڪا چوائس ناهي سو اسان ان تي به آمين چونداسين.
ڇا توهان ڪنهن لفظ کي چونڊي برائوزر تي موجود آئڪان تي ڪلڪ ڪري ڏٺو آهي.. جي نه ته آزمائي ڏسو.. جو اهو توهان جي چوائيس وٽان هوندو... ايڪسٽينشن کي بهتر سمجهڻ لاءِ وڊيو هلائي پڻ ڏسو...
