وڏيرو حاجي علي محمد ڪاتيار
سموري زندگي تعليم لاء جاکوڙيندڙ بزرگ سياستدان، تعليمي ۽ سماجي ورڪر وڏيرو حاجي علي محمد ڪاتيار 1929ع ڌاري ٽنڊو محمد خان لڳ ڳوٺ عبدالرحيم ڪاتيار ۾ جنم ورتو، سندس والد جو نالو الهه بچايو ڪاتيار آهي ، هو گورنمنٽ هاء اسڪول عبدالرحيم ڪاتيار، پرائمري اسڪول ۽ گرلس پرائمري اسڪول عبدالرحيم ڪاتيار جو بانيڪار هو، انهن اسڪولن جي قيام دوران اسڪول بلڊنگ لاءِ زمين به هن عطئي طور ڏني ، هن عظيم انسان تعليمي ۽ سماجي خدمتن جي سلسلي ۾ نه صرف اسڪول قائم ڪيا پر هاء اسڪول عبدالرحيم ڪاتيار جي هاسٽل م رهندڙ ٻاهرين شاگردن کي 1960 کان 1979 تائين پنهنجي ذاتي خرچ مان ماني به کارائيندو رهيو، هاسٽل ۾ رهندڙ شاگرد سندس پيار ، محبت ۽ شفقت کي ڪڏهن به وساري نه سگهندا، شاگردن جي خدمت وارو اهو سلسلو ان وقت ختم ٿيو، جڏهن اسڪول جون هاسٽلون زبون حالي جو شڪار ٿي پنهنجو وجود وڃائي ويٺيون، نه رهيون هاسٽلون، نه رهيو شاگردن جي رهائش جو بندوبست ، نه رهيون حاجي علي محمد ڪاتيار جون شاگردن لاءِ مانيون.
هن جون تعليم جي معاملي ۾ خدمتون وسارڻ جهڙيون ناهن . حاجي علي محمد ڪاتيار ٽي ڀيرا لوڪل بورڊ حيدرآباد جو ميمبر رهيو، سندس فرزند عبدالرحيم ڪاتيار، ٽنڊو محمد خان ضلعي جي تعلقي بلڙي شاهه ڪريم جي يونين ڪائونسل عبدالرحيم ڪاتيار جو يو سي چيئرمين پڻ آهي . وڏيرو حاجي علي محمد ڪاتيار طويل علالت بعد 8 سيپٽمبر 2016ع تي وفات ڪري ويو..