ڪڇ-ڀُڄ هندستان جي علائقي ”ٻني“ جي ڳوٺ پناهواري جو هي سنڌي دوست آهي جنهن جو نالو آهي ڪلاڌر مُتوا. 1967ع ۾ جنم وٺندڙ ڪلاڌر جي تعليم بي اي گُجراتي آهي ۽ گُذر سفر پنهنجي ذاتي ڪاروبار تي اٿس. مادري زبان سنڌي آهي پر پاڻ ڪڇي، هندي، اردو، گجراتي ۽ انگريزي پڻ ڳالهائي سگهي ٿو. ادب سان لڳاءُ آهي. مختلف رسالن ۾ لکندو رهي ٿو ۽ 13 ڪتاب پڻ ڇپيا اٿس جن مان 7 پنهنجا ۽ 6 ترجمو ڪيل آهن. پنهنجي ادبي ڪم عيوض کوڙا سارا ايوارڊ ماڻيندڙ هي هند ڄائو سنڌي مختلف ادبي ميڙاڪن ۾ پڻ ويندو رهي ٿو جتي پنهنجو ڪيل ڪم پيش ڪرڻ تي کيس خوب مڃتا ملي ٿي. سنڌ کان ڪهي ويل سنڌي اديبن جي مهمانوازيءَ ۾ پڻ پيش پيش رهي ٿو.
