نصير سارنگ سردارچنڙپاٽائي: نصير احمد ميمڻ ولد محمد بخش ميمڻ جيڪو نصير سارنگ جي نالي سان لکندو آهي، تاريخ 5 آگسٽ 1970ع تي سنڌ جي مشهور ۽ تاريخي شهر پاٽ شريف تعلقي دادو ۾ اک کولي. پرائمري تعليم پاٽ شريف مان پڙهي، گورنمينٽ هاءِ اسڪول حيدرآباد ۾ داخلا ورتائين. جتان ميٽرڪ جو امتحان پاس ڪري مسلم ڪاليج حيدرآباد ۾ داخلا ورتائين. مسلم ڪاليج حيدرآباد مان انٽرميڊيٽ جو امتحان پاس ڪري، مهراڻ انجنيئرنگ يونيورسٽي ڄام شورو ۾ داخلا ورتائين. ۽ اتان ئي گريجوئيشن ڪيائين ۽ مهراڻ يونيورسٽي ۾ ئي ليڪچرار مقرر ٿيو. ڪجهه عرصي بعد کيس پروموشن ڏئي ساڳي يونيورسٽي ۾ پروفيسر مقرر ڪيو ويو. هن وقت خيرپور ميرس ۾ هڪ پروجيڪٽ ۾ ارڙهين گريڊ ۾ ڪم ڪري رهيو آهي. نصير سارنگ ادبي سرگرمين ۾ ڀرپور انداز سان حصو وٺي رهيو آهي، 1987ع کان ادبي لڏي ۾ شامل ٿيو. ڪيترائي مضمون مقالا ۽ ڪالم لکيا اٿس.
