سائين والي ولايت راءِ جي درٻار صاحب عرف قنبر درٻار سنڌ، هند ۾ مشهور قنبر جي هيءَ درٻار (هندن جي عبادت جي جاءِ) والي ولايت راءِ، شِوِ والي (عام چوڻيءَ موجب ’شوالي‘) پاڙي ۾، 1885ع ڌاري قائم ڪئي، جنهن ڪچيءَ جاءِ مان پڪي ٺهرائي. والي ولايت راءِ اصل هالا جو هو. هُو 1987ع ۾ قنبر آيو هو. هن درٻار صاحب جا سنڀالُو ولايت راءِ، جيوت سنگھ ۽ وشنداس (ڄم: 1889ع وفات: 1946ع) رهيا آهن. وشنداس چئن ڄڻن جي ٽرسٽ ٺاهي، جنهن کان پوءِ ٽرسٽي مقرر ڪيا ويا، جن ۾ بِرمانند ۽ موهن لعل به شامل هئا. درٻار صاحب جي موجوده ٽرسٽين ۾ سوڀراج وڪيل، اتم چند، مُکي ايسرداس وڪيل ۽ پروفيسر ڌرمپال جيسراڻي شامل آهن، جڏهن ته رکوالو سوڀراج وڪيل آهي. هن درٻار ۾ هر سال ڏِيارِي ۽ چنڊ تي 3 ڏينهن ميلو ٿيندو هو، جتي ٻاهريان شبي ۽ راڳي ايندا هئا، جن ۾ سنت ڪنور رام ۽ ماسٽر چندر به شامل هئا. ورهاڱي کان اڳ هتي ڀڳت به ٿيندي هئي. تنهن وقتِ جهڙي ڏياري قنبر ۾ ٿيندي هئي، سنڌ ۾ ٻيو ڪٿي به نه ٿيندي هئي. درٻار ۾ والي ولايت راءِ، جيوت سنگھ ۽ وشنداس جون سماڌيون ۽ تصويرون پڻ آهن. 1992ع ۾ نوجوان شاعر ڪشور ڪمار گيمناڻيءَ هڪ آرتي ٺاهي هئي، جيڪا 14 مصراعن تي مشتمل هئي. اها آرتي روزانو درٻار ۾ پريمي ڳائيندا آهن. - رياضت ٻرڙو
سائين ماڳ مڪان جا ويچار تہ وڻيا پر انهن ۾ تضويرون چار چنڊ لڳائي ڇڏين ها ! . پراڻيون عمارتون ڏاڍيون شاندار هونديون آهن ،ڏسڻ سان ئي من موهجي پوندو آهي .
