لنڊن (ڪلچرل رپورٽ) مشهور فلم سيريز جيمز بانڊ جي فلمن ۾ جاسوس جو ڪردار ادا ڪندڙ ناليوارو اداڪار راجر مور 89 سالن جي ڄمار ۾ لاڏاڻو ڪري ويو، راجر مور کي ڪينسر جو مرض هو ۽ گذريل ڪجهه عرصي کان علاج هيٺ هو، اداڪار راجر مور سوئيٽزرلينڊ ۾ لاڏاڻو ڪيو، آخري رسمون يورپي ملڪ مناڪو ۾ ادا ڪيون وينديون، راجر مور جي ٽوئيٽر اڪائونٽ تي سندس وفات جي تصديق جي ٽوئيٽ موڪلي وئي آهي ته جيمز بانڊ سيريز جو مشهور هيرو هاڻي هن دنيا ۾ نه رهيو آهي، جيمز بانڊ سيريز جون 24 کان وڌيڪ فلمون ٺهي چڪيون آهن، پهرين فلم ”ڊاڪٽر نو“ 1962ع ۾ رليز ٿي، جڏهن ته سيريز جي آخري فلم ”انسپيڪٽر“ 2015ع ۾ رليز ٿي، راجر مور سيريز جي گهٽ ۾ گهٽ 7 فلمن ۾ ڪم ڪيو، راجر مور کي برطانوي حڪومت سماجي خدمتن عيوض 2013ع ۾ ”سر“ جو خطاب ڏنو هو، هن 12 سالن تائين يونيسيف سان به گڏ ڪم ڪيو، راجر مور بيواهه ۽ 3 ٻار سوڳوار ڇڏيا آهن، واضح رهي ته راجر مور 2012ع ۾ نيويارڪ ۾ اسٽيج شو دوران اسٽيج تان ڪري پيو هو، کيس دل جو دورو پيو هو، راجر مور بعد ۾ ڪينسر جي مرض ۾ مبتلا ٿي ويو هو ۽ بهادري سان هن مرض سان وڙهندو رهيو، راجر مور جيمز بانڊ 007 جو ڪردار ڪري سڄي دنيا ۾ وڏي شهرت حاصل ڪئي، سندس لاڏاڻي تي هالي ووڊ ۾ سوڳ جي فضا ڇانئجي وئي. (ڪاوش اخبار تان کنيل) http://www.thekawish.com/beta/index.php?date=2017-05-24&pageno=8
