چنڊ وانگر اجرو ۽ ماڪ ۾ وهنتل ”زيب سنڌي“ فقير محمد سنڌي ڪھاڻيءَ جا سڀ رنگ زيب سنڌيءَ جي چوڌاري طواف ڪندي نظر ايندا آهن، مون کي ته ايئن به محسوس ٿيندو آهي ته زيب سنڌي ڪھاڻيءَ جي جاڳرتا لاءِ پيدا ٿيو هجي. لڳاتار ڪھاني، ڊرامي ۽ شاعريءَ سان نڀاءُ رکندو پيو اچي. لاڙڪاڻو پنھنجي قدامت ۾ جيترو قديم آهي. پر لارڪاڻي جي ليکڪن جي ڪھانيءَ جو اسلوب اوترو ئي جديد نظر اچي ٿو. ڪھاڻيءَ جي قدامت جي ڳالهه ڪجي ته، ڊاڪٽر اياز قادري ۽ جمال ابڙو سرفھرست نالا لاڙڪاڻي جي حوالي سان منظرِعام تي اچن ٿا، لاڙڪاڻي جي مِٽيءَ ادب جي هر دور ۾ پرگهور لڌي آهي جنھن ۾ ڪامريڊ سوڀو گيانچنداڻي، ڪيھر شوڪت، رزاق مھر، روشن تنيو، محمد علي پٺاڻي، مھتاب اڪبر راشدي، اختر جانوري، انور پيرزادو، اخلاق انصاري، انيس انصاري، غلام نبي گل، احسان دانش، ايوب گاد، جھانگير عباسي، ممتاز عباسي، سڪندر عباسي، منظور ڪوهيار، بدر ابڙو، ملڪ آگاڻي ۽ ٻيا تمام گهڻا نالا آهن، جييڪ منھنجي ذهن تي نه اچي سگهيا پر زيب سنڌي ڪھاڻيءَ جي کيتر ۾ هڪ الڳ جاءِ والاري آهي جيڪو به سنڌي ادب کي اکيون کولي ڪري پڙهندو ته زيب سنڌي ان کي چنڊ وانگر اجرو، ماڪ ۾ وهنتل نظر ايندو. زيب سنڌي هن وقت ڪھاڻيءَ جي ايڪسيليٽر تي مھارت واري انداز جو قلم ڌڻي آهي. زيب سنڌي هڪ ئي وقت سنڌي ۽ اردو ٻوليءَ جو ڊراما نگار، شاعر، ڪھاڻيڪار ۽ ناول نگار آهي پر ساڳئي وقت هو هڪ بھترين ڪمپيئر پڻ آهي. زيب سنڌيءَ جو اصل نالو محمد خان ولد عبدالستار شيخ، سندس جنم 7-سيپٽمبر 1957ع تي خيرپور ميريس ۾ ٿيو. سندس اصل شھر لاڙڪاڻو آهي. زيب سنڌي 1981ع ۾ سنڌ يونيورسٽيءَ مان سنڌيءَ ۾ ماسٽرس جي ڊگري حاصل ڪئي. 1988ع ۾ ريڊيو پاڪستان ۾ ريڊيو پروڊيوسر مقرر ٿيو. زندگي هڪ هنڌ بيھڻ جو نالو ڪونهي، انهيءَ جملي تي عمل ڪندي زيب سنڌي 1989ع ۾ ليڪچرار مقرر ٿيو. هن وقت سچل آرٽس ڪاليج ۾ايسوسيئيٽ پروفيسر آهي. آواز جي دنيا جي حوالي کان ريڊيو پاڪستان حيدرآباد تي ڪميپئر طور سندس آواز سنڌ جي ڪنڊ ڪڙڇ تائين پھچي ٿو. ڪھاڻيءَ جي کيتر ۾ زيب سنڌيءَ جو پھريون ڪتاب، ”گهٽيل خواهشون“ 1977ع ۾ شايع ٿيو. اهڙي طرح ڪھاڻيءَ جو ٻيو ڪتاب ”زندگي درد جي ٻانهن ۾“ 1981ع ۾ منظر عام تي اچي سگهيو. زيب سنڌي پنھنجي ٽھيءَ ۾ ترجمي نگار به لاجواب جو آهي. پر آءٌ ڪوشش اها ٿو ڪيان ته زيب جا ڪتاب اوهان جي نظر هيٺ ترتيبوار رکان ته بھتر ٿيندو. اهو ان لاءِ ته خبر پوندي آهي ته ليکڪ پنھنجي زندگيءَ ۾ ڪيتري جستجو ڪري ٿو. 3- ڪتاب ”موهن جي دڙي جو خزانو“ (ترجمو) 1982ع، 4- ”اسان زنده رهنداسين“ (ترجمو) 1983ع. 5- ”پٿر دل“ (ترتيب) 1983ع، 6- ”ڌرتي ماءُ“ ترجمو 1984ع، 7-”فلسطيني ڪھاڻيون“ ترتيب، 1985ع، 8- ”ڪنوار جي سيج“ ترجمو، 9- ”خليل جبران جي جيون ڪٿا“ 1992ع، 10-”جنم“ ترتيب، تاج جويي سان گڏ، 1992ع، 11- ”ڌنڌ ۾ گم ٿيل منظر“ ڪھاڻيون، 2001ع، 12- ”ڪيفي قليچ“ انٽرويوز، 2009ع، ۽ 13- ”حيدرآباد 47 ڪلوميٽر“ ڪھاڻيون 2010ع شامل آهن. زيب سنڌيءَ کي اهو به اعزاز حاصل آهي ته جيترو زيب سنڌيءَ لکيو آهي ايترو ڇپيو ۽ ٽيليڪاسٽ ٿيندو رهيو آهي، زيب جي محنت کي ڪٿي دَز ناهي چڙهي. زيب سنڌي ادب جي ميدان ۾ جاه و جلال سان اڳتي وڌدو پيو وڃي. ان محنت ئي زيب سنڌيءَ کي پي بي سي ايوارڊ ”بھترين ليکڪ ۽ ريڊيو ڪمپيئر“ ڏياريو. اهڙي طرح سٺي ليکاريءَ طور ڪي ٽي اين ايوارڊ، سنڌ يونيورسٽي پاران مڃتا شيلڊ، سنڌي ادبي سنگت ڪارڪردگي ايوارڊ ۽ مڃتا شيلڊون زيب سنڌي جي حصي ۾ آيون آهن. زيب سنڌيءَ جا سنڌي ٽي وي ڊراما، سيريل جن ۾ 1. سمنڊ جون سرحدون، 2. گهر ڀاتي، 3. ميران، 4.اشتھاري گهوٽ، 5. درد جي موسم، 6 جانشين شامل آهن. زيب سنڌي سولو پليز ۾ به پاڻ مڃرايو آهي، جنھن ۾ تقريباً 15-* سولو پليز شامل آهن. اهڙي طرح زيب سنڌي جا اردو ٽي وي ڊراما، سيريل، ”جانشين“، ”انجاني راستي“، ”جلتي لمحي“. سولو پلي ۾ ”چهال“ نجم عباسيءَ جي ڪھاڻي ”ڇوڏو“ جي ڊرامائي تشڪيل. ”دو سائي“ شيخ حفيظ جي ڪھاڻي ”ٻه پاڇا“ جي ڊرامائي تشڪيل. ”ڪيسي يه تڙپ“، ”سمجهوته“. ٽيلي فلم جي ڊوڙ ۾ زيب سنڌي وسان ڪونه گهٽايو آهي جن ۾ ”سيتا زينب“، ”چند خطوط“، ”چند تصويرين“، (نور الهدى شاهه جي سنڌي اسڪرپٽ جو ترجمو)، ”ميري ساٿ چلو“، ”پهول کلني ڪا زمانا“، ”حيدرآباد 47 ڪلوميٽر“. جھڙيءَ طرح زيب سنڌيءَ ڪھاڻيءَ جو پلاٽ ترتيب سان جوڙي پيش ڪيو آهي، اهڙي طرح زيب سنڌيءَ جي زندگيءَ جي محنت کي اوهان جي آڏو پيش ڪرڻ جي ڪوشش ڪئي آهي. هن مقابلي جي دؤر ۾ جهاتي پائي ڏسڻ سان معلوم ٿيندو ته ڪيترا نه هيرا جواهرات آهن، زيب سنڌي به انهن منجهان هڪ آهي. هي شخص ڪھاڻي، ڊرامي ۽ ناول جو سڌو سنئون سونهون دلبر ليکڪ آهي. زيب سنڌيءَ جو پھريون ناول، ”سيتا زينب“ جيڪو ڪتاب صورت ۾ ڇپجڻ کان اڳ ئي ماهوار ”امرتا“ ۾ قسطوار ڇپجڻ سان مقبوليت ماڻي. ملڪ جي هڪ اردو ٽي وي چينل ARY هن ناول تي ٽيلي فلم تار ڪئي. ان ٽيلي فلم کي اهو به اعزاز حاصل آهي ته 8-دفعا ٽيليڪاسٽ ڪئي ويئي آهي. زيب سنڌيءَ جي ڪھاڻيءَ جي نمايان خوبي اها آهي ته هو زندگيءَ جي حقيقتن تي منڌيئڙو گهمائي پاڻ پڏائڻ جي چڪر ۾ لفاظي ڀريل هوائي ڪھاڻيون نٿو لکي ۽ نه ئي پنھنجين ڪھاڻين ۾ عام پڙهندڙ جي مٿي تان لنگهي وڃڻ وارو فلسفو ٿو ٽُنبي. زيب سنڌي، ڪھاڻيڪار مان شاعر، ڊراما نگار، سڳنڌ پبليڪيشن جھڙي نامياري اشاعتي اداري جو مالڪ، ريڊيو ۽ ٽي وي ڪمپيئر، سندس سڀئي روپ تمام وڻندڙ ۽ بيحد ڪامياب رهيا آهن. سنڌي سان گڏ اردو جي مقبول ٽي وي ڊراما رائيٽر جي حيثيت سان سندس ڊراما نه فقط پاڪستان جي ڪيترن ئي اهم چينلز تان ٽيليڪاسٽ ٿيا آهن پر يورپ سيٽلائيٽ تان سندس ڊرامه ٽيليڪاسٽ ٿيڻ سبب سندس شھرت جو دائرو تمام وسيع ٿي ويو آهي. حوالا: 1. مختار احمد ملاح ”سنڌي ادب تي هڪ نظر“ ڇاپو ٻيو، 2010ع (مڪتبه فريدي) ص:494-495. 2. زيب سنڌي ”حيدرآباد 47 ڪلوميٽر“ 2010ع (ماڻڪ موتي تنظيم حيدرآباد) ص:125-126-127-128. 3. ماهتاب محبوب ”ماهوار ادب حيدرآباد“ آڪٽوبر 2001ع. 4. اياز گل ”ماهوار ادب حيدرآباد“، آڪٽوبر 2001ع. **
