هلندڙ سال ڇهن مهينن دوران ڪراچي ۾ ڇهه سؤ ڄڻن کي ٽارگيٽ ڪلنگ جو کاج بڻايو ويو. ڪراچي ۾ اِهو انگ 2009ع جي مقابلي ۾ ڊبل آهي. آمريڪي اخبار واشنگٽن پوسٽ موجب اڃان تائين ڪراچي ۾ ٽارگيٽ ڪلنگ جو سلسلو جاري آهي. پاڪستان جي سڀ کان وڏي شهر ۾ ماڻهن کي سرعام روڊن تي قتل ڪيو پيو وڃي. ان رتوڇاڻ ۾ مذهبي ۽ سياسي جماعتن سان تعلق رکندڙ جماعتن کي پڻ شامل ڪيو ويو آهي. اخبار موجب هلندڙ سال ڇهن مهينن دوران ڇهه سؤ ڄڻا قتل ٿيا، سال 2009 جي مقابلي ۾ اِها تعداد ڊبل آهي. هڪ ڪروڙ اسي لک آبادي واري شهر کي لاقانونيت جي لهر تباهه ڪري ڇڏيو آهي جتي پوليس بيوس، مذهبي ڇڪتاڻ ۾ اضافو ۽ سياسي ڌرين جي نسلي ورهاست عروج تي آهي. رپورٽ موجب قتلام جي ڪاررواين سبب ملڪ ۾ ڏڦيڙ ۽ خوف ڦهلجي رهيو آهي. اخبار پاڪستان جي اڳوڻي انٽيليجنس جي چيف جي حوالي سان ٻڌايو آهي ته سياسي حڪومتن درميان تڪراري مفادن، ڪمزور پاليسين ۽ ڪمزور سياسي ارادن ڪراچي ۾ ڪينسر وانگر ڦهلجندڙ فرقه بندي، لساني تڪرار ۽ مافيا جو خاتمو آڻڻ لاءِ ڪجهه نه ڪيو. پاڪستان ۾ ڏوهه ڪو مقامي مسئلو ناهي شهر جي افراتفري قبائلي علائقن ۾ فوجي آپريشن ۽ آمريڪي ڊرون حملن سبب لڏپلاڻ ڪري آيل طالبان ۽ القاعده جي اڳواڻن کي لڪڻ جو هنڌ ڏيندي آهي.
