ليجنڊ اداڪار حسين قادري بہ لاڏاڻو ڪري ويو. سنڌي ڊرامن جو مشهور سينيئر اداڪار محمد حسين قادري ڳچ عرصو بيمار رهڻ کانپوءِ اڄ لاڏاڻو ڪري ويو. محمد حسين قادري پهرئين جنوري 1957ع ۾ لاڙڪاڻي جي ليلا باغ محلي ۾ پيدا ٿيو، هن شروعاتي تعليم پنهنجي شهر لاڙڪاڻي مان حاصل ڪئي ۽ ان کانپوءِ هن 1988ع ۾ سنڌ يونيورسٽي مان صحافت جي ڊگري حاصل ڪئي. حسين قادري شروعات ۾ لاڙڪاڻي ۾ استاد طور پنهنجا فرض سرانجام ڏنا، ان کانپوءِ هو ڪراچيءَ آيو، جتي هن پهريان ريڊيو ۽ پوءِ ٽي وي ڊرامن ۾ ڪم ڪيو. بعد ۾ هو حيدرآباد اچي ويو، جتي هن زرعي ريڊيو جي پروگرام آفيسر طور پنهنجا فرض سرانجام ڏنا. حسين قادري ھزار کان وڌيڪ سنڌي اردو ڊرامن ۾ ڪم ڪيو. ڪيترن ئي سنڌي ۽ اردو ڊرامن ۾ پڻ ڪم ڪيو. جڏهن ته هو چوندو ته کيس اداڪاري جي پيشي سان تمام گهڻي محبت ۽ دلي لڳاءُ آهي، هن پنهنجي اداڪاري جي ڪري ڪيترائي ايوارڊ پڻ پنهنجي نالي ڪيا. محمد حسين قادري 6 مئي 2019ع تي دل جي عارضي سبب حيدرآباد ۾ لاڏاڻو ڪري ويو. سندس وڇوڙي تي نه صرف شوبز انڊسٽري پر سندس مداح، دوست، مٽ، مائٽ ڏک ۾ ورتل آهن ۽ سندس وڇوڙي کي هڪ وڏو خال چئي رهيا آهن.
