ڏک ۽ افسوس واري خبر آهي تہ ناميارو اديب ۽ محقق، سنڌي ادبي سنگت ڪراچيءَ جو ضلعي رابطا سيڪريٽري محمد امين مگسي ڪورونا وائرس جي وبا سان جهيڙيندي ڪراچيءَ جي سائوٿ سٽي اسپتال ۾ لاڏاڻو ڪري ويو آهي. انا للہ و انا الیہ راجعون اديب، عالم ۽ محقق، امين مگسيءَ جو پورو نالو محمد امين ولد مفتي ڪريم بخش مگسي آهي. سندس تعلق ميهڙ جي علمي، ادبي ۽ مذهبي گهراڻي سان آهي. سندس والد ڪريم بخش مگسي پنهنجي دؤر جو جيد عالم ۽ مفتي هو. محمد امين مگسيءَ 30 اپريل 1962ع تي ڳوٺ سوڀي مگسي تعلقي ميهڙ، ضلعي دادوءَ ۾ جنم ورتو. پرائمري ۽ سيڪنڊري تعليم ميهڙ مان ئي حاصل ڪيائين، جڏهن ته هن بي.اي 1984ع ۾ سنڌ يونيورسٽيءَ مان ڪئي ۽ ايم.اي (جنرل هسٽريءَ) ۾ پڻ سنڌ يونيورسٽيءَ مان 1990ع ۾ ڪئي. امين مگسيءَ جو والد سيد علي اڪبر شاهه جي قائم ڪيل مدرسي ’مدرسه عربيه دارالقرآن‘ ميهڙ ۾ 50 سالن تائين مهتمم رهيو. محمد امين مگسيءَ ۾پنهنجي والد صاحب جي صحبت ۾ لکڻ پڙهڻ جو شوق پيدا ٿيو. سندس مضمون ۽ تحقيقي مقالا اخبارن ۽ رسالن ۾ شايع ٿيندا رهن ٿا. محمد امين مگسيءَ جون هيٺيون تصنيفون شايع ٿي چڪيون آهن: (1) جوڳيئڙا جهان ۾ (دادو جي مشاهيرن جا خاڪا: (1998ع). (2) مگسي قبيلو، تاريخ ۽ تحقيق جي روشنيءَ ۾: (2012ع). هن وقت ’بلوچستان جي تاريخ‘ ۽ ’تصوف‘ جي موضوعن تي سندس تحقيقجاري آهي. هو پي.آءِ.اي ڪراچي ۾ گروپ 6 ۾ آفيسر ھيو. انسائيڪلوپيڊيا سنڌيانا تان ورتل
