چمڻ ٿي چنڊ کي چاهي_ غزل عبدالغفور شاهه

[صراط بلوچ]

چمڻ ٿي چنڊ کي چاھي لڳي ٿو ڪا چري آهي,
وڃيو گهر سيرَ تي ٺاهي لڳي ٿو ڪا چري آهي.
ھزارين جهيرَ پيرن ۾ اڃان ورچي نه ويٺي آ,
پئي ڪوهَ ڪاف ڏي ڪاھي لڳي ٿو ڪا چري آهي.
اکيون آڪاش ۾ ٻوڙي ٻڏي ويندي آ لڙڪن ۾,
صفا وس ۾ رھي ناھي لڳي ٿو ڪا چري آهي.
سڄو ڏينھن محل سپنن جا ڪري تعمير سوچن ۾,
ڇڏي ٿي پاڻ پو ڊاھي لڳي ٿو ڪا چري آهي.
ورڻ جي منڌ موٽي وئي وريو هن جو نه وڻجارو,
نٿي پر آس هيءَ لاھي لڳي ٿو ڪا چري آھي.
تونگر ملڪ جا “ تقوي” جتان پينار ٿي موٽيا,
اُتي سينو وڃيو ساھي لڳي ٿو ڪا چري آهي.