“غزل“ ڳاڙهي سِجَ ۾ ڳوڙهو آ ڄڻ... ساجد سومرو

[صراط بلوچ]

غزل
ڳاڙهي سِجَ ۾ ڳوڙهو آ ڄڻ
وقتُ ويو ٿي پوڙهو آ ڄڻ
سمنڊُ مڇي ۽ ٻارَ مهاڻا؛
دنيا ھُنَ لئه ھَوڙهو آ ڄڻ
پُٽَ ڪڍيو آ گهر مان ھُن کي؛
پوڙھو ھُو ڪو ڪوڙھو آ ڄڻ
حال وڃي ٿو ماضي ٿيندو؛
وقتُ ھَوا جو گهوڙو آ ڄڻ
سنڌ ابد جو آڳر آهي:
سنڌ ازل جو لوڙھو آ ڄڻ
بند گهٽيءَ ۾ موت اچي ويو؛
جيون ٿي پيو سوڙهو آ ڄڻ
سَنُ لَڪيءَ جو چشمو آهي؛
سامهون ڀَڳو ٽَوڙو آ ڄڻ
عشق شروع ۾ جَوڳُ ھُجي ٿو؛
ھئه ھئه انت وڇوڙو آ ڄڻ
روح مٽائي ويسَ هلي ٿو؛
جسم اسان جو جوڙو آ ڄڻ
پروفيسرساجدسومرو