15مارچ ڇا ڏنو ڇا ورتو؟ فقير محمد سنڌي. 15 مارچ 1206ع تي سلطان معز الدين محمد غوري جو قتل ڪيو ويو. 15 مارچ 1846ع تي عالم ۽ شاعر مولوي الله بخش اٻوجهو جنم ورتو. 15 مارچ 1846ع تي مشھور صوفي بزرگ ۽ شاعر رکيل شاهه ولد ميان نور محمد شاهه ڳوٺ حليم شاهه تعلقي ميرپور (بلوچستان) ۾ ڄائو. 15 مارچ 1874ع تي جليل القدر ديني ۽ سماجي اڳواڻ محمد صادق (کڏي وارو) ولد مولانا عبدالله شيخ ڪراچي جي محلي کڏي ۾ جنم ورتو. 15 مارچ 1920ع تي مشھور سنڌي اخبار ”الوحيد“ جو پھريون پرچو شايع ٿيو. 15 مارچ 1922ع تي گيتن جو خوبصورت شاعر بردو سنڌي اصل نالو محمد رمضان ولد خدا ڏنو لاشاري ڳوٺ ماڪن ڪوري تعلقي ميرپور ماٿيلي ضلعي گهوٽڪي ۾ ولادت ٿيس. 15 مارچ 1925ع تي قادر الڪلام شاعر سليم ڳاڙهوي جو اصل نالو الھه ورايو ولد حاجي الهڏنو مھر هو. پاڻ ڳوٺ ڳاڙهوي ضلعي خيرپور ميرس ۾ ڄائو. 15 مارچ 1929ع تي سنڌ جو نالي وارو شاعر نشتر ناٿن شاهي اصل نالو غازي خان نشتر ولد بالو خان لغاري ڳوٺ ٻهاري تعلقي خيرپور ناٿن شاهه ۾ جنم ورتو. 15 مارچ 1930ع تي ڊاڪٽر غلام علي الانا ولد خواجه الله ڏنو ڳوٺ تڙ خواجه تعلقي جاتي ضلعي ٺٽي ۾ پيدا ٿيو. ادبي سڃاڻپ مشھور اديب، عالم، محقق، دانشور ۽ ماهر لسانيات اٿس. 15 مارچ 1941ع تي سنڌ جو نالي وارو ڪھاڻيڪار ۽ مترجم ولي رام ولڀ مٺي ضلعو ٿرپارڪر ۾ جنم ورتو. 15 مارچ 1942ع تي لڪشمڻ امرومل دُبي ڳوٺ شر خيرپور ۾ جنم ورتو. سڃاڻپ شاعر اٿس. 15 مارچ 1952ع تي مشھور اديبه رخسانه صولت جو جنم ڏينھن آهي. 15 مارچ 1953ع تي نالي وارو چترڪار حفيظ الله کوهارو ڳوٺ سھڙا ڍورائي، تعلقي ڏوڪريءَ ۾ ڄائو. 15 مارچ 1955ع تي پاڪستان جي ڪرڪيٽر محسن حسن خان جو جنم ڏينھن آهي. 15 مارچ 1956ع تي سنڌي ٻوليءَ جي نامياري شاعر، اديب ۽ محقق سوڀران نرملداس وفات ڪئي. 15 مارچ 1961ع تي نثر نويس محمد صالح کھڙو ولد فضل محمد کھڙو ڳوٺ کهڙا تعلقي لکي ضلعي شڪارپور ۾ ڄائو. 15 مارچ 1969ع تي استاد نظاماڻي اصل نالو محمد ابراهيم نظاماڻي سانگهڙ ۾ جنم ورتو. ادبي سڃاڻپ ڪھاڻيڪار، محقق ۽ نثر نويس اٿس. 15 مارچ 1969ع تي يوسف هارون مغربي (اولهه) پاڪستان جو گورنر مقرر ٿيو. 15 مارچ 1973ع تي شيخ مجيب الرحمان بنگلاديش جي وزيراعظم جي حيثيت ۾ حلف کنيو. 15 مارچ 1981ع تي انگلينڊ جو رانديگر بيرنگٽن جو وڇوڙو ٿيو. 15 مارچ 1995ع تي (شھيد ڀٽو گروپ) جو قيام عمل ۾ آيو. جنھن جو چيئرمين مير مرتضيٰ ڀٽو ٿيو. 15 مارچ 2001ع تي ماهر لسانيات ۽ لطيف سرڪار جو پارکو ڊاڪٽر شاهنواز سوڍر چانڊڪا اسپتال لاڙڪاڻي ۾ لاڏاڻو ڪيو.
