سر رپ شاهواڻي

سر رپ مڪمل داستان 1
1
گُوندَرَ ڪِيو غَرَقُ، ماءُ! منهنجو جندَڙو،
ڏُکويَنِ مَرَڪُ، مَٿي سَڳَرَ پَنڌَڙو.
2
گُوندَرَ گَڏِياسِ، صِحَتَ نِيڙيمِ سَڄَڻين،
مادَرِ! مارِياسِ، ڦوڙائي پرينءَ جي.
3
گُوندَرَ هَٿَ نَه پيرَ، وِرِهُه مَنجِههِين وَهَڻو،
ڪُڙهِه ۾ قَطارُون ڪَري، سُورَنِ لايا سيرَ،
مُون جيئن گهاري ڪيرَ، هيڪَلِي رِيءَ سَڄَڻين.
4
اُٺي جيئن مورَنِ، اوڀَڙ وَلَهارَنِ ۾،
سا پَرِ گُوندَرَ ڪَنِ، جُہ ڦوڙائو سَڄَڻين.
5
لائي جو وِيا، سو مَنجِههِين ٿو مَچُ ٻَري،
سو اُجهامي ڪِئا، جنهن سورِيندَڙُ سُپِرِين.
6
ڪَهَڻُ ته ڪَچائِي، سُورَ نه سانڍَڻُ سُٿِرا،
اَڃا تَه، آئِي! ڏِيلَ منهنجي ڏُکَ سين.
7
جيئن سو تَئِيءَ تَرو، کامي کُوري وِچَ ۾،
مُون کي ڏِنو سَڄَڻين، مَنجهان سِڪَ سَرو،
وَرُ جِهيڻوئي ٻَرو ، مَ ڦوڙائو سَڄَڻين.
8
اُڀِرِيامِ اَنگُورَ، سُتي سُپيرِيَنِ جا،
کايو کايو سُورَ، لُڇيو لوچِيو اُٿِيان.
9
ڳَرِنَ ۾ ڳَرهيجِ، روئِي ڪِجِ مَ پَڌِرا،
تان سُوران ئي سَهيج، جان لاهِيندَڙُ ڪو لَهِين.
10
ڳُرَ ۾ ڳُجهو روءِ، پَڌَرِ وِجُهه مَ پِرِينءَ ري،
سُورَنِ سُڀَرُ هوءِ، هِينئڙا ڪُمَ ڪَنَن جيئن.
11
لاهه مَ پَچارانِ، سُکِ مَ سُمهُه جندَڙا،
ڪَرَ جهورِي ڪِيڻانِ، ڪالهوڻا اَڄُ گَهڻِي.
12
جِهڄي، جهانءِ ڪَري، ماٺِ نه اَچي مُون هِينئين،
سَڄَڻَ سي ساري، هو جَنِين جو هيرِئُون.
13
جهورِي، جِهڄَڻُ، جهانءِ، مُون جَنِين جِي نه لَهي،
آيَلِ! اِئين مَ ڀانءِ، ڪِ آئُون جِيئَندِي اُنِ ري.
14
جاءِ نَه سَڄو ڏينهن، هِينئَڙو اوٺي وَڳَ جيئن،
مُون پِرِيان سين نينهن، ڇِنَڻَ ڪارَڻُ ڪونَه ڪِيو.
15
لاهِيان جي نه چِتان، اَلا! اُنِ مَ وِسَران،
مَڙِهِيو مَنجهاران، جِيءُ منهنجو جَنِ سين.
16
پَلَ پَلَ ۾ پَلِيانسِ، پَلُ نه رَهي پِرِينءَ ري،
جيئن جهورِيءَ کان جَهلِيانسِ، جِهڄِيو تيئن
جهورِي پوي.
17
ڪَڪَرَ مَنجِهه ڪَپارَ، جُهڙُ نيڻَنِئُون نه لَهِي،
اَڄُ منهنجي چِتَ ۾، اُٺا پِرِين اَپارَ،
آءُ، سَڄَڻَ! لَهُه سارَ، وِرِهَه ويڙِهِي آهِيان.
18
مُون مَنجهيئِي مينهن، ڪوهُه ڪرِيندِيَسِ
ڪَڪَرين؟
سَرَلو سارو ڏينهن، مُون پِرِيان جو نَه لَهي.
19
سُتي سَنڀِرِيومِ، ڪو ڳُڻُ ٻاروچَنِ جو،
ڪَنڌِ وِهاڻو ڀِنو، هَرِيو هَٿُ ٿِيوم،
سَڄَڻُ يادِ پِيومِ، جاڙَ جِيان ٿِي جيڏيُون.
20
سَڄَڻَ سَنڀِرِيامِ، پِيَم ڪَرَ ڪَپارَ ۾،
جِهَڙي تِهَڙي حال سين، پِرِين نه وِسَرِيامِ،
هَرِيا هَٿَ ٿِيامِ، نيڻَنِئُون نِيرُ وَهي.
21
سَنڀِرِيو جِيان، ڳالهُيون پِرِيَمِ تنهنجون،
ڳُڻَ ڪيتَرا ڳَڻِيان، ٿورَنِ مَٿو ناهِه ڪو.
22
جُه سي سَنڀِرجَنِ، سَهَه تَنِين سين اوريان،
لُونءَ لُونءَ هيٺِ وَڄَنِ، رَڳُون رَبابَنِ جيئن.
23
چَتُرُ رَهي نه چِتُ، ويڻين واڳِيو نَه رَهي،
رَئِيءَ لَٽِجي نِتُ، هينئڙو واٽَ وِرِکَ جيئن.
24
چَتُرُ رَهي نه چِتُ، سُوران صَبُرُ نه ڪَري،
سَڄَڻَ ساري نِتُ، ويڳاڻو ٿِيو وِجُهلي.
25
چوري چوري چِتُ، مان نَيَ وِهاڻِيءَ
نِڪران،
نينھن گُهرائي نِتُ، پِرِيان سَندي پيرَ ۾.
26
چيتارِيانِ چُڻُڪَنِ، سَنڀارِيانِ سَهِي،
اَنَدرِ رُوحَ رَهِي، مون کي صُورَتَ
سُپِرِيَنِ جِي.
27
چيتارِيان چُڻُڪَنِ، وسارِيان نه وِسَري،
ويرو تارَ ڏُکَنِ، سَڄَڻَ ڀَڳي هَڏَ جيئن.
28
چيتاريان چُوندِياسِ، ڳالِهيُون سَڀوئِي
سَڄَڻين،
جُہ منھن مُقابِلِ ٿِياسِ، ته سَڀِ وَڃِنِمُ وِسَرِي.

سر رپ 2
1
سَڄَڻَ سان نه ڀيٽَ، ڳُجُهه ڳَرِهِيان
ڪَنِ سين،
ڳالِهيون اِنَهِيءَ ريٽَ، سَلا ٻَڌِي مورِيُون.
2
ڳالِهيون پيٽَ ورَنِ ۾، وَڌِي وَڻَ ٿِيُون،
پَرَ سين مُون نه ڪِيُون، گوشي پِرِين نَه گَڏِيا.
3
ڍولِيو وِيئڙو ڍورِ، تي ٿِي سِيءَ گُذارِيان،
مادرِ! مُون مَ چورِ، نَه تَه پڌرو پُوندِيَسِ پِرِينءَ ري.
4
وِيو ٻاروچو نِڪِرِي، اَنگُنِ چاڙهي اَنگُ،
روئِي، ڏِنَمِ رَنگُ، ويچارَنِ وَڻَن کي.
5
ٻاهَرِ لَڳَهُه نَه ڪوءِ، اَندَرِ جهورِ جُهڙُ وَهي،
وَسائِيندِي وِڄُڙِي، حُبَ جَنِين کي هوءِ،
لالَنِ جَنِين لوءِ، سي اوڪاڻِينِ نَه اَکِيُون.
6
مُون تان لاهِ مَ، سُپِرِين! اَکِيُنِ جا آگَمَ،
ڪَري مَلارُ مينهن جيئن، وَسِي لاهِه وَهَمَ،
تو ڏِٺي مُون غَمَ، ڏينهَن جا ڏورِ ٿِيا.
7
نيڻَ نه نِنڊون ڪَنِ، ڀڳو آرَسُ اَکِيين،
اُجهامِيو ٻَرَنِ، توکي سارِيو سُپِرِين!
8
سَئِين نه سيڻانِ، ناهِه اُبتِي اُنِ سين،
ونءُ سَهِي ويڻانِ، تو نَه سَرَندِي تَنِ ري.
9
گَوَنِي ۽ گُونِي، پِرِين پَٽائين گَجَ جيئن،
جي مَنَ مَجُوني، سي ڪيئن وڃنِ وِسَرِي؟
10
اَندَرِ آندَرِيُون، جيئن سي وانجِهيءَ لَٺِ ۾،
مُون تَنَ تيتَرِيُون، ته ڪيئن مِلِبو سَڄَڻين؟
11
جيئن سي کُوهِيءَ نارَ، وَهَنِ وارِيءَ گاڏُئان،
هينئڙو پِرِيان ڌار، نِبيرِيانس نَه نِبِري.
12
سَٻَرُ سيءُ پِيو، نه مُون سوڙِ، نه گَبَرو،
نَه مُون ڪانڌ، نه قُوتُ ڪِي، جوڀَن وَهِي ويو،
تَنِين حالُ ڪِهو، نِڌَرَ جَنِين نِجُهرا.
13
اُتَرُ اوتُون ڏي، نَه مُون سوڙِ، نه گَبَرو،
سِيءُ سارينديون سي، جَنِين نِڌَرَ نِجُهرا.
14
اُتَرَ ڏِنِي اوتَ، نه مُون سوڙِ، نه گَبَرو،
چارَئِي چُنِيءَ پوتَ، مون ريڙِهيندي راتِ گَئِي،
15
نينهن نِهائِينءَ جان، ڍَڪِيو ڪوهُه نه ڍَڪِيين،
ڄَرَ ڄيري ڇَڏِي، ته ڪيئن پَچَندا ٿان؟
سَندِي ڪُنڀاران، ڪَنِ ڪَريجا ڳالهڙي.
16
نينهن نِهائِينءَ جيئَن، ڍَڪِيو ڪوهُه نه ڍَڪِيين؟
ڄَرَ ڄيري ڇَڏِي، ته رَڇَ پَچَندا ڪيئن؟
تُون پُڻِ ڪَريجِ تيئن، جيئن ڪُنڀارَ ڪَرنِ ڪَمَ سين.
17
نِهائِينءَ کان نِينهُن، سِکُ، مُنهنجا سُپِرِين!
سَڙي سارو ڏينهن، ٻَهَرِ ٻاڦَ نَه نِڪِري.
18
نِينهُن نِهائِينءَ جان، سُتي لوڪَ ڍَڪِيان،
اُجهامِيو ٻَران، توکي سارِيو، سُپِرِين!
19
ڪِين جو ڪُنڀارَنِ، مِٽِيءَ پائي مَنِيو،
تنهن مان تِرَ جيتَرِي، جي پوي خَبَرَ کَرَنِ،
هِي تان هُوندَ مَرَنِ، هُنِ اَڱڻِ اوراتو ٿِئي