****** تحرير، تشريح، نثري ترجمو ۽ پيشڪش _ صراط بلوچ ****** سر معذوري ۾ سسئي بابت رهبر لطيف جو هي بيت پڙهي مون کي ائين محسوس ٿيندو آهي ڄڻ رهبر لطيف هن بيت ۾ نه رڳو سسئي جي ڳالهه ڪئي آهي پر پنهنجي قوم جي مسڪينن، غريبن، بي پهچ، لاچار ماروئن جي حالت کي سسئي جي تمثيل سان بيان ڪندي چيو آهي ته ڏکن ۾ تڪليفن ۾ جڪڙيل مارو ماڻهو مسڪيني ۾ بک ۾ بدحالي ۾ ايترو ته وڪوڙيل آهن جو هنن اڌ اگهاڙن مظلومن کان خوشيون، مسرتون ئي وسري چڪيون آهن (اُگهاڙِيءَ وِهانءُ، وِيو ويچارِيءَ) اھڙي صورت ۾ ھنن کي کل ڪيئن ايندي؟ (بُکِيءَ کِلَ نَہ اُڄَهي،) هنن کي ايترو ته ڪمزور ۽ هيڻو ڪيو ويو آهي جو سماج جي ظالمن آڏو ڏمرجي مهاڏو اٽڪائڻ کان ئي لاچار بڻيل آهن. (ڏُکِيءَ ڏَمَرُ ناهِ،) ************************ سر معذوري داستان پهريون بيت ڏُکِيءَ ڏَمَرُ ناهِ، بُکِيءَ کِلَ نَہ اُڄَهي، اُگهاڙِيءَ وِهانءُ، وِيو ويچارِيءَ وِسَرِي. نثري ترجمو غمن ۾ گرفتار ڪاوڙ ڪيئن ڪندي، جيڪا بکن ۾ پاهه آهي تنهن کي کل نٿي اچي سگهي. جنهن وٽ ويس وڳا ناهن ان ويچاري کان وهانءُ(خوشيون، مسرتون) وسري ويا آهن.
