سر سريراڳ ٻه سٽا بيت

ٻه سٽا بيت
1
مانَ پُڇَنِئِي سُپِرِين، چِتان لاهِه مَ چُرَ،
اُنِين جا اَمُرَ، کَڻُ ته خالِي نه ٿِيين.
ٻسٽ دوهو سورٺو ميل سريراڳ 1-1
2
مانَ پُڇَنِئِي سُپِرِين، چِتان چُرَ مَ لاهِه،
پِرِيَنِ اَڳِيان پاءِ، پَلئُه مَڱڻَهارَ جِيئن.
ٻسٽ دوهو سورٺو ميل سريراڳ 1-2
3
اَٺَئِي پَهَر اوڙاه تي، مَنجِهه گُهرِءِ گهاري،
وَسُ نه ويچاري، ته ڪا ماڳِ ڍُڪَندِي مَڪُڙِي.
ٻسٽ دوهوسورٺو سريراڳ 2-14
4
اورِيائين آڻِينِ، ميڙِيو مُعَلِمَ خَبَرُون،
سا تان سُڌِ نه ڏِينِ، جتي وَهُ ويڌُ ڪَري.
ٻسٽ سورٺو سريراڳ 3-3
5
سَڀئِي سَئِينءَ ڪَرِين، ڪومَ مُنجهايين واٽِ!
سُپيرِيان جي ساٿِ، لائو لَڱو ميڙِيين!
ٻسٽ دوهو سورٺو ميل سريراڳ 4-1
6
چَڱنِ ساڻُ چَڱائِيون، اِيئن سَڀَڪو هوءِ،
تو جِيئن ڪَري نه ڪوءِ، بُڇَنِ ساڻُ ڀَلائِيون
ٻه سٽ دوهو سورٺو ميل سريراڳ 4-3
7
چڱا ڪَنِ چَڱائِيُون، مَٺائِيُون مَٺَنِ،
سو وَڙُ سيئِي ڪَنِ، جو وَڙُ جُڙي جَنِ سين.
ٻسٽ دوهو سورٺو ميل سريراڳ 4-4
8
مَيَنِ مَٿي سَمَرا، کُهِيَنِ سَڏَ ڪَرِينِ،
ساٿُ نِباهِيو نِينِ، اِيءَ پَرِ سَندِي سَڄَڻين.
ٻسٽ دوهو سورٺو ميل سريراڳ 4-5
9
سونا! وانءُ صَرافَ سِينءَ، لَڏو لاهِ مَ لَڏِ،
سودو سوئِي ڇَڏِ، جَنهن ۾ جَواهِرُ ناهِ ڪِي.
ٻسٽ دوهو سورٺو ميل سريراڳ4-9
10
سونا! وانءُ صرافَ سِينءَ، لڏو هَڏِ مَ لاهِ،
آهي تَنِ اونداهِ، جَنِ جَواهِرَ ضايَع ڪِيا.
ٻسٽ دوهو سورٺو ميل سريراڳ 4-10
11
جُہ صَرافَنِ لَڏِيو، ته تُون پُڻ لَڏِجِ سونَ!
قَدُر لَهَندُءِ ڪونَ، نيئِي گَڏِيندَءِ گَڏُونءَ سين.
ٻسٽ دوهو سورٺو سرسريراڳ 4-11
12
اَگِهيو ڪائو ڪَچُ، ماڻِڪَنِ موٽَ ٿِي!
پَلَءِ پايو سَچُ، آڇِيندي لَڄَ مَران!
ٻسٽ سورٺو سريراڳ 4-14
13
اَمُلُ اَساري پَئِي، ڀورِي! ڀَڳُءِ جِتِ،
ڪوھَ نه وِيئين تِتِ، ٻَئِي اَڌَ هَٿِ ڪري؟
ٻسٽ دوهو سورٺو سرسريراڳ 4-18
14
اَمُلُ اساري پَئي، ڀورِي! ڀَڳُءِ جِئين،
وانءُ صرافَنِ سِينءِ، ٻَئِي اَڌَ هَٿِ ڪري.
ٻسٽ دوهو سورٺو سرسريراڳ 4-19
15
جِتي ماڻِڪَ ماڳُ، تِتي چوران تَڪِيو،
سَنئُون تَنِ سَڀاڳُ، اَمُلُ جَنِ اوباهِيو.
ٻسٽ سورٺو سريراڳ 4-21
16
چورُ اُڀو اِيئن چوءِ، ته آئُون اُهوئِي آهِيان،
جي اَسِي اَکِيُنِ هوءِ، ته لِڪي کي ڪونه لَهي.
ٻسٽ سورٺو سريراڳ 4-22
17
مون ٿي چَيُئِي ڪاندَ! ڀُتِي ڀاڙِ مَ مَڪُڙِي،
سِڙَهَ پُراڻا پاندَ، لَهرِيُون سَهِي لَڳَندِيون.
ٻسٽ سورٺو سريراڳ 5-1
18
وِيرِ وڙهندِيَءِ، ويسرا! اُٿِي توهُ طَلَبِ،
سائِرَ ڪِنهن سَبَبِ، ڪالَ نه وِڌِءِ ڪُنَ ۾.
ٻسٽ دوهو سورٺو سريراڳ 5-3
19
ڪالَ وِڌائِين ڪُنَ ۾، جاڏا جُنگَ جَهازَ،
تُنهنجِي اَڄُ تَرازَ، آهي آرَ اَکِيُنِ ۾.
ٻسٽ دوهو سورٺو ميل 5-4
20
تانگهي ۾ تاڻي، ٻَڌُ پنهنجو تُرَهو،
اونهي ۾ آڻي، ڪونَ ڏيندُءِ ڪو ٻيو!
ٻسٽ سورٺو سرسريراڳ 6-1
21
تارُو تَرِيو وَڃَنِ، ننڍا وڏا واهُڙا،
هَئي! ٻَرِ! اَتارُنِ، جِيئن ڳَرا مَٿِنِ مولِھيا.
ٻسٽ سورٺو سرسريراڳ 6-3
22
ڏوري لَھُ ڏاتارُ، جِمَ وِهِين ويسِرو،
هَڪِيو هوئج هوشِيارُ، کِنوڻِ کِوَندِيَءِ اوچَتِي.
ٻسٽ سورٺو سرسريراڳ 6-4
23
سُتين ڪِهَڙِيءَ سارَ؟ وِڄُ کِوَندِيَءِ ويسَرا!
تو جيڏا تو يارَ، لَهِرِنَ لَهِوارا ڪيا.
ٻسٽ سورٺو سرسريراڳ 6-5
24
سُتين سنجهي ئِي، وِڄُ کِوَندِيَءِ ويسرا!
وِيرَ وَرِي ويئِي، اَسارَنِ تان اوچَتِي.
ٻسٽ سورٺو سرسريراڳ 6-6
25
کِنوَڻِ کِنوايو، آيَئِي نِنڊَ اَڀاڳَ جي،
جِنِين نه ڀَئو ڀانيو، ڪَري تَوائِي تَنِ کي.
ٻسٽ سورٺو سرسريراڳ 6-7
26
توڻي توائِي، توءِ تنهنجو آسرو!
سَڄَڻَ ڳَرِ لائِي، کِيرُون ڏِيندِيَسِ جيڏِئين.
ٻسٽ سورٺو سرسريراڳ 6-13