سر سريراڳ ٽي سٽا بيت

ٽي سٽا بيت
1
مانَ پُڇَنِئِي سُپِرِين، چِتَ ۾ رَکِجِ چيتُ،
سِڙُهه ڌُئاري صافُ ڪَرِ، صابُڻَ ساڻُ سُپيتُ،
سامُونڊِي سُچيتُ، ٿِيءُ ته پَهُچِين پارَ کي.
ٽسٽ دوهو ميل(دوهو اڌ سورٺو) سريراڳ 1-3
2
مانَ پُڇَنِئِي سُپِرِين، چِتَ ۾ چيتاريجِ،
ڪَڍِجِ ڪائي ڪَچَ کي، ڪُوڙُ مَ ڪَمائيج،
وَڻِج وِهائِيج، سَڀُ سوداگَرَ سَچَ جو.
ٽسٽ دوهو ميل(دوهو اڌ سورٺو) سريراڳ 1-4
3
مانَ پُڇَنِئِي سُپِرِين، چِتان لاهِه مَ چورُ،
ڪَڍِي ڇَڏِ تُون قَلبَ مان، ماري ڪُوڙو ڪورُ،
هُنَ ڀَرِ سَندو هورُ، مَٿان تو مَعافُ ٿِئي.
ٽسٽ دوهو ميل(دوهو اڌ سورٺو) سريراڳ 1-5
4
مانَ پُڇَنِئِي سُپِرِين، چِتاريجِ چِتُ،
دائِما دُوربِيءَ ۾، پَسين وِلاتُنِ وِتُ ،
نِيــنهن نيکاري نِتُ، ملاحَ! گَڏِ مُعَلِمَ سين.
ٽسٽ دوهو ميل(دوهو اڌ سورٺو) سريراڳ 1-6
5
ڪائو ڪَمايومِ، مُوتِي مون نَه وَڻِجِيا،
سِيهي جو سَيَّدُ چَئي، وَکَرُ وِهايومِ.
هِهَڙو حالُ سَندومِ، توهَه تُنهِنجي اُبَهان.
ٽسٽ دوهو ميل(دوهو اڌ سورٺو) سريراڳ 1-7
6
ڪَچُ ڪَمايُمِ ڪُوڙُ، ڀَڳَمِ عَهدَ اَللهَ جا،
پِڃِرو جو پاپَنِ جو، چوٽِيءَ تائِين چُورُ،
مَعلومُ اَٿـئِي مُورُ، ڳُوڙَها، اِنَهِينءَ ڳالهه جو.
ٽسٽ سورٺو ميل(سورٺو وچ دوهو) سريراڳ 1-8
7
سِڙَهَه سَوان، لاڄُو نَوان، اولا سَندَنِ عاجَ،
ساٿِي سَفَرِ هَلِيا، ڀَري جُنگَ جَهاجَ،
حاصُلُ ڪَرِييــن حاجَ، واحِدَ! وَڻِجارَنِ جِي.
ٽسٽ دوهو ميل(دوهو اڌ سورٺو) سريراڳ 1-12
8
سِڙَهَه سَنوان، لاڄُو نَوان، مُهاڻا سَندَنِ مِيرَ،
ساٿِي سَفَرِ هليا، ٿيا سَڻاوا سِيرَ،
جي اَچَنِ ساڻُ اُڪِيرَ، سي ٻيڙا رَکِين ٻاجَهه سين.
ٽسٽ دوهو ميل(دوهو اڌ سورٺو) سريراڳ 1-13
9
جيڪِي مَنجِھه جَهانَ، سو تارِيءَ تَڳي تُنهنجي،
لُطف جِي لَطيفُ چئي، تو وَٽِ ڪَمِي ڪانَ،
عَدُلَ ڇُٽان آن نَه، ڪو ڦيرو ڪِج فَضُلَ جو.
ٽسٽ سورٺو ميل(سورٺو وچ دوهو) سريراڳ 2-1
10
سارِي راتِ سُبحانُ، جاڳِي جَنِ ياد ڪِيو،
اُنِ جي عبداللطِيفُ چَئي، مِٽيءَ لڌو مانُ،
ڪوڙين ڪَنِ سَلامُ، آڳھِ اَچيو اُنِ جي.
ٽسٽ سورٺو ميل(سورٺو وچ دوهو) سريراڳ 2-2
11
سيوا ڪَرِ سَمنڊَ جِي، جِت جَرُ وهي ٿو جالَ،
سَئين وهَنِ سِيرَ ۾، ماڻِڪَ، موتِي، لالَ،
جي ماسو جُڙيئِي مالَ، ته پُوڄارا! پُرِ ٿِئين.
ٽسٽ دوهو ميل(دوهو اڌ سورٺو) سريراڳ 2-3
12
سارِي راتِ سُجانَ، سودو ڪَن صاحبَ سين،
ٻانَهپَ ڀَري ٻيڙِيُون، هَلِيا جوپَ جوانَ،
پاڻِي پَهلوانَ، لَحَظي مَنجِھه لَنگَهِي ويا.
ٽسٽ سورٺو ميل(سورٺو وچ دوهو) سريراڳ 2-6
13
جَنِين سودي سچَ جو، وَکَرُ وِهايو،
بَخِرو لَھُمُ الۡبُشّريٰ جو، اُنِين لَءِ آيو،
اُنِ کي لالَنَ! لنگهايو، ساندارو سَمُونڊَ جو.
ٽسٽ دوهو ميل(دوهو اڌ سورٺو) سريراڳ 2-8
14
اِيءَ گَتِ غواصَنِ، جِيئن سَمُونڊُ سوجِهيائُون،
پيهِي مَنجِھه پاتارَ جي، ماڻِڪَ ميڙِيائُون،
آڻي ڏِنائُون، هِيرو لالُ هَٿَنِ سين.
ٽسٽ دوهو ميل(دوهو اڌ سورٺو) سريراڳ 2-9
15
آڇاڙا عَمِيقَ جا، گَڏِيا غَواصَنِ،
جهَرِيُون جهاڳي آئِيا، ڪارُونڀارَ ڪُنَنِ،
سمُونڊُ سوجهي جَنِ، آڻي اَمُلَ اولِيا.
ٽسٽ دوهو ميل(دوهو اڌ سورٺو) سريراڳ 2-10
16
وِيا جي عَمِيقَ ڏي، مُنهن ڪائو ڏيئِي،
تَنِ سِپُون سوجهي ڪَڍِيُون، پاتاران پيهِي،
پَسندا سيئِي، اَمُلَ اَکَڙِيَنِ سين.
ٽسٽ دوهو ميل(دوهو اڌ سورٺو) سريراڳ 2-11
17
وِيرَمَ لاهي ويهُه، مَٿي آرَ اوڙاهَ جي،
پَسِي پاڙي وارِيُون، ڪِجِ اَنديشو ايهُه،
ويندو نه پَسِين ڏيهُه، پَتَڻِ هُنِ پارِ مَڻي؟
ٽسٽ سورٺو ميل(سورٺو وچ دوهو) سريراڳ 2-13
18
هِڪِي ٻانَهي چِتَ ۾، ٻِي، صاحِبُ سَنواري
دَنگِي هِنَ درياهَ مان، هلائي هاڪاري،
ترازُو تاري، سُتَڙِ سَڀيئِي ڪري.
ٽسٽ دوهو ميل(دوهو اڌ سورٺو) سريراڳ 2-15
19
هِڪِي ٻانَهي چِتَ ۾، ٻِي سِٽي صاحِبُ،
ڪَڍي اُونَهين ڪُنَ مان، اَيءُ آڳي جو عَجَبُ،
اِيءُ سائِينءَ جو سَبَبُ، جِيئن ٻُڏا اُڪاري ٻارِ مان.
ٽسٽ دوهو ميل(دوهو اڌ سورٺو) سريراڳ 2-16
20
هِڪِي ٻانَهي چِتِ ۾، ٻِي جا ڪَري اَللهُ،
پاڻَهِين وِجَهي ڪُنَ ۾، پاڻَهِين اُڪاري اوڙاهُ،
تِنهن واحِدَ کي واهُ، جو سُتَڙِ سَڀيئِي ڪَري.
ٽسٽ دوهو ميل(دوهو اڌ سورٺو) سريراڳ 2-17
21
هِڪِي ٻانهي چِتَ ۾، ٻِي جا الله ڪَري
پاڻَهِين وِجَهي ڪُنَ ۾ پاڻَهي ڪَنڌِيَ ني،
سُتَڙِ سي ڍوئي، جي تڙَ توائِي مَڪُڙا،
ٽسٽ دوهو ميل(دوهو اڌ سورٺو) سريراڳ 2-18
22
کُوها ڪالھ کَڻِي، اُنِ وِڌا اُتَرَ آسَري،
اَلا جُهري مَ اُنِ جي، اولي جِي اَڻِي،
وَڻَجارَنِ وَڻِي، وَکَرُ وِڌو ٻيڙِيين.
ٽسٽ سورٺو ميل(سورٺو اڌ دوهو) سريراڳ 3-1
23
وَکَرُ سو وِهاءِ، جو پَئي پراڻو نه ٿِئي،
ويچِيندي وِلات ۾، ذَرو ٿِئي نه ضاءِ،
سا ڪا هَڙَ هَلاءِ، آڳَھ جَنهن جي اُبَهِين.
ٽسٽ سورٺو ميل(سورٺو وچ دوهو) سريراڳ 3-2
24
ٻيڙِي، تُنهنجي ٻاجِھ، وَکَرُ تِنهن وِصالَ جو،
کُوها، اولا تو ڪِيا، سَڀِ سُونهارا ساجَ،
اُتِ ڪا مُعۡلِمَنِ حاجَ، جِتِ پُورَڻَ وارو پاڻِهِين
ٽسٽ سورٺو ميل(سورٺو وچ دوهو) سريراڳ 3-4
25
ٻيڙِي پُراڻِي، وَکَرُ پاءِ مَ وِتَرو،
تَري ۾ تُنَ پيا، پاسَنِئُون پاڻِي،
هِيءَ هَڏِ وِهاڻِي، ڪَڙهُ ڪالهوڻي ڏينهن کي.
ٽسٽ سورٺو ميل(سورٺو وچ دوهو) سريراڳ 3-5
26
تَري ۾ تُنَ پياسِ، پاسَنِئُون پاڻِي وَهي،
کُوهو جُهرِ جُهنو ٿِيو، لاڄُو سَڀِ لَڙِياسِ،
جيلاهِ سَڌَرُ سُکاڻِياسِ، وَهي تي وَهَ سامَهُون.
ٽسٽ سورٺو ميل(سورٺو وچ دوهو) سريراڳ 3-6
27
تُنَ تُنِيندو آءُ، مَکِ ڏِيهاڻِي مَڪُڙِي،
سانباهِي سَمُونڊَ جِي، مَنا مُور مَ لاهِ،
اَڄ ڪِي سَنجِھ صُباحِ، اُهِرَندِي اُتانگَ تَڙين.
ٽسٽ سورٺو ميل(سورٺو وچ دوهو) سريراڳ 3-8
28
جُتو وانءُ جَهازَ! گَڏِيو غُرابَنِ سين،
پُورِيندي هُنَ پارَ ڏي، سَڌَرَ کَڻِج سازَ،
اَچَنِ ٿا آوازَ، سَٽاڻي سَمُونڊَ جا.
ٽسٽ سورٺو ميل(سورٺو وچ دوهو) سريراڳ 3-10
29
دُنگي ۾ داڻا، وَٺِي وِجُھ وَکَرَ جا،
وِيرِ وڙهندِيَءِ، ويسَرا! وِيهُه مَ ويڳاڻا!
هِيءَ نِنڊَ، نه ڄاڻان، ڪڏهن هَڻَندِيَءِ تارَ ۾.
ٽسٽ سورٺو ميل(سورٺو وچ دوهو) سريراڳ 3-12
30
وَکَرُ، وَڻِجارا! پاڻَ پَرائو چاڙِهيو،
اَچِي لَهِرِيُون لَڳيُون، ٻيڙِيءَ ٻِپارا،
جاڳو جي يارا! ته تَڙِ تَوائِي نه ٿئي.
ٽسٽ سورٺو ميل(سورٺو وچ دوهو) سريراڳ 3-13
31
ٻيڙِياتا! ٻئِي، تو نہ ڦَٻَندِيُون ڳالَهڙِيُون،
سَڄِيُون راتِيُون سُمَهِين، ڀَرُ سُکاڻَ ڏيئِي،
صُباحَ سَڀيئِي، پارِ پُڇَندَءِ خبرُون.
ٽسٽ سورٺو ميل(سورٺو وچ دوهو) سريراڳ 3-14
32
بَندَرِ جان ڀَئِي، ته سُکاڻِيا مَ سُمَهو،
ڪَپَرُ ٿو ڪُنَ ڪري، جِيئن ماٽي مَنجَھه مَهِي،
ايڏو سُورُ سَهِي، ننڊ نه ڪَجي، ناکُئا!
ٽسٽ سورٺو ميل(سورٺو وچ دوهو) سريراڳ 3-18
33
سُتا سَڀِ پَئِي، سَندي مُعَلِمَ آسَري،
اَئِين پُڻَ سُمَهو، ناکُئا! بَندَرِ ناه ڀَئِي،
جَنِ جِي سَيِّدَ لَڄَ کَنئِي، سي سَڀِ لَنگهيندا لَڪِيُون.
ٽسٽ سورٺو ميل(سورٺو وچ دوهو) سريراڳ 3-19
34
سَڀئِي سُبحانَ جي، ڪَرِ حوالي ڪَمَ،
ٿِيءُ تَحقِيقَ تَسلِيم ۾، لاهي غَمَ وَهَمَ،
قَادِرُ ساڻُ ڪَرَمَ، حاصُلَ ڪَري حاجَ تو.
ٽسٽ دوهو ميل( دوهو اڌ سورٺو) سريراڳ 4-2
35
وِتُ وِيمي جو جي لَهِين، ته ٻِي ڪارِ نه ڪَرِيين ڪا،
سا پَروڙِج ڳالَهڙِي، وَڻِجارَنِ وٽا،
موتي جِنِ هٿا، آندَءِ گهڻي اَدَبَ سين.
ٽسٽ دوهو ميل( دوهو اڌ سورٺو) سريراڳ 4-6
36
اَمُلُ آڇ مَ اُنِ کي، جي نه پَروڙِينِ مَٺِ،
جِتِ گڏِجِئِي جوهَرِي، ماڻِڪُ تِتَهِين مَٽِ،
جنين سونَ سين سَٽِ، تَنِ هَڻِي رِيءُ رَدِ ڪِيو.
ٽسٽ دوهو ميل( دوهو اڌ سورٺو) سريراڳ 4-7
37
سونا! وانءُ صَرافَ سينءَ، ڀَڃِي ڇَڏِ بازِي،
چاندِي ڪيو چلائِيين رُپو رَوازِي،
جِتِ ٿيندو رَبُ قاضِي، اُتِ توريندا تَجِوِيزَ سين.
ٽسٽ دوهو ميل( دوهو اڌ سورٺو) سريراڳ 4-8
38
جي نَه سُڃاڻَنِ سَچَ کي، ويهُه مَ تِنِي وَٽِ،
اَمُلَ کي اَڌ ڪري، پاڻان هَڻندا پَٽِ،
وَڃِي مُهَرَ تِنِين وَٽِ مَٽِ، جي پارکو پارِسَ جا.
ٽسٽ دوهو ميل( دوهو اڌ سورٺو) سريراڳ 4-12
39
وَيا سي وِينجهارَ، هِيرو لال وِنڌِينِ جي،
تِنِين سَندا پويان، سِيهي لَهَنِ نه سارَ،
ڪُٽِينِ ڪُٽِ لُهارَ، هاڻي اُنِين ڀيڻِيين.
ٽسٽ سورٺو ميل(سورٺو وچ دوهو) سريراڳ 4-15
40
ماڻِڪُ مُنڌُ هَٿان، پيتِيءَ ۾ پُرَزا ٿِيو،
سَڄو تان سَيدُ چَئي، لَهي لَکُ سوا،
ڀَڳي پُڄاڻان، پَدَمان ئِي پَري ٿيو.
ٽسٽ سورٺو ميل( سورٺو وچ دوهو) سريراڳ 4-20
41
جهنگُ کامِي پَٽُ ٿِيو، لَٿِي چوران لِڪَ،
وَئِي وُجُودان نِڪِرِي، جيڪا دَڙِي دِڪَ،
هِڪُ سَڄَڻُ ٻي سِڪَ، ٻئي پَهڻا پاڻَ ۾.
ٽسٽ دوهو ميل( دوهو اڌ سورٺو) سريراڳ 4-23
42
لَهِرِيُنِ ليکو ناهِ ڪو، جِتِ ڪَپَرَ ڪُنَ ڪارا،
آڇاڙا عَمِيقَ جا، اَچَنِ اوڀارا،
اُٿِي اَسارا! وِيرِ وڙهندِيَءِ ويسَرا!
ٽسٽ دوهو ميل( دوهو اڌ سورٺو) سريراڳ 5-2
43
آهي آرَ اَکِيُنِ ۾، ناکُئا! ڪِج نِگاهَ،
وڏا ٻيڙا ٻوڙِيا، سائِرَ ڏيئِي ساهَ،
مُلاحِظو، مَلاحَ! ڪِج ڪو اِنَهِيءَ ڪُنَ جو.
ٽسٽ دوهو ميل( دوهو اڌ سورٺو) سريراڳ 5-5
44
ملاحِظو مِهَراڻَ جو، مُورِ مَ لاه مَناءُ،
سامُونڊِي! سنڀالَ ڪِين، سُمهَڻَ آيُئِي ساءُ،
جاڳِي جَرَ مَٿاءُ، تاري وانءُ تَرازَ کي.
ٽسٽ دوهو ميل( دوهو اڌ سورٺو) سريراڳ 5-6
45
تاري وانءُ تَرازَ کي، مَنجهان مَوجَ مَلاحَ!
دانهُون ڪَنِ درياهَ جيون، اُونهي جا آگاهَ،
سُونهَنِ جِي صَلاحَ، وَٺُ ته وِيرِ لَنگهِي وَڃِين.
ٽسٽ دوهو ميل( دوهو اڌ سورٺو) سريراڳ 5-7
46
ثابِتُ لَنگِهيا سِيرَ، لهرِنَ لوڏِيا ڪِينَ ڪِين،
وَڃِي پَهُتا پارَ کي، نِرِتُون مَنجهان نِيرَ،
ماءِ پَهُتا مِيرَ، ٻارِ لنگِهيائُون ٻاجهِه سين.
ٽسٽ سورٺو ميل(سورٺو وچ دوهو) سريراڳ 5-9
47
ڪوڙيين جي ڪائو ٿِئي، سَمُنڊَ ڪِين نہ سِڪَنِ؟
پاڻِيءَ سين پيکُ ڪِيو، تيلانهن وَڻِجهارَنِ،
لالون سي لَهَنِ، جِنِي سودو سَچَ سين.
ٽسٽ دوهو ميل(دوهو اڌ سورٺو) سريراڳ 6-2
48
سامونڊِي! ٿو سَنبَهِين، ساڄو جهَلِ سُکاڻُ،
لَڳي واءُ وَڏاندَرو، مُنجهائي مِهراڻُ،
جِنِين ڀانيو پاڻُ، ڪَري توائِي تَنِ کي.
ٽسٽ دوهو ميل(دوهو اڌ سورٺو) سريراڳ 6-8
49
نَڪو سُکُ نَکَٽين، نه ويساندَ نَئِين،
جيڪا اَچِئِي سامُهِين، ڀانئِين سا سَنئِين!
مُوڙِي ڪوهَ مَئِين؟ جِيئن سَڄِيُون راتِيُون سُمَهِين!
ٽسٽ دوهو ميل(دوهو اڌ سورٺو) سريراڳ 6-9
50
اَوکِي راهَ اَللهَ جِي، اَوکِي اَوکِيءَ ڀَتِ،
هُوءِ جي ڏيهائِي ڏيھَ جا، تَنِ پُڻِ مُوڙَهِي مَتِ،
آڇارانِ اُبَتِ، گِهڙجِ گهاٽي نينهن جِيئن.
ٽسٽ دوهو ميل(دوهو اڌ سورٺو) سريراڳ 6-10
51
مَ ڪِين هيجَ، مَ هوجَ، تَرسُ مَ، تاڻِ جَهازَ کي،
چَئو ڪَلِمون محمد تي، تہ اڳِيان اچِئِي اوڄَ،
سَوکِيءَ ڀَتِ، سَٻوجهَه! تُنهِنجِي مَڪي ڍُڪي مَڪُڙِي.
ٽسٽ سورٺو ميل(سورٺو وچ دوهو) سريراڳ 6-11