" ٻري جن ٻاري" ٽنڊي الهيار ضلع جا ناميارا استاد صاحبان سلسلي جي ڪڙي نمبر (47) سائين مولا بخش خاصخيلي ڳوٺ مٺو خاصخيلي ديھ ستياري يونين ڪائونسل ڄارڪي تعلقه چنبڙ ضلع ٽنڊوالهيار تحرير : اڪبر علي جروار سائين مولابخش ولد الهه بچايو خاصخيلي سندن جنم 24 آگسٽ 1953ع تي ڳوٺ مٺو خاصخيلي ۾ ٿيو شروعاتي تعليم پرائمري ٽِي ڪلاس ڳوٺ محمد علي پرهياڙ ۾ نالي واري استاد سائين جمن پرهياڙ وٽ پڙهيا جنهن کانپوءِ پنهنجي ڳوٺ جي اسڪول ۾ داخل ٿيا جتان پرائمري پنج ڪلاس پاس ڪيائون سندن پرائمري جي استادن ۾ سائين جمن پرهياڙ ، سندن ڀاءُ سائين ڌڻي بخش خاصخيلي ، سائين عبدالرحيم ۽ سائين محمد وهنيل درس شامل آهن، اڳتي مڊل اسڪول پاڪسنگهار مان اٺ ڪلاس پاس ڪيائون. اڳتي مئٽرڪ سائنس فرسٽ ڊويزن ۾ ايس ايم هاءِ اسڪول ٽنڊوالهيار مان سال 1972ع ۾ ڪيائون ، انٽر ايس ايم ڪاليج ٽنڊوالهيار مان سال 1975 ع ۾، بي اي سال 1980ع ۾ ڪيائون . تعليمي قابليت هئڻ ڪري کين سرڪاري استاد طور نوڪري 16 آگسٽ سال 1973 ع تي ملي ،پي ٽي سي جي ٽريننگ سال 1976ع ۾ ڪيائون، سندن پهرين مقرري برانچ اسڪول سائينداد ڊيشڪ ۾ ٿي، انکانپوءِ پرائمري اسڪول حاجي عالم کوکر ،برانچ مڊل اسڪول صاحب خان جروار ، پرائمري اسڪول چوڌري برڪت علي ، گورنمينٽ پرائمري اسڪول بهادر دائيداڻو، گورنمينٽ پرائمري اسڪول همزه ٽالپر ، گورنمينٽ پرائمري اسڪول بختاور پتافي ، گورنمينٽ پرائمري اسڪول صاحب خان جروار، گورنمينٽ پرائمري اسڪول الهه بخش جروار، گورنمينٽ پرائمري اسڪول بڪيرا شريف ، گورنمينٽ پرائمري اسڪول بچل بڪيرو، گورنمينٽ پرائمري اسڪول مٺو خاصخيلي سميت مختلف اسڪولن ۾ تدريس جون خدمتون سرانجام ڏيڻ کانپوءِ 23 آگسٽ سال 2013 ع تي رٽائر ٿيا. پنهنجي وقت جا بهترين استاد رهيا آهن. ڪجھ عرصو مڊل اسڪول صاحب خان جروار ۾ پڙهايائون.
