« ٻري جن ٻاري » ٽنڊي الهيار ضلعي جا ناميارا استاد صاحبان سلسلي جي ڪڙي نمبر ( 60 ) سائين حاجي محمد جمن ڪاڪيپوٽو صاحب ڳوٺ امين محمد ڪاڪيپوٽو نصرپور تعلقو ۽ ضلع ٽنڊوالهيار تحرير :نم مھيسر سنڌ ۾ تمام گهڻن حوالن سان سڃاڻپ رکندڙ ضلعو ٽنڊو الهيار جيڪو تيل ، گيس جي ذخيرن ، باغات ، زرعي زمين جي حساب سان يا علمي ۽ تعليمي حساب سان تمام زرخيز ۽ شاھوڪار خطو رھيو آھي . ان خطي ۾ بيشمار ناميارا استاد ۽ تعليمي ماھر پڻ پيدا ٿيا . انھن ناميارن استادن جي نالن جي لسٽ ۾ ھڪ نالو سائين حاجي محمد جمن ڪاڪيپوٽي جو به فخر سان ڳڻجي ٿو . مونکي ناز آھي ته آئون به سندس شاگردن ۾ شمار ٿيان ٿو . پاڻ قديمي ۽ سنڌ جي تاريخي شهر نصرپور جي ٽائون ڪميٽي جي نائين وارڊ جي ڳوٺ امين محمد ڪاڪيپوٽو ۾ حاجي جان محمد ڪاڪيپوٽي جي گھر ۾ 15 جون 1949 ع تي جنم ورتائون . ھن انتھائي شريف ، ماٺيڻي ، بااخلاق ، با ڪردار ۽ ٻاجھاري طبيعت جا مالڪ ، پنھنجي پرائمري تعليم ، پنھنجي ڳوٺ جي پرائمري اسڪول مان حاصل ڪري ، 1961ع ۾ انگريزي تعليم حاصل ڪرڻ لاءِ گورنمينٽ هاءِ اسڪول نصرپور ۾ داخل ٿيو . جتان پاڻ 1966ع ۾ ميٽرڪ جو امتحان پاس ڪيائون . اھڙي طرح گورنمينٽ City Arts College Hyderabad مان انٽر ميڊيئٽ جو امتحان پاس ڪرڻ کان پوءِ سنڌ يونيورسٽي ڄامشورو مان پرائيويٽ طور B A ۽ M A جو امتحان پاس ڪيائون . پاڻ پنھنجي پيشي جي لحاظ کان B.Ed جي ڊگري سنڌ يونيورسٽيء مان ريگيولر پڙهي حاصل ڪيائين ۽ M.Ed جي ڊگري سنڌ ايگريڪلچر يونيورسٽيءَ مان حاصل ڪيائين . سائين حاجي محمد جمن ڪاڪيپوٽو صاحب تعليم کاتي ۾ بطور پرائمري استاد جي 01 جون 1968ع تي ٽنڊو الهيار جي گورنمينٽ پرائمري اسڪول گولو هاليپوٽي ۾ مقرر ٿيو . جتان ستت ئي کيس PTC جي ٽريننگ لاءِ ايليمينٽري ڪاليج دادو موڪليو ويو ، ٻن سالن جي ٽريننگ کان پوءِ پاڻ پھرين جون 1970ع ۾ فارغ ٿي موٽيا ۽ کين گورنمينٽ پرائمري اسڪول موج خان مھاجر ۾ مقرر ڪيو ويو . تقريبن 9 سالن تائين اتي ڳوٺ ۽ آس پاس جي علائقي واسين جي گلڙن جھڙن ٻارڙن کي تعليم جھڙي زيور سان آراسته ڪيائين . اتي سندس ڪيل خدمتن کي موج خان مھاجر ۽ آس پاس وارا ڪڏهن به فراموش ڪري نه سگھندا . ڇو ته جيڪي ماڻھو پنھنجو وجود وساري قوم جي وجود کي عزيز رکن ٿا اھي ، محسن ۽ مھربان ماڻھو ڪڏهن به ڪنھن کان وسرندا ناھن . ان کان پوءِ گورنمينٽ پرائمري اسڪول موج خان مھاجر مان کين ترقي ڏيئي گورنمينٽ مڊل اسڪول بلڙي شاھ ڪريم ۾ JST طور رکيو ويو . جتان وري 1980 ع ۾ بدلي ٿي نصرپور ھاءِ اسڪول ۾ آيا . پنجن سالن جي عرصي کان پوءِ کين گورنمينٽ مڊل اسڪول بڪيرا شريف ۾ انچارج ھيڊ ماستر طور مقرر ڪيو ويو . اتان 18 جنوري 1988 ع ۾ سندن HST طور پروموشن ٿي ۽ کين گورنمينٽ ھاءِ اسڪول ميرپورخاص ۾ رکيو ويو . جتان ڏيڍ سال کان پوءِ 1989 ع ۾ نصرپور ٻيھر بدلي ٿي آيا . جتي پاڻ تقريبن 20 سالن تائين نصرپور ۽ ان جي پسگردائيءَ جي غريب ۽ مسڪين شاگردن جي بھتر مستقبل لاءِ پاڻ کي ارپي سماج جي بھتري ۽ ڀلائيءَ لاءِ پنھنجي دل و جان سان ڪردار ادا ڪيو . پاڻ نه رڳو ٻارڙن کي بھتر تعليم ڏني پر علم ادب جي ترقي ۽ ترويج سان گڏ پنھنجي شاگردن جي مثالي ڪردار سازي پڻ ڪيائين . پاڻ پنھنجي ڊيوٽي ھميشه ايمانداري ۽ سچائيءَ سان ادا ڪندي ، 2009 ع ۾ گورنمينٽ ھاءِ اسڪول نصرپور مان رٽائرڊ ٿيا آھن . ھي ٻاجھارو ، مھربان ۽ شفيق انسان ھن وقت پنھنجي رٽائرمينٽ واري زندگي گذاري رهيو آھي . اسان جي پنھنجي پالڻھار رب ڪريم جي بارگاه ۾ دعا آھي تہ کين تڪليفن ۽ مشڪلاتن کان دور رکي . مالڪ سائين شال سندن زندگي ۾ برڪت عطا ڪري ۽ ڪامل صحت عطا فرمائي ته جيئن پنھنجي باقي زندگي اطمينان ، سڪون قلب سان پنھنجي ٻاجھاري ۽ مھربان رب جي ذڪر فڪر ۽ بندگيءَ ۾ گذارين . آمين Nim Mahesar Nim Mahesar
