ممتاز قريشي
سينيئر رڪن
دل جي دوري جون ڪجهه علامتون اهڙيون هونديون آهن، جيڪي اوچتو ظاهر ٿيڻ بدران ڪجهه هفتا پهرين کان ئي محسوس ٿينديون آهن، دل جي دوري کان اڳ جون اهي علامتون سمجهڻ ۽ انهن کي اهميت ڏيڻ سان پنهنجي ۽ پنھنجن پيارن جون زندگيون بچائڻ ممڪن آهي.
دل جي دوري جو سبب
دل جو دورو ان وقت ٿئي ٿو، جڏهن دل ڏانهن رت جي فراهمي گهڻو گهٽجي وڃي يا مڪمل طور تي بند ٿي وڃي.
اهو عام طور تي شريانن ۾ چرٻي، ڪوليسٽرول، يا ٻين مادن جي گڏجڻ سبب ٿيندو آهي، جنهن کي پليڪ چيو وڃي ٿو. ڪڏهن ڪڏهن پليڪ بلڊ ڪلاٽ بڻجي رت جي وهڪرن کي روڪي ڇڏيندو آهي. نتيجي طور، دل کي رت جي فراهمي متاثر ٿئي ٿي ۽ دل جي دوري جو سبب بڻجي سگهي ٿي.
ابتدائي نشانيون ڄاڻڻ جي اهميت
جيڪڏهن دل جي دوري کان اڳ ظاهر ٿيندڙ نشانيون وقت سر سڃاتيون وڃن، ته فوري طبي امداد ذريعي وڏو نقصان روڪي سگهجي ٿو. دل جي دوري جي وقتي سڃاڻپ ۽ علاج نه رڳو زندگيون بچائي سگهي ٿو، پر مڪمل صحتيابي جو امڪان به وڌي وڃي ٿو.
دل جي دوري کان اڳ جون عام نشانيون
1. سيني ۾ تنگي يا سور:
سيني ۾ وزن يا ڪجهه دٻجڻ يا تنگي محسوس ٿيڻ دل جي دوري جي سڀ کان عام نشاني آهي. اهو سور گهڻو ڪري سيني کان ڪلهن، ڳچي، يا پٺي ڏانهن به پکڙجي سگهي ٿو.
2. غيرمعمولي ٿڪاوٽ:
بغير ڪنهن ظاهري سبب جي گهڻي ٿڪاوٽ دل جي دوري جي علامت ٿي سگهي ٿي، خاص طور تي جيڪڏهن اها ٿڪاوٽ روزمره جي سرگرمين کي متاثر ڪري.
3. ساهه کڻڻ ۾ ڏکيائي:
ساهه کڻڻ ۾ مشڪلات، جيڪو ورزش يا هلڪي سرگرمي دوران وڌي وڃي، دل جي دوري جي امڪان کي ظاهر ڪري ٿو.
4. سيني ۾ ساڙو يا جلن جو احساس:
ڪيترائي ماڻهو سيني جي سڙڻ کي عام پيٽ جي تڪليف سمجهن ٿا، پر اهو دل سان لاڳاپيل مسئلو به ٿي سگهي ٿو.
5. ٻانهن، ڳچي يا پٺي ۾ سور:
ڪڏهن ڪڏهن دل جو دورو سڌي طرح سينو جي بدران ٻانهن، ڳچي، يا پٺي ۾ سور ذريعي ظاهر ٿئي ٿو، خاص طور تي عورتن ۾.
دل جي دوري کان اڳ جون خاص علامتون
مختلف تحقيقي مقالن مطابق ڪجهه خاص نشانيون دل جي دوري کان ڪافي ڏينهن پهرين کان ئي محسوس ٿيڻ لڳنديون آهن، جهڙوڪ:
- رات جي ننڊ ۾ خلل
- غيرمعمولي ٿڪاوٽ
- ڪمزوري ۽ بيزاري
اهي نشانيون دل جي دوري کان هڪ مهيني پهريان ظاهر ٿي سگهن ٿيون.
دل جي دوري جو خطرو وڌائڻ ۾ ڪجهه طبي حالتون ۽ طرز زندگي جو وڏو ڪردار هوندو آهي، جيئن:
1. ٿولهه: اضافي چرٻي شريانن کي تنگ ڪري ٿي، جيڪا دل تائين رت جي فراهمي متاثر ڪري ٿي.
2. سگريٽ يا تماڪ جو استعمال: تماڪ شريانن کي سخت ڪري رت جي رواني کي متاثر ڪري ٿي.
3. ذیابطيس: رت ۾ شوگر جو وڌيڪ مقدار شريانن کي نقصان پهچائي ٿو.
4. هاءِ بلڊ پريشر ۽ هاءِ ڪوليسٽرول: اهي ٻئي حالتون شريانن ۾ پليڪ جي ٺهڻ جو سبب بڻجن ٿيون.
5. خانداني بيماري: جيڪڏهن خاندان ۾ ڪنهن کي دل جو دورو پئجي چڪو آهي، ته ٻين ميمبرن ۾ پڻ ان جو خطرو وڌي وڃي ٿو.
مردن ۽ عورتن ۾ فرق
مردن ۽ عورتن ۾ دل جي دوري جون نشانيون ڪافي حد تائين مختلف ٿي سگهن ٿيون.
- مردن ۾ عام نشانيون:
سيني ۾ وزن، ساهه کڻڻ ۾ ڏکيائي ۽ سيني جو سور. - عورتن ۾ اضافي نشانيون:
گردن، ٻانهن، يا پٺي ۾ سخت سور، غيرمعمولي ٿڪاوٽ، ۽ بيچيني.
موجوده دور ۾ وڌندڙ خطرو
نئين تحقيق مان معلوم ٿيو آهي ته 40 سالن کان گهٽ عمر وارن ماڻهن ۾ دل جي دوري جي واقعن ۾ تيزي سان اضافو ٿي رهيو آهي، جيڪو خطري جو اهم الارم آهي.
دل جي دوري کان بچاءَ
دل جي دوري کان بچڻ لاءِ ڪجهه اهم قدم کنيا وڃن، جيئن:
1. صحت مند غذا جو استعمال، جنهن ۾ گهٽ چرٻي ۽ گهٽ ڪوليسٽرول وارا کاڌا شامل هجن.
2. باقاعده ورزش، جيڪا دل کي مضبوط بڻائي ٿي.
3. سگريٽ نوشي کان پاسو ڪرڻ.
4. بلڊ پريشر ۽ شوگر تي ڪنٽرول.
5. باقاعده طبي چيڪ اپ ڪرائڻ.
نوٽ: هي مضمون طبي تحقيق تي ٻڌل آهي، تنهن هوندي به ڪنهن به علامت جي صورت ۾ پنهنجي ڊاڪٽر سان رجوع ڪرڻ لازمي آهي.
دل جي دوري جا ڪارڻ (ڪنٽرول کان ٻاهر)
جذباتي دٻاءُ گھٽائڻ، خوش مزاجي سان رهڻ