1. ايترو ڪم ڪريو جو اوهان کي پگهر اچي:
کاڌي کي صحيح نموني جسم جو حصو بڻائڻ لاءِ ضروري آهي ته اوهان پنهنجو جسم پوريءَ طرح ڪم ۾ آڻيو. مقصد سان ڀريل ڊوڙ، هلچل ۽ جسماني سرگرميءَ سبب کاڌو هضم ٿي جسم جو حصو بڻجندو آهي. اوهان ايترو ڪم ڪريو جو اوهان کي پگهر اچي. ان دوران ۽ بعد ۾ اوهان کي سڪون ۽ اطمينان محسوس ٿيندو. کاڌي جي مقدار کي گهٽايو پر هر ٽن ڪلاڪن ۾ ڪجهه نه ڪجهه ضرور کائو. اوهان ڏينهن جي ٻن حصن جو کاڌو ڇهه ڀيرا ڪري کائو. هر ڀيري مختلف قسم جي خوراڪ استعمال ڪريو جيئن ڪچيون يا اڌ پڪل ڀاڄيون، ميوا، خشڪ ميوا، سلاد، بسڪٽ، انڊا، گوشت، مڇي، دالون، اناج وغيره. هڪ هفتي جو چارٽ چارٽ ٺاهيو، جنهن ۾ جسم لاءِ ضروري وٽامن، پروٽين، ۽ غذائيت شامل هجي، جيئن توانائي برقرار رهي.2. پنهنجن جذبن ۽ احساسن جو آزاديءَ سان اظهار ڪريو:
سنجيدگيءَ وارو چهرو رکڻ سان نه ته اوهان دانائيءَ وارا لڳندؤ ۽ نه ئي ڪو فائدو ٿيندو. دل، دماغ، ۽ جسم جون حالتون، احساس، ۽ جذبن جو اظهار کليل نموني ڪريو. اوهان جي چهري ۽ زبان مان دل جي حالت ظاهر ٿيڻ گهرجي اهائي اصل حڪمت عملي آهي. اوهان جا گهر ڀاتي، دوست، ساٿي خوشي ۽ غم ۾ اوهان سان شامل ٿيندا. اوهان کي لڳندو ته اوهان اڪيلا نه آهيو.3. پنهنجي جمالياتي ذوق ۾ واڌارو آڻيو:
پنهنجي انداز، روين، ۽ عملن ۾ جمالياتي حِس کي ظاهر ڪريو. اوهان جي شخصيت، لباس، گهر، آفيس ۽ ماحول مان خوبصورتي ظاهر ٿيڻ گهرجي، جيڪا دل ۽ دماغ کي تروتازو رکندي آهي. نفاست، سادگي، ادب، قرينگي، ۽ سٺي ترتيب سان ماڻهو اوهان کان متاثر ٿيندا. اوهان جي اندر هڪ سڪون ۽ روحن جي خوشي پيدا ٿيندي.4. سيرسفر، ورزش ۽ تفريح کي معمول بڻايو:
صبح جو ورزش ۽ سير، شام جو واڪ ڪرڻ ۽ ڪا تفريح کي روزمره جي معمول ۾ شامل ڪريو. جسماني طور چست، ذهني طور مطمئن ۽ خوش رهندؤ. کاڌو صحيح نموني هضم ٿيندو ۽ سڪون واري ننڊ ايندي. نيون اميدون، تخليقي قوت وڌندي، ۽ مثبت سوچ پيدا ٿيندي.5. تازي هوا ۾ ڊگها ساهه وٺو:
جيئن گاڏي پئٽرول سان هلندي آهي، انسان آڪسيجن سان جيئندو آهي. قدرت اوهان کي آڪسيجن مفت ڏني آهي، هر صبح 15 منٽ کليل فضا ۾ ڊگها ساهه وٺڻ کي عادت بڻايو. ان سان نه فقط تنفس جو نظام ٺيڪ رهندو، پر ذهن تروتازو رهندو. ڏينهن دوران به، جڏهن موقعو ملي، 5 منٽ لاءِ اهو عمل ورجايو.6. چهري تي هميشه مرڪ رکو:
الله اوهان کي بيحد خوبصورتي سان تخليق ڪيو آهي. چهري تي مرڪ رکي اوهان پاڻ کي وڌيڪ پرڪشش بڻائي سگهو ٿا. خالي، بي جان، پريشان چهرو ماڻهن لاءِ ناخوشگوار هوندو آهي. خوش رهڻ، خوشيون ورهائڻ، ۽ مرڪ سان زندگيءَ ۾ سڪون پيدا ٿيندو آهي. شروعاتي قدم طور، گهٽ ۾ گهٽ مصنوعي مرڪ ڪرڻ سکڻ گھرجي، ڪيترائي مسئلا حل ٿي ويندا.