سرڪاري نااهلي سبب سڄي سنڌ ٻڏي رهي آهي، زميندار ڪٽ هڻي غريبن کي ٻوڙين پيا: بشير قريشي حيدرآباد/ڪوٽڙي (نمائندن وٽان) جسقم چيئرمين بشير خان قريشي ڪوٽڙي ۽ مانجهند جي بندن جو دورو ڪيو ۽ ان دوران عملدارن کان آگاهي حاصل ڪئي. بشير خان قريشي ان موقعي تي ميڊيا سان ڳالهائيندي چيو ته حڪومتي نااهلي سبب سڄي سنڌ ٻڏي رهي آهي. وڏيرا ۽ زميندار پنهنجي زمينن کي بچائڻ لاءِ ڪٽ هڻي رهيا آهن، جنهن ڪري عام ماڻهو متاثر پيا ٿين. هوڏانهن جسقم جي جاري ڪيل پريس بيان ۾ بشير خان قريشي، ڊاڪٽر نياز ڪالاڻي، آصف بالادي ۽ ٻين چيو آهي ته حڪومت وٽ ڪنهن رٿابندي نه هئڻ ڪري بوڏ ۾ وڌيڪ نقصان ٿيو آهي. هنن چيو ته شهدادڪوٽ مان زميندارن ۽ ڪارخانيدارن کان لکين رپيا چندو ورتو ويو پر اها رقم درست طريقي سان استعمال نه ٿيڻ ڪري شهدادڪوٽ کي پڻ خطرو ٿي پيو آهي. ٻئي طرف ڪراچيءَ ۾ آيل ٻوڏ متاثر سهولتن کان محروم آهن. جسقم جا ڪارڪن ٻوڏ متاثرن کي حڪمرانن جي رحم ڪرم تي ڇڏڻ بجاءِ انهن جي مدد ڪن. ان سلسلي ۾ بشير خان قريشي، ڊاڪٽر نياز ڪالاڻي، شهدادڪوٽ، رتوديرو ۽ ٻين علائقن جو دورو پڻ ڪيو. ڪراچيءَ ۾ ٻوڏ متاثرن جي مسئلن جي حل لاءِ آصف بالادي، نعيم منڌرو، الاهي بخش بڪڪ، محمد خان شيخ، بشير خاصخيلي تي ٻڌل ڪميٽي ٺاهي آهي ڪيهر انصاري ۽ نجف لغاري پڻ نوابشاهه ۽ ميرپور خاص ۾ رليف ڪئمپن جو دورو ڪيو. (عوامي آواز)
