غلام نبي اُداسي بلوچ

غلام نبي اُداسي بلوچ

​

غلام نبي اُداسي جو جيتوڻيڪ اڄ سنڌي ادب ۾ نالو گمنام آهي پر هو پنهنجي دور جو سٺو شاعر ۽ ٻهڳڻ شخص هو.

سندس جنم ميرن واري دور جي خيرپور رياست جي هڪڙي ننڍڙي ڳوٺ احمد پور لڳ 1916 ع ۾ حاجي يار محمد کوسي جي گهر ۾ ٿيو.

هڪ دفعي خيرپور جي والي مير علي نواز ناز جي شاهي درٻار متل هئي ، هند ۽ سنڌ جا نالي وارا شاعر موجود هئا ۽ ان وقت هندستان کان آيل قوال مصرع کنئي “ محمد مصطفيٰ ڪو حضرت يوسف سي ڪيا نسبت “ اتي هڪ سورنهن سال جي نوجوان اٿي اشارو ڪري قوالي روڪرائي. محفل ۾ سانت ٿي وئي مير صاحب پڇيو ته قوالي ڇو بند ٿي ته کيس ٻڌايو ويو ته هڪ نوجوان اعتراض ڪيو آهي مير صاحب کيس گهرائي پڇيو ته نوجوان گستاخانه ٻولن طرف ڌيان ڇڪايو ته دراصل “محمد مصطفيٰ سي حضرت يوسف ڪو ڪيا نسبت ” چوڻ کپي. مير صاحب پاڻ ادب جا وڏا ڄاڻ هئا سمجهي ويا ۽ هن نوجوان جي سخن شناسي تي کيس داد ۽ انعام ڏنو. اهو نوجوان هيو غلام نبي اُداسي. پاڻ سنڌي سان گڏ اردو شاعري به ڪئي

نهين حالت ذرا مخفي و محتاجِ بيان ميري
سراپا ياس و حسرت بن چڪي هي داستان ميري

وصالِ يار پر اب هجر ڪو ترجيح ديتا هون
جدائي مين هوئي هي آرزو پل ڪر جوان ميري

اُداسي نام هي تو ڦر تمنا شادماني ڪيا
موافق نام ڪي رهتي هي حالت جاودان ميري
​

مٿيون شعر پاڻ هندستان جي شهر آگره ۾ ميڙ اڳيان پڙهي داد حاصل ڪيائون ۽ ان وقت کين 50 رپيه جو انعام بجنور رسالي پاران ڏنو ويو ۽ شعر پڻ رسالي ۾ ڇپيو.

پاڻ قرآن ۽ حديث ۽ فقهي مسئلن جي خوب ڄاڻ رکندا هئا. راڳ جي وڏي خبر هئن. بلند اخلاق ۽ صوفي طبيعت رکندڙ ، بردبار ۽ حليم هئا.

پاڻ 6 جولاء 1963 تي 47 سالن جي عمر ۾ هي دنيا ڇڏيائون. سندن آخري آرامگاه شيخ طيب جي تاريخي قبرستان ڪولاب جيئل لڳ خيرپور ۾ آهي.

سندن ٻئي پٽ والد صاحب جي نقش قدم تي هلندي سنڌي ادب جي خدمت ڪري رهيا آهن. مشهور براڊ ڪاسٽر ۽ شاعر عنايت بلوچ سندن وڏو فرزند ۽ مشهور شاعر هدايت بلوچ سندن ننڍو فرزند آهي