حسام ميمڻ 04/06/2009 آزاد نظم تون چوين ٿي ته تنهجي چپن تي لکان تنهجي ڳاڙهي گلابي وڳن تي لکان چيلهه جي خمَ تي چال رنگين تي ۽ گلابي ڳلن تي ڪيان شاعري تون صحيح ٿي چوين ٺيڪ سوچين پئي قصيدو به ڄڻ ڪوئي ٽانڪ هجي! جيڪو روحن کي راحت ڏئي ٿو ڇڏي جهٽ گهڙيءَ لئه صحيح دردَ ميٽيو ڇڏي! پر او منهجي مٺي! منهنجي پياري مٺي! دل چوي ٿي ته اڄ ڪوئي نوحو لکان مان ڪيان شاعري ديس جي دردَ تي! تو جيان ڪيتريون هِت مِٺيون ٿيون مرن ۽ ابهم بکن تي اجل ٿا وٺن! ڳالهه ننڍڙي هجي ڳالهه وڏڙي هجي روز ڳڀرو مرن ٿا اسانجا مٺي! روز جرڳا ٿين ۽ ٿين فيصلا ملڪ جا پاسبان ڌارين لاءِ ڪيڏا جتن ٿا ڪرن ويٺا نيڍون ڏين ۽ پيا سينڍون ڏين سنڌ سڏڪي پئي هانوَ هيڻي سان جهيڻي ۾ ٿي ڄڻ چوي: ”اڄ ته مون تي به لک!“ ”اڄ ته مون تي به لک!“ منهنجي دل ٿي چوي ديس جي دردَ تي اڄ ڪيان شاعري! ڪجهه ته مان ڀي ڪيان ڪجهه ڪرڻ ڏي مٺي! تون نه دل ۾ ڪجان ديس تي ٿو لکان ديس آهي ته تون مان به آهيون مٺي! ورنه ڇا ٿو بچي هي مُهن جو دڙو ۽ لڪيءَ جا جبلَ يا ڪا ٻي يادگار! جي اٿئي مونسان پيار آءُ زنده رهڻ جي ڪيون گفتگو! آءُ زنده رهڻ جي ڪيون جستجو!!
تمام بهترين شاعري آهي ادا حسام ميمڻ توهان جي اهڙي شيئرنگ جو مون کي ته انتظار رهندو sindhsalamatsaathsal
ادا حسام ميمڻ صاحب حق موجود؛ سڀ کان پهريان ته منهنجي طرفان ڀليڪار قبول ڪندا ... هن فورم جا دوست پڻ تمام سلجهيل ۽ ادبي ذوق رکندڙ آهن ... اميد ته اوهانکي هن فورم تي به پنهنجائپ جو احساس ٿيندو ... اوهانجا نظم انتهائي خوبصورت لفظن سان سنواريل هوندا آهن، جن جو تاثير انسان جي من تي ٿيندو آهي ... هن نظم ۾ پڻ اوهان قومپرستيءَ جي جذبي ۽ اهميت جو اظهار ڪيو آهي سو قابل تعريف ۽ وڻندڙ آهي ... اميدن تي جهان قائم آهي ۽ پاڻ به ان اميد تي ته اوهانجون ٻيون ڪاوشون به پڙهڻ لاءِ ملنديون ... هميشه خوش رهو نثار ابڙو
محترم حسام ميمڻ صاحب اوهان جو آزاد نظم پڙهي تمام خوشي ٿي۔۔۔۔ اميد ته هميشهه اهڙو ساٿ هن سنڌ سلامت تي قائم رکجو۔۔۔۔۔۔۔۔ lajwab-sharing
