[JUSTIFY]دوستو اڄ اسان جي دوست عاشق سولنگي فقيرن ، مستن ، درويشن ، عاشقن ۽ جادوگرن کي سڃاڻڻ ۽ ڳولهڻ وارو هڪ مذاڪي ونڊ ڪيو۔ جنهن جي ڪمينٽس ۾ مون شيخ اياز جي شاعري ونڊ ڪئي ۔ ميلي ۾ تُون تنها تنها، ڪنهن کي ڳولين ٿو؟ جواب ۾ سائين نثار ابڙو جن چيو ته مان شيخ اياز سان انصاف ناهي ڪيو ۔۔۔ ڇو ته هي ڪلام سوني ڌاڳي ۾ پوئڻ جهڙو آهي۔[/JUSTIFY] سائين نثار جي ڳاله وڻي سو دوستن سان شيخ اياز جي ساڳي شاعري ونڊ پيو ڪيان۔ ٿي سگهي ٿو هي شاعري جيڪا بي بها شاعري آهي ، جنهن جي ڪهڙي تعريف ڪجي ... شايد اڳ به ونڊ ٿيل هجي پر سائين نثار ابڙي صاحب جي خواهش تي هتي ونڊ پيو ڪريان : ميلي ۾ تُون تنها تنها، ڪنهن کي ڳولين ٿو؟ اک ۾ ڳوڙها، هٿ ۾ گجرا، ڪنهن کي ڳولين ٿو؟ سَر سوتيءَ جي مندر ڀرسان بيٺو واجھائين، ڪنهن لئه ترسي تنهنجي وِينا، ڪنهن کي ڳولين ٿو؟ تُنهنجون اکڙيون پو به اُڃايون، تَل تَرايون سَوَ، هرڻيءَ جھڙا منهنجا هِردا، ڪنهن کي ڳولين ٿو؟ سانجھيءَ ٽاڻي ڪارا ڪڻڇي آکيري آيا، پرڙا کولي پيار ـــــ پکيئڙا، ڪنهن کي ڳولين ٿو؟ ساري جيون مايا سپنو، تنهن ۾ سَوَ سپنا، او سپنا، سپني جا سپنا! ڪنهن کي ڳولين ٿو؟ پير پَٽيءَ تي ناهي تُنهنجو، ڪهڙو تنهنجو ماڳ؟ رستي مان نڪتا سَوَ رستا، ڪنهن کي ڳولين ٿو؟ او رکوالا! کوٽين ڇو ٿو هيءَ جيون جي رکَ، آڻي اگنيءَ جھڙي آشا، ڪنهن کي ڳولين ٿو؟ اونهاري جو سِجُ ته ناهي، آهه ازل جي اکَ، هاءِ، ڇڏي ڇَنَ جا ڇانورڙا، ڪنهن کي ڳولين ٿو؟ دانهون ٿو درياهُه ڪري، ٻُڌ ڪُن ڪُن جا ڪڙڪا، ٻيڙيءَ ٻيڙيءَ ۾ او ٻوڙا! ڪنهن کي ڳولين ٿو؟ ڪاري رات، ڪَتيءَ ڏي ڪَرڪِي، ڪائي ڪُونج اُڏي، پيارا تُون به تڪيندي تارا، ڪنهن کي ڳولين ٿو؟ وَسندو رهندو آهي تو وٽ، سانَوَڻ ساري رات، ڳوڙها ڳوڙها نيڻ نماڻا! ڪنهن کي ڳولين ٿو؟ ڪوبه نه ايندو ، ڪوبه نه ايندو، ڪوبه نه تُنهنجي دُوار! بند ڪري ڇڏ هي دروازا، ڪنهن کي ڳولين ٿو؟ اَڻ ٿيڻيءَ کي چاهين، تنهنجي ٿِڻيءَ سان نه پَوي، ڏِس ٿيڻيءَ جا ٿوڻيون ٿنڀا! ڪنهن کي ڳولين ٿو؟ هي مَٿرا جا مندر، سانجھيءَ ويلي جمنا گھاٽَ، مَنَ ۾ سِنڌوءَ جا سَوَ سپنا، ڪنهنن کي ڳولين ٿو؟ برندا بَن ۾ آيو آهين، ڪنهن جي لاءِ ڪَوي، ڪنهن جي بنسي! ڪهڙي راڌا؟ ڪنهن کي ڳولين ٿو؟ شايد تُون ئي پاڳل پُري پاڳل خاني ۾ ــــــ پاڳل گڏجي توتي کِلندا! ڪنهن کي ڳولين ٿو؟ هارُ هندوري ۾ ڪيرايو، جيڪو مُنڌَ مُئيءَ، موتي موتي ٿي ويو پيارا! ڪنهن کي ڳولين ٿو؟ خاڪ اُڏاڻي، ڪاڪ ڪري پئي، پوئين پهر ’اياز‘! ڪهڙي مُومل منهنجا راڻا! ڪنهن کي ڳولين ٿو؟
جواب: ميلي ۾ تُون تنها تنها، ڪنهن کي ڳولين ٿو؟ ادا سليمان سائين نثار واري ڳاله مون کي به 100 فيصد سچ لڳي ۽ دل سان لڳي اهڙي غضب جي شاعري ڪنهن ڌاڳي ۾ ۔ ۔ ۔ ۔ ۔۔ ۔ ادا تمام بهترين شاعري ونڊ ڪرڻ جي مهربياني سچ پڇو ته جلدي هوندي ته مان پوري پڙهي ۽ بس ٿڌو ساه ڀريو ۽ سوچيم ته نه جهونا تهنجي لاء هي شاعري نه آهي ۔۔۔۔۔۔
جواب: ميلي ۾ تُون تنها تنها، ڪنهن کي ڳولين ٿو؟ واه واه تمام بهترين شاعري ۽ بي بها ڊزائين۔۔۔ مهربانيون۔۔۔
جواب: ميلي ۾ تُون تنها تنها، ڪنهن کي ڳولين ٿو؟ تُنهنجون اکڙيون پو به اُڃايون، تَل تَرايون سَوَ، هرڻيءَ جھڙا منهنجا هِردا، ڪنهن کي ڳولين ٿو؟ پير پَٽيءَ تي ناهي تُنهنجو، ڪهڙو تنهنجو ماڳ؟ رستي مان نڪتا سَوَ رستا، ڪنهن کي ڳولين ٿو؟ ڪاري رات، ڪَتيءَ ڏي ڪَرڪِي، ڪائي ڪُونج اُڏي، پيارا تُون به تڪيندي تارا، ڪنهن کي ڳولين ٿو؟ اَڻ ٿيڻيءَ کي چاهين، تنهنجي ٿِڻيءَ سان نه پَوي، ڏِس ٿيڻيءَ جا ٿوڻيون ٿنڀا! ڪنهن کي ڳولين ٿو؟ ادا لاجواب ؛ اد ابهترين شاعري ونڊ ڪئي اٿو ادا اڄڪلهه ادو طاهر ميدان ۾ ڪون آهي ان ڪري سوچيم ته ڪجهه استاد جو ونڊ سيئر ڪجي نه ته اسان جو دوست دل جو مريض آهي۔۔۔۔۔۔۔۔۔ ڪجهه ٿي نه پويس کلي فضا ۾ ملهي ملياسين زمين جهومي پئي بخاري، ائين لڳو ٿي ازل ، ابد جو حسين جهولو جهليو هيو۔
جواب: ميلي ۾ تُون تنها تنها، ڪنهن کي ڳولين ٿو؟ شاعري جي ڀلي چونڊ ۔ شيخ اياز سنڌ جو ڀلوڙ ساعر سندس هيء شاعري تمام بهترين وَسندو رهندو آهي تو وٽ، سانَوَڻ ساري رات، ڳوڙها ڳوڙها نيڻ نماڻا! ڪنهن کي ڳولين ٿو؟ ڪوبه نه ايندو ، ڪوبه نه ايندو، ڪوبه نه تُنهنجي دُوار! بند ڪري ڇڏ هي دروازا، ڪنهن کي ڳولين ٿو؟
جواب: ميلي ۾ تُون تنها تنها، ڪنهن کي ڳولين ٿو؟ ادا لا جواب ايتري خوبصورت شاعري پڙهي هڪدم ٿڌڙي هير وانگر محسوس ٿيو۔فخر ٿو محسوس ٿئي پنهنجي هن مٺڙي ٻوليء تي۔
جواب: ميلي ۾ تُون تنها تنها، ڪنهن کي ڳولين ٿو؟ ادا عرس مهرباني زبردست شاعري ونڊ ڪئي آهي اوهان استاد جي۔ ادو طاهر ڳوٺ ويل آهي فون ڪري چئينس ته ڀلي پڙهي ۔ باقي چيائين ته جڏهن ڪراچيء ۾ هجان ته پارت ٿي استاد جي شاعري ونڊ نه ڪجان۔۔۔۔
جواب: ميلي ۾ تُون تنها تنها، ڪنهن کي ڳولين ٿو؟ [justify]ساري جيون مايـــا سپنــــو، تنهن ۾ سَـــوَ سپنـــا، او سپنا، سپني جا سپنا! ڪنهن کي ڳولين ٿو؟ وجودن جي ڳولها جي هن سهڻي فلسفي تي سوير جڏهن نظر پئي ته ڪيترائي ڀيرا پڙهي به وري پڙهڻ تي دل پئي چيو ۽ پوءِ به پڙهندو رهيو آهيان، هر دفعي هر لفظ مان هڪ نئين معنا ۽ هڪ نئين وجود جي خبر پوي ٿي ۔۔۔ جيتوڻيڪ ڊگهو نظم آهي پر تنهن هوندي به پڙهڻ ۾ خبر ئي نٿي پوي ۔۔۔ ڪمال جا لفظ، جادوئي تاثر، سهڻو فڪر ۽ اوچا خيال ملائي هي ڪلام لکي محترم شيخ اياز پنهنجي اعلا ڏاهپ ۽ شاعريءَ جي معراج کي وڃي هٿ لاتو آهي ۔۔۔ سلام سنڌ جا شاعر ۔۔۔ باغن ۽ بهارن جا مالڪ شاعر ۔۔۔ سلام لک ٿورا سهڻا دوست وساڻ جو اوهان منهنجي عرض کي مان ڏنو ۔۔۔۔ دوست سڏائي سڀڪو جاني زباني، ٿئي آساني ڪم پوي ته ڪل پوي ۔۔۔ ٿورا ناهن ٿورا مونتي ماروئڙن جا ۔۔۔ سنڌ سلامت ساٿ سلامت[/justify]
جواب: ميلي ۾ تُون تنها تنها، ڪنهن کي ڳولين ٿو؟ [justify] جاني محمد سليمان وساڻ نثار ابڙو جي چواڻي سئو فيصد درست آهي ته جيڏو وڏو ڌرتي جيڏو شاعر شيخ اياز آهي، جيڏي وڏي آسمان جيڏي سندس بي بها ڏات آهي ڪير به شيخ اياز جي ڪويتائن تي ڳالهائي يا لکي ڪوبه انصاف نٿو ڪري سگهي، اسان انصاف ته ڪري ئي ڪونه ٿا سگهون پر شيخ اياز ۽ سندس شاعري سان عقيدت جو اظهار ڪري سگهون ٿا ۽ شيخ اياز جون مهان ڪويتائون ونڊ ڪري سگهون ٿا، ادا سليمان سائين شيخ اياز جو هي غزل ميلي ۾ تنها تنها تون ڪنهن کي ڳولين ٿو، اک ۾ ڳوڙها هٿ ۾ گجرا تون ڪنهن کي ڳولين ٿو، جي چترڪاري الائي ڇو هيل پنهنجا رنگ اجرڪ جي رنگن ۽ اُن جي ڦلڙين وانگر نکري ڪونه سگهيا، شايد ادا سليمان چترڪاري واري رنگ ۾ يڪسانيت ، مطلب هڪجهڙائي واري واٽ تي هلندي شيخ جي هن زبردست غزل کي اسان سان ونڊ ڪيو آهي، ڪنهن به تخليق ڪار چاهي اهو شاعر هُجي ، مصور هُجي، يا کڻي ڪمپيوٽر جو چترڪار هُجي يڪسانيت کان پنهنجو دامن آجو ڪرائي ته انهي تخليق ڪار جو فن نکري نروار ٿيندو آهي بلڪل ائين جو ان تخليق ڪار جي نواڻ جو عام ڏسندڙ انتظار ڪري ته خبر ناهي وقت جو تخليق ڪار ڪهڙا نوان رنگ اسان سان ونڊ ڪندو، ڪمپيوٽر جي بارڊر واري چترڪاري ادا سليمان جي ڪافي ڀيرا بار بار ڏٺي آهي، شيخ اياز جي خوبصورت شاعري انسانن جي دلين کان وٺي روحن تائين پرواز ڪندي آهي انهي شاعري کي بارڊر جي ٻنڌڻن ۾ قيد ڪري نٿو سگهجي ان کان علاوه ادا سليمان ڪمپيوٽر جي چترڪاري ۾ پاور پوائنٽ جي هڪڙي فارميٽ ”گلو“ جو تمام گهڻو استعمال ڪندو آهين ڪمپيوٽر جي فارميٽ گلو جو استعمال ڪر پر تڏهن جڏهن تصوير جي پچ صفا گهري هُجي، ان تي ڪنٽراسٽ وارا اکر به تمام گهرا هُجن انهن گهرن اکرن کي گلو واري فارميٽ نکاريندي آهي، پر شيخ اياز جي هن پياري غزل ۾ سفيد رنگ جي اکرن کي سليٽي رنگ ۾ توهان گلو واري فارميٽ ڏني آهي اها ان ڪري نکري ڪونه سگهي جو توهان جي بارڊر واري گرائونڊ جي پڇ ٽن مختلف ڪلرن واري آهي 1۔ سليٽي رنگ، 2 نارنگي رنگ 3۔ ڪارو رنگ هاڻي صروف ٿورو محنت ڪري انهن ٽنهي مختلف ڪلرن جي مخالف رنگ ڪنٽراسٽ ۾ لکي انهن تي گلو واري فارميٽ ۾ ڪنٽراسٽ واري چترڪاري ڪرين ها ته اصل پنج سئو پنجاهه چنڊ توهان جي هن چترڪاري ۾ لڳي وڃن ها، ۽ نثار ابڙو جي ڳالهه ته شيخ اياز جي شاعري ته سونن اکرن سان لکڻ جهڙي آهي واري ڳالهه به پوري ٿِي وڃي ها۔ ان هوندي به توکي جس هُجي جو شيخ اياز جي شاعري کي اسان سيکڙاٽ ۽ ٽي درجي وارن شاعرن سميت ساري دنيا جي سنڌين سان ونڊ ڪرين ٿو اسان جا جهور پوڙها جذبا جوان ڪرين ٿو ڪنهن حڪيم جي معجون وانگيان ۔ مهرباني ادا۔[/justify]
جواب: ميلي ۾ تُون تنها تنها، ڪنهن کي ڳولين ٿو؟ سائين نثار سلام بلڪل اوهان جي ڳاله سان سو فيصد متفق آهيان ته محترم شيخ اياز جي هيء شاعري به شاعريء جي معراج تي پهتل آهي۔ لفظ وري انهن تي سوچبو ته هر شعر مان پنهنجي الڳ ڪهاڻي پئي جنم وٺي۔ اوهان جا ٿورا جو مونکي هيء شاعري الڳ ڌاڳي ۾ ونڊڻ جي صلاح ڏني
جواب: ميلي ۾ تُون تنها تنها، ڪنهن کي ڳولين ٿو؟ سائين نثار ناز سلام لک قرب اوهان اسان جي رهبري پيا ڪيو۔ شاعري ايڏي وڏي هئي جو هڪ اسڪرين تي ڏکيائيء سان پي ماپي ، وري شاعري ايڏي سٺي جو ڪو شعر گهٽ ڪرڻ لاء دل آماده ئي ڪونه پي ٿي۔ تنهن ڪري فونٽ به ننڍڙا رکڻا پيا۔ پر منهنجو مقصد شاعر جو پيغام پهچائڻ هو ، دوستن تائين اياز جا قيمتي لفظ پهچائڻا هئا۔ اسان جهڙن سيکڙاٽن جي رهبري ڪرڻ تي مان اوهان جو ۽ سائين نثار ابڙي جو شڪر گذار آهيا۔ اوهان جي راء اکين تي انشاء الله ايندڙ ڪم ۾ اوهان جي ڏسيل ٽپس تي ڪم ڪري پنج سو پنجاه چنڊ لڳائينداسون۔ ٿورا ناهن ٿورا ۔۔۔۔۔۔۔۔۔۔۔ سنڌ سلامت ساٿ سلامت
جواب: ميلي ۾ تُون تنها تنها، ڪنهن کي ڳولين ٿو؟ ادا علي علي مهرباني اياز جي شاعريء جي ڪهڙي ڳالھ ڪجي ۔ خبر ناهي هن مان جهونن لاء ڪجه ڇو ڪونه آهي ؟؟؟ ڏک گھوري مون سک ورتا ھا، ڪنھن پياري جا، جڳ ساري جا پڇ ئي نه ”اياز“ اِھي ڏکڙا، گذري به وئي گذري به وئي
جواب: ميلي ۾ تُون تنها تنها، ڪنهن کي ڳولين ٿو؟ ادا سليمان شيخ اياز جي شاعري جي ڪهڙي تعريف ڪجي۔۔۔شيخ صاحب جي شاعري ڪنهن به تعرف جي محتاج نه آهي۔۔۔۔پر اوهان جي چونڊ ۽ ڊزائين کي مون جو سلام۔۔۔تمام بهترين ادا۔۔۔
