ڪراچي (رپورٽر ) روزاني عوامي آواز جو مئنيجنگ ايڊيٽر ۽ کاٻي ڌر جو اڳوڻو سرگرم اڳواڻ ڊاڪٽر خير محمد جوڻو گذريل رات 22 آگسٽ 2017 تي عوامي آواز جي آفيس ۾ دل جو دورو پوڻ سبب 63 ورهين جي ڄمار ۾ لاڏاڻو ڪري ويو. ڊاڪٽر خير محمد جوڻو، ڪامريڊ ڄام ساقي، شهيد نظير عباسي، احمد خان جمالي ۽ عوامي آواز ميڊيا گروپ جي سرواڻ ڊاڪٽر جبار خٽڪ سان کاٻي ڌر جي سياست ۽ ايس اين ايس ايف ۾ سرگرم رهيو. هِن ايم بي بي ايس ڪرڻ کان پوءِ وڏو عرصو لبيا ۾ نوڪري ڪئي. وطن واپس ورڻ بعد پنهنجي سياسي دوست ڊاڪٽرجبار خٽڪ سان روزاني عوامي آواز اخبار يدار ٿيو. ۽ آخري دم تائين عوامي آواز ميڊيا گروپ سان جُڙيل رهيو. 20 سالن تائين اخبار جي نگراني ڪندو رهيو.ڊاڪٽر خير محمد جوڻو جي اڄ قاضي احمد لڳ ڳوٺ مير محمد جوڻو ۾ شام 4 وڳي جنازي نماز ادا ڪئي ويندي. جنهن بعد سندس مڙهه اباڻي ڳوٺ ۾ ئي مٽي ماءُ حوالي ڪيو ويندو. عوامي آواز ميڊيا گروپ جو سٿ، مٽ ۽ مائٽ آخري رسمن ۾ شرڪت ڪندا. حيدرآباد جا صحافي اقبال ملاح سکر مان جاويد ميمڻ ۽ ٻيا پڻ شرڪت ڪندا. ياد رهي ته ڊاڪٽر خير محمد جوڻو پنهنجي علائقي جو آبادگار پڻ هو ۽ سماجي سرگرمين ۽ غريب ماڻهن جي مدد ڪرڻ جي حوالي سان پوري ضلعي ۾ مشهور هو.
