فهيم فدا شورو

مختصر تعارف
فهيم فدا شورو سنڌي ٻولي جي نئين ٽهي جو اديب، شاعر ۽ ڪيترن ئي ڪتابن جو ليکڪ آهي. سندس شمار مسڻ وڏي ٽنڊي الهيار جي مشهور ليکڪن ۾ ٿئي ٿو. سندس ولادت 8 جون 1988ع ڌاري مسڻ وڏي ۾ مشهور عالم دين، خطيب، شاعر ۽ اديب مولانا محمد يامين شورو ”خادم سنڌي“ جي گهر ۾ ٿي. فهيم فدا شورو پوسٽ گريجوئيٽ هئڻ سان گڏ فارسي ۽ عربي ٻولي جو ڄاڻو آهي. کيس پنهنجي صلاحيتن ۽ قابليتن جي ڪري مسڻ وڏي ۽ ضلع ٽنڊي الهيار جي علمي حلقن ۾ اهم مقام حاصل آهي. فهيم فدا شوري آگسٽ 2009ع ۾ ڳوٺاڻي ليول تي هڪ ادبي، سماجي، فلاحي ۽ اصلاحي ادارو انجمن مشعل راهه قائم ڪري مسڻ وڏي ۽ ڀرپاسي جي نوجوانن ۾ هڪ نئون روح ڦوڪيو. کيس اتفاق راءِ سان انجمن مشعل راهه جي پهرين مرڪزي ڪابينا ۾ چيئرمين جي منصب لاءِ اهل سمجهي چيئرمين چونڊيو ويو. اڄ ڪلهه کيس انجمن مشعل راهه جي باني ۽ قائد جي حيثيت سان پوري تر ۾ سڃاتو وڃي ٿو. موصوف هن وقت تعليم کاتي ۾ ٽيچر آهي، سندس پوسٽنگ گورنمينٽ اسڪول ڪامارو شريف ۾ آهي. سنڌي ادب ۾ مسڻ وڏي جي موجوده تاريخ تي سندس ترتيب ڏنل ڪتاب ”پکا ۽ پنهوار“ سندس ئي قائم ڪيل اداري انجمن مشعل راهه طرفان ڇپرايو ويو آهي، جنهن جي مهورت لاڙ جي سچل ۽ انقلابي شاعر حافظ محمد نظاماڻي ڪئي.