اسلام آباد (م ڊ): جڊيشل ڪميشن سپريم ڪورٽ ۾ ٻن ايڊهاڪ ججن جسٽس خليل الرحمان رمدي ۽ جسٽس رحمت حسين جعفري جي مقرري جو معاملو ملتوي ڪري ڇڏيو، جڏهن ته سنڌ هاءِ ڪورٽ جي 9 مان 6 ايڊيشنل ججن جي ملازمت جي مدت ۾ واڌ جي منظوري ڏئي ڇڏي آهي ۽ 3 ججن جا نالا ڊراپ ڪيا ويا، جن ۾ هادي کوسو، زاهد حامد ۽ ذاڪر شيخ شامل آهن. سنڌ هاءِ ڪورٽ جي ججن امام بخش بلوچ، نثار محمد شيخ، محمد تسنيم، حسن اظهر رضوي، محمد علي مظهر ۽ سلمان حامد جي ملازمت جي مدت وڌائي وئي. سندن حتمي منظوري لاءِ لسٽ پارلياماني ڪميٽي کي موڪلي ويندي. جديشل ڪميشن جو اجلاس چيف جسٽس افتخار محمد چوڌري جي صدارت ۾ ٿيو، جنهن ۾ قانون وارو وزير بابر اعواڻ، 4 جج ۽ ٻيا شريڪ ٿيا. اجلاس ۾ 6 ججن جي ملازمت ۾ واڌ جي منطوري ڏني وئي. ذريعن موجب قانون واري وفاقي وزير بابر اعواڻ، اٽارني جنرل ۽ پاڪستان بار جي نمائندي ايڊهاڪ ازم جي مخالفت ڪئي ۽ ايڊهاڪ ججن جي مقرري کي قانون ۽ ضابطن جي خلاف قرار ڏنو، جنهن ڪري جسٽس خليل الرحمان رمدي ۽ جسٽس رحمت حسين جعفري جي مقرري جو معاملو معطل ڪيو ويو. هوڏانهن جسٽس (ر) خليل الرحمان رمدي جو چوڻ هو ته ايڊهاڪ جج طور مقرري لاءِ هن کان نه پڇيو ويو، جيڪڏهن پڇيو ويو ته ڳالهائيندس. هن چيو ته في الحال هو ان معاملي تي نه ڳالهائيندو. هوڏانهن سپريم ڪورٽ بار جي صدر عاصمه جهانگير ايڊهاڪ طور ججن جي مقرري نه ڪرڻ جي آجيان ڪندي چيو آهي ته جڊيشل ڪميشن بهتر فيصلو ڪيو آهي. هن ميڊيا سان ڳالهائيندي وڌيڪ چيو ته الجهاد ڪيس مان واضح آهي ته ايڊهاڪ جج نه هوندا آهن. هن چيو ته بار ۽ بئنچ هڪ جهاز جا سوار آهن. گڏجي مسئلا به حل ڪيا ويندا.
