تمام خوبصورت آهي۔دوستو اسلام عليڪم
سنڌ سلامت پنهنجي وجود ۾ اچڻ کان وٺي ئي پنهنجي مادري ٻولي سنڌي ۽ سنڌ ثقافت کي دنيا تائين پهچائڻ ۾ سرگردان آهي۔۔۔ پنهنجي جاکوڙ ۾ سمورن ساٿين جي دلچسپي خاطر مختلف پروجيڪٽس کي وقت سر پيش ڪيو ويندو رهيو آهي۔۔۔
دوستو سنڌ سلامت ڪيلينڊر پروجيڪٽ ذريعي اسان جي هر ممڪن ڪوشش هوندي آهي ته سنڌي ثقافت سان سينگاريل سنڌ سلامت ڪيلينڊر نه رڳو توهان جي گهر، اوطاق، دڪان ۽ آفيس جي زينت بڻجي به ان ڪيلينڊر ذريعي هڪ اهڙو پيغام به سڄاڻ ڌرين تائين پهتو ڪجي جيڪو وقت جي لاهن چاڙهن ڪري سڀ کان وسريو وڃي۔۔ ان سلسلي ۾ سڀ کان پهريون 2010 ۾ هڪ خوبصورت ڪيلينڊر پبلش ڪرائي مختلف تعليمي ادارن ۽ سنڌي ادب جي خدمت ڪندڙن تائين پهچايو ويو جنهن ۾ خوبصورتي سان گڏو گڏ سنڌ امڙ جي سڃاڻپ ۽ امر شخصيتن جي ڄمڻ ۽ وفات جي تاريخن کي ياد ڪري کين ڀيٽا ڏني وئي۔۔۔
هن ڪيلينڊر تي ڀرپور محنت ۽ هڙان وڙان خرچ ڪرڻ کان پوءِ هر جاءِ تائين پهتو ڪرڻ ڪافي ڏکيو ثابت ٿيو۔۔ ۽ 2011 پروجيڪٽ تي شايد تجربي جي بنياد تي همت نه ٿئي ها پر دوستن ّخاص طور ادا سليمان جي اسرار هڪ دفعو ٻيهر حوصلو ڏنو ۔۔ ۽ سنڌ سلامت ڪيلينڊر 2011 جي ڇپائي پڻ مڪمل ڪئي وئي۔۔
شايد ٻيو دفعو هٿ وجهڻ کانپوءِ هن پروجيڪٽ کي مڪمل ختم سمجهجي ها۔۔ پر سلام آهي ڪجهه ساٿين کي جن سلسلي کي جاري رکڻ جو عهد ڪيو ۽ پوئتي هٽڻ جي منهنجي ڪوشش کي روڪي وڌو۔۔
محترم سليمان وساڻ جي ڪوشش سان سنڌ سلامت کي ايتري فنڊنگ ملي سگهي جو ان ۾ ڪجهه پنهنجي پلئه مان وجهي سنڌ سلامت ڪيلنڊر سلسلي جي 2012 واري ڪڙي جوڙي سگهجي پئي۔۔۔ پر جيئن ته فنڊنگ محدود آهي ان ڪري وري وري خيال ٿي آيو ته هن کي وڃائڻ بجاءِ درست جاءِ تي خرچ ڪجي۔۔ وري جڏهن ڪيلينڊر پروجيڪٽ کان سواءِ ٻين پروجيڪٽن کي ڏٺم ته هر پروجيڪٽ موجوده فنڊنگ کان وڌيڪ لڳو۔۔
آخر فنانشل ڪميٽي (محترم سائين نثار ابڙو، سليمان وساڻ ۽ سائين غلام مصطفى) جن جي مشوري کان پوءِ سنڌ سلامت ڪيلينڊر 2012 تيار ڪرائڻ جو فيصلو ڪيو ويو۔۔
گذريل ٻن سالن ۾ سنڌ سلامت جي ڪيلينڊرز ۾ سنڌ امڙ جي نمائنده ۽ امر شخصيتن کي خراجِ تحسين پيش ڪرڻ کان پوءِ هن سال سنڌ ڌرتي جي ڪجهه مختلف پهلوئن کي سامهون آڻڻ جو سوچيو ويو۔۔۔
گذريل ٻن سالن جي سونامي نما ٻوڏن سموري سنڌ ۽ مسڪين سنڌين کي لوڏي وڌو آهي۔۔ اهي سنڌي جيڪي سڪل درياء کي ڏسي آبديده نظرن سان ٿڌا ساهه کڻندا هئا سي بلڪل مايوس ٿي چڪا هئا۔۔ ڪنهن جي وهم و گمان به نه هو ته سنڌ جي سينڌ سنڌو جيڪو دشمنن جي وارن ڪري ڪمزور ۽ پوڙهو ٿو نظر اچي ٻيهر جواني ماڻيندو۔۔ پر گذريل ٻن سالن ۾ اهو ثابت ٿي چڪو ته مايوسي ڪفر آهي۔۔ جتي سنڌو جوڀن ڏيکاري مايوس ۽ سڪل چهرن تي مسڪراهٽو وکيريون اتي سندس جوڀن جي سٽ سهڻ جو حوصلو پڻ وس ۾ نه رهيو۔۔۔ رهي سهي ڪسر مسلسل بارشن پوري ڪري ڇڏي۔۔۔
سنڌ سان پيش ايندڙ اهڙي صورتحال ڏسندڙ جا به هانوءَ ڏڪائي ڇڏيا۔۔۔ جنهن کان پوءِ هن دفعي سهڻي سنڌ جي گذريل ٻن سالن جي تباهه ڪار ٻوڏن ذريعي ايندڙ نقصان کي هاءِ لائيٽ ڪرڻ جو خيال ذهن ۾ آيو ۔۔ جنهن کانپوءِ مون محترم ابوزين ۽ محترم ابو واصف جن سان سنڌ سلامت ڪيلينڊر 2012 تي تفصيلي ڳالهايو۔۔ منهنجي ٻڌايل خاڪي کي پنهنجي خداد صلاحيتن سان ادا ابو واصف تصويري روپ آندو۔۔۔
هاڻي تڪڙو ڪيلينڊر جي سائيز ۽ لاڳت کي طئي ڪندي پروجيڪٽ کي پرنٽنگ پريس تائين پهچائڻ لاءِ سنڌ سلامت جي رڪن ۽ پرنٽنگ پريس جي بهترين معلومات رکندڙ محترم جاويد قاضي جن جي حوالي ڪيو ويو ۽ ادا سليمان کي سار سنڀال لاءِ چيو۔۔۔ پروجيڪٽ جلدي مڪمل ٿي وڃي ها پر ادا سليمان جي والد صاحب جي اچانڪ رهلت ڪم کي روڪي وڌو ۔۔۔ پر حالتن جي بهتر ٿيندي ئي ڪم کي ٻيهر عمل ۾ آندو ويو ۽ گذريل ڪيلينڊرز جي مقابلي هن دفعي سنڌ سلامت ڪيلينڊر 2012 وقت سر مڪمل ڪيو ويو۔۔۔۔۔۔
ان موقعي تي مان پنهنجي پوري ٽيم سميت انتهائي شڪر گذار آهيان پنهنجي محسن دوستن محترم ابوواصف (جن پنهنجي بي انتها مصروفيت باوجود سنڌ سلامت جي فرمائيش کي مان ڏيندي هڪ دفعو ٻيهر هي محنت طلب ڪم مڪمل ڪيو)، محترم ابوزين (جن پنهنجي گهري نظر سان ڪيلينڊر جي غلطين کي درست ڪيو)، محترم رحيم بخش ڏاهري (جن وقت ڪڍي ڪيلينڊر تي نظر گهمائي ۽ غلطين جي نشاندهي ڪئي۔۔۔)، محترم سليمان وساڻ (جن جي ڪوششن ۽ لڳاتار رابطن ذريعي هي پروجيڪٽ مڪمل ٿيو۔۔)، محترم نثار ابڙو ۽ محترم عرس پريو (جن جي مسلسل همٿائڻ۔۔۔) ۽ انهن سمورن دوستن جو جن بار بار فون ڪري ڪيلينڊر بابت پنهنجا رايا ڏنا ۽ سال 2012 لاءِ ڪيلينڊر جي اشاعت بابت زور ڀريو۔۔۔۔
گذريل ڪيلينڊر جي مقابلي هن دفعي ڪيلينڊر جي سائيز ۾ معمولي گهٽتائي آندي وئي آهي جنهن کي ڪارڊنما پيپر بجاءِ هڪ جاذبِ نظر پني تي آندو ويو آهي۔۔ جنهن ڪري هن دفعي به ڪيلينڊر پنهنجي پورن رنگن ۽ بي انتها خوبصورتي باوجود ۽ ڪاڳر جي قيمت ۾ بي حد اضافي باوجود ساڳي قيمت يعني صرف 15 روپين ۾ جڙي تيار ٿيو آهي۔۔۔۔
دوستن کي درخواست آهي سنڌ جي ثقافتي ورثي، سنڌ سان ٿيندڙ گذريل ٻن سالن جي تباهه ڪارين کي وڌيڪ وائکو ڪندڙ ۽ خوبصورت رنگن ۽ سنڌي ٻولي جي لکائي جي حامل هن ڪيلينڊر کي مختلف تعليمي ادارن تائين پهچائين ۽ پنهنجي دوستن، احبابن، استادن ۽ شاگردن ۾ تحفي طور تقسيم ڪن ته جئين سنڌ، سنڌ جي ثقافت، سنڌي ٻولي جي خدمت سان گڏو گڏ سنڌ سلامت فورم جي تشريح کي به عام ڪري سگهجي۔۔۔۔
ان سلسلي ۾ پهريون قدم اڳتي وڌائيندي منتظمِ اعلى طور 100 ڪيلينڊر خريد ڪري مختلف تعليمي ادارن ۽ لائبريرن سميت پنهنجي دوستن ۾ تقسيم ڪرڻ جو وچن ڪريان ٿو۔۔۔ ۽ توهان دوستن مان به اهڙي اميد ڪريان ٿو۔۔۔
نوٽ ؛ ڪيلينڊر حاصل ڪرڻ لاءِ مهرباني فرمائي سنڌ سلامت ڪيلينڊر 2012 جي پروجيڪٽ انچارج محترم سليمان وساڻ سان رابطي ۾ اچو۔۔۔
سنڌ سلامت ڪيلينڊر 2012
