قومپرست اڳواڻ ۽ جسقم چيئرمين بشير خان قريشي دل جي دوري سبب لاڏاڻو ڪري وي
حيدرآباد (اسٽاف رپورٽر) جديد قومپرست سياست جي حوالي سان سنڌ جو هڪ قدآور سياسي اڳواڻ ۽ جسقم جو چيئرمين بشير خان قريشي رات دير سان سڪرنڊ ويجهو دل جو دورو پوڻ سبب لاڏاڻو ڪري ويو، بشير خان قريشي خيرپور ۾ اڳوڻي قومپرست اڳواڻ مجتبيٰ شاهه راشدي جي ورسي تقريب ۾ شرڪت لاءِ وڃي رهيو هو ته دڙي مگسي ڀرسان سندس بلڊ پريشر گهٽجي ويو، کيس ويجهي اسپتال نيو ويو جتي ڊاڪٽرن ٻڌايو ته سندس دم ڌڻي حوالي ٿي چڪو آهي، بشير خان قريشي جنهن پنهنجي سڄي زندگي قومپرستي جي حوالي سان وڏي جدوجهد ۾ گذاري ۽ زندگي جو ڪيترو ئي عرصو جيلن ۾ گذاريو، تنهن جي اوچتي لاڏاڻي سبب سڄي سنڌ ۾ سوڳ جي لهر ڇانئجي وئي آهي، بشير خان جي لاڏاڻي جي خبر ملڻ شرط سندس سوين ڪارڪن سڪرنڊ لڳ اسپتال پهچي ويا، جيڪي اوڇگارون ڏئي روئي رهيا هئا،جڏهن ته سندس ٻيا پارٽي اڳواڻ ۽ ساٿي سندس ڪراچي ۽ رتيديري واري رهائشگاهن تي پهچي رهيا هئا، بشير خان قريشي سنڌ جي عظيم قومپرست اڳواڻ سائين جي ايم سيد جو وڏو عقيدتمند ۽ عاشق هو ۽ هن پنهنجي زندگي سيد جي فڪر جي ڦهلاءَ ۾ گذاري ڇڏي، بشير خان قريشي 10 آگسٽ 1959ع ۾ پيدا ٿيو، هن 1976ع کان سياست جي شروعات ڪئي ۽ پهرين جساف جو ڪارڪن ۽ بعد ۾ جساف جو مرڪزي اڳواڻ پڻ چونڊيو ويو، بشير خان قريشي کي 1996ع جسقم جو سيڪريٽري جنرل چونڊيو ويو ۽ بعد ۾ جسقم جو چيئرمين ٿيو ۽ آخري وقت تائين ان عهدي تي رهيو، بشير خان قريشي پنهنجي پويان هڪ گهرواري، 4 پٽ ۽ 4 نياڻيون سوڳوار ڇڏيون آهن،جسقم جي مرڪزي سيڪريٽري جنرل آصف بالادي بشير قريشي جي لاڏاڻي تي چيو آهي ته بشير خان قريشي جي فوت ٿيڻ جو جائزو وٺي رهيا آهيون، تدفين جي هنڌ جو فيصلو پارٽي ۽ خاندان گڏجي ڪندا،هن چيو ته بشير خان انتهائي بهادر ۽ سيد جي سياسي فڪر جو امين هو، ٻئي طرف جسقم جي مرڪزي اڳواڻ نياز ڪالاڻي چيو ته هن سڄي زندگي سنڌ ۽ سيد لاءِ وقف هئي، هن چيو ته ڪراچي فريدم مارچ کانپوءِ پنجاب ۽ ايجنسين جو وڏو دٻاءُ هو ۽ اهي پريشان ڪري رهيون هنيون.هڪ خانگي چئنل مطابق بشير خان قريشي جي ڀاءُ مقصود قريشي جو چوڻ آهي ته سندس ڀاءُ بشير خان قريشي جي تدفين سن ۾ ڪئي ويندي.
