تحرير: رياضت ٻرڙو احمد علي ٻرڙو، استاداستاد احمد علي ٻرڙو قنبر شهر جيسُريلن فنڪارن ۽ ڪئليگرافرن ۾ اهم شخص ٿي گذريو آهي. احمد علي ولد اللھ ڏنو خان ٻرڙو 15-1914ع ڌاري، نور شاهه محلي، قنبر ۾ پيدا ٿيو. سندس آواز بيحد سُريلو هو ۽ کيس ڪلاسيڪل موسيقي ڳائڻ جو گھڻو شوق هو، جنهن سبب هن مختلف ساز، جھڙوڪ: ڪلارنيٽ، اوبو ڪلارنيٽ، هارمونيم، سِتار وغيره وڄائڻ سکيا. پنهنجي مهارت جي ڪري هُو قنبر سميت نوابشاهه، لاڙڪاڻي، شڪارپور ۽ شهدادڪوٽ ۾ ٿيندڙ مختلف اسٽيج ڊرامن جي موسيقي پڻ ترتيب ڏيندو هو. کيس فلمن ۾ ڪم ڪرڻ جو به شوق هو، جنهنڪري هُو جوانيءَ ۾ انڊيا به ويو، جتي بمبئي، دهلي ۽ ڪلڪتو به گھمي آيو. پنهنجي ان شوق سبب هن مهراڻ سئنيما قنبر جي گيٽ ڪيپر ۽ مئنيجر طور به ڪم ڪيو. احمد علي ٻرڙي کي سٺا اکر لکڻ ۽ پينٽنگ جو به ڏانءُ هو. هُو قنبر جي سئنيمائن جي وڏن بورڊن جي لِکائي (ڪئليگرافي) ڪندو هو. جڏهن ته هن پنهنجا فن ــــــ موسيقيءَ ۽ ڪئليگرافيءَ جا ــــــ ٻنهي پٽن استاد محرم علي ٻرڙي ۽ استاد اشرف علي ٻرڙي ڏانهن به منتقل ڪيا. سندس وفات دل جي دوري سبب جُون 1965ع ۾ ٿي.
