پاڻ کي عورت تصور ڪجانءِ

پاڻ کي عورت تصور ڪجانءِ​

​

امر پيرزادو​

جڏهن نه چاهيندي به توکي​

اُهو سڀ ڪرڻو پوي​

جنهن ۾ تنهنجي دل ۽ روح​

شامل نه هُجن​

پاڻ کي عورت تصور ڪجان!​

جڏهن تنهنجي جسم جو سودو ٿئي​

جڏهن تون ڪنهن جي ​

ملڪيت سمجهيو وڃين​

جڏهن تنهنجي ساهن مٿان​

نصيحتن جو ٻوسٽ هُجي​

پاڻ کي عورت تصور ڪجان!​

جڏهن جوان ٿيندي ئي​

قيد ٿي وڃين​

۽ آسمان جي وسعت​

دريءَ جيتري وڃي بچي​

پاڻ کي عورت تصور ڪجانءِ!​

ڪڏهن اڌ رات جو​

پنهنجي ٻار لئه جي​

پنهنجي ننڊ ڦٽائين​

ان جا هنڌ مٽائين​

ان کي ڪپڙا پارائين​

پنهنجو آرام وڃائين​

پاڻ کي عورت تصور ڪجان!​

جڏهن اهو طئي ٿي وڃي​

توکي ڇا ڪرڻو آ؟​

ڪيئن رهڻو آ​

ڪيئن کلڻو آ​

ڪيئن رئڻو آ​

ڪيئن جيئڻو آ​

ڪيئن مرڻو آ​

پاڻ کي عورت تصور ڪجان!​

جڏهن جسماني فرق جي سزا​

انساني فرق بڻجي وڃي​

پاڻ کي عورت تصور ڪجان!​

۽ اهڙو تصور ڪري​

اي نام نهاد غيرتمند مردَ!​

عورت نه هُجڻ تي شُڪر نه ڪجان،​

ان کي پاڻ وانگر​

آزاد ٿيڻ ڏجان....!!!​

​