عبدالقدير ميمڻ
اسان جي سنڌ جي تعليم تيستائين اڌوري آهي جيستائين اسان ” دي پوسٽ مين “ جو مضمون ياد نٿا ڪريون ، ڇو ته اهو مضمون ڪنهن وقت به انگريزيء جي پيپر ۾ اچي سگهي ٿو.
اهو ” پوسٽ يا ٽپال “ جو به عجيب انتظار۽ رابطن جو واحد سلسلو هوندو جڏهن دنيا جديد نه ٿي هئي ، فون ، موبائيل ۽ انٽرنيٽ سان دنيا اڃان ڳنڍي نه هئي ، جنهن ۾ ٽپاليء جي خط کڻي اچڻ جون راهون تڪيندا هئاسين . هاڻي به انهيء پوسٽ ۽ ٽپاليء جي اهميت اڄ به آهي پر شايد ٽپال کاتي جا ماڻهون به انهن ادارن وانگر ٿي ويا آهن ، جن تي ڪو به مضمون ڪتابن ۾ ناهي هوندو.
اهڙيء طرح مين روڊ نوشهرو فيروز ۾ قدير ڪلينڪ جي اڳيان لڳل پوسٽ جو دٻو جنهن جوپوسٽل ڪوڊ 67370 لکيل آهي جنهن مان پوسٽ ڪڍڻ جو وقت 3:40 منٽ لکيل آهي ، پر افسوس سان چوڻو پوي ٿو ته انهيء ” ٽپال جي دٻي “ کي گذريل 6 مهينن کان ناهي کوليو جنهن ۾ هتان جي سرڪاري آفيسن ۽ عام ماڻهن جي خطن سان هيء ” پوسٽ جو دٻو “ هاڻي ڀريو پيو آهي ، جڏهن ته ڪافي دفعا مين پوسٽ آفيس جي پوسٽ مين سان پوسٽ جي دٻي کي نه کولڻ جون شڪايتون ڪيون آهن ۽ انهيء پوسٽ مين ته هميشه اخلاق سان پيش اچي هميشه روزانو کولڻ جو واعدو ڪندو آهي ، پر وري به اها روايتي سستي ، ڪم چوري ، نا اهليء وارا جواب ته ڄاٻي مون وٽ ناهي ۽ اهڙيء طرح هتي جا سرڪاري ڪاغذن جا ڪم ۽ پرين پيارن جا انتظار هن پوسٽ جي دٻي جي خط جي انتظار ۾ ڪيڏا نه اداس ۽ اٻاڻڪا ويٺا هوندا .
پاڪستان پوسٽ جي اعلي اختيارين کي گذارش عرض آهي ته اهڙي قسم جي سستي ، لاپراوهي ۽ غير ذميواريء کان پاسو ڪري انهيء موجود بند پيل پوسٽ جي ڊٻي مان پوسٽ ڪڍي وڃي ۽ انهيء کي روزانه جي مقرر ٿيل وقت تي ٽپال ڪڍڻ کي افضل ذميواري سمجھي پوررو ڪيو وڃي —
