گهڻا منهنجا مِٺڙا منٺار ماڻهو، دغاباز نڪرن ٿا دلدار ماڻهو

[سليمان وساڻ]

خيرپور ضلعي جي سوهو ڪناسرا سان تعلق رکندڙ پروفيسر ڊاڪٽر استاد عطا محمد حامي جو يادگار غزل اوهان سان شيئر ڪجي ٿو

غزل

عطا محمد حامي

گهڻا منهنجا مِٺڙا منٺار ماڻهو
دغاباز نڪرن ٿا دلدار ماڻهو

لَکن مان به مشڪل ڪو اهڙو مِلي ٿو
ڏسان ٿو ڏهاڙي اَڪيچار ماڻهو

اڄوڪي زماني ۾ آهي غنيمت
غَرض کان سوا جي مِلن چار ماڻهو

ڪڏهن ملڪ ساري جا مهندار ٿيندا
نظر ۾ اچن ٿا جي نادار ماڻهو

ڪَٽائيندو سِر پر جهڪائي نه سگهندو
ڪڏهن ڪنهن جي آڏو ڪو خود دار ماڻهو

محبت جا پنهنجا يا دنيا جا هوندا
غمن کان نه ٿيندو ڪڏهن ڌار ماڻهو

حياتيءَ جو مقصد محبت ۾ آهي
محبت بنا آهي مُردار ماڻهو

انهن جي ئي دم سان هلي ٿو زمانو
نه سڏ عشق وارن کي بيڪار ماڻهو

ٻُڌائي مٺا ٻول ”حامي“ هليو ويو
هيو ڏاڍو مٺڙو مزيدار ماڻهو
​

 

[بختاور ٽالپر]

اڄوڪي زماني ۾ آهي غنيمت
غَرض کان سوا جي مِلن چار ماڻهو.........بهترين چوند ادا

 

[عبدالغني لوهار]

ڪَٽائيندو سِر پر جهڪائي نه سگهندو
ڪڏهن ڪنهن جي آڏو ڪو خود دار ماڻهو

محبت جا پنهنجا يا دنيا جا هوندا
غمن کان نه ٿيندو ڪڏهن ڌار ماڻهو
سهڻا لفظ سهڻي چونڊ

 

[ImamBux]

بهترين غزل آ سائين

 

[راجا راجيندر]

سائين عطا صاحب بھترين غزل تحرير ڪيو آھي ادا.

ھيو ڏاڍو مٺڙو مزيدار ماڻھو!!!!