عوامي آواز جي رپورٽ
شڪارپور ۾ قيامت، امام بارگاهه ۾ ڌماڪو: 64 نمازي شهيد، 100 کان وڌيڪ زخمي
شڪارپور : (رپورٽ:اياز سنجراڻي/ ذوالفقار مگسي/ اظهر دايو/ مرتضيٰ ڪلهوڙو/ نديم مهر) شڪارپور ۾ جمعي نماز دوران ڌماڪي سبب 64 نمازي شهيد ٿي ويا. جڏهن ته 10 کان وڌيڪ زخمي ٿيا آهن. زخمي شھيد ٿيندڙن ۾ معصوم ٻارڙا به شامل، آپگھاتي حملي جي زوردار ڌماڪي سبب امام بارگاھ ۾ موجود ڪيترن ئي نمازين خوف مان ڏاڪڻ ۽ ڇت کان ٽپا ڏئي جان بچاءئي ورتي، شڪارپور جي لکي در ٿاڻي جي حد وچ بازار لکي در جي مرڪزي امام بارگاھ ڪربلا معليٰ ۾ جمعي نماز بعد دعا دوران ٿيل آپگھاتي حملي ۾ 64 کان وڌيڪ نمازي شھيد ٿي ويا ۽ جڏھن ته 100 نمازي سخت زخمي ٿي پيا، فوت ٿيندڙن ۾ معصوم ٻارڙا به شامل آھن، ٻڌايو وڃي ٿو ته حسب معمول مولانا سيد تنوير حسين شاھ جمعي نماز پڙھائڻ کان پوءِ دعا گھرائي رھيو ھو ته واقعو پيش آيو، جنھن سبب امام بارگاھ جي مسجد اندر زوردار ڌماڪو ٿيو، جنھن ۾ 64کان وڌيڪ نمازي شھيد ٿي ويا، ڪي نمازي بر وقت ۽ ڪن شڪارپور جي سول اسپتال، لاڙڪاڻه ۽ سکر جي اسپتالن ۾ دم ڌڻي حوالي ڪيو، ٿيل آپگھاتي ڌماڪي سبب پوري علائقي ۾ خوف پکڙجي ويو، ڀر پاسي جي ماڻھن گھرن مان نڪري آيا پنھنجي مدد پاڻ شھيد ٿيندڙن جا لاش امام بارگاھ مان ڪڍي اسپتال پھچايا، جڏھن ته ٿيل ڌماڪي جي خبر جيئن شڪارپور شھر ۾ پکڙجي وئي ته سوين شھري واقعي ھنڌ پھتا، شھيد ٿيندڙن جي مٿان وارث يا حسين ياحسين جو ماتم ڪندي زارو زار روئيندا رھيا، اطلاع ملڻ کان پوءِ پوليس نفري موقعي تي پھچي وئي، رينجرز ۽ پوليس جي پھچڻ کان پوءِ پوري علائقي کي ڪڙو چاڙھيو ويو، شھيد ٿيندڙن ۾ معصوم ٻارڙا به شامل آھن، پورو شھر واقعي کان پوءِ بند ٿي ويو اسپتال توڙي واقعي ھنڌ سوين ماڻھون گڏ ٿي ويا رينجرز ۽ پوليس وارن ڪنٽرول سنڀاليندي علائقي کي سيل ڪري ڇڏيو، جڏھن ته واقعي کان پوءِ بر وقت شھرين توڙي محلي وارن شھيدن جا لاش گڏھ گاڏي، چنگچي ۽ ٻي سواري تي سول اسپتال پھچايا، ٿيل ڌماڪي کان پوءِ ڪيتريون ئي عورتون گھرن مان نڪري ماتم ڪندي واقعي ھنڌ پھتيون پوري علائقي ۾ قيامت برپا ٿيل ھئي ھر ھڪ ماڻھن جي اک آلي رھي. مذڪوره واقعو وچ شھر جي لکيدر بازار ۾ پيش آيو ٿوري پنڌ تي لکيدر ٿاڻو پڻ آھي معلوم ٿيو آھي ته مرڪزي امام بارگاھ ڪربلا معليٰ کي پوليس انتظاميه طرفان اسڪاڊ ڏنل آھي ھر جمعي نماز تي پوليس پڻ موجود ھوندي آھي ۽ اھلڪار موجود ھوندا آھن، اھلڪارن جي موجودگي بعد به وڏو سانحو پيش آيو. شڪارپور سانحي تي سنڌ حڪومت اڄ سوڳ جو اعلان ڪيو آهي، جڏهن ته شهيدن لاءِ 5-5 لک معاوضي جو اعلان ڪيو آهي، سانحي ۾ بي گناهه شهرين جي شهادت تي سڄي سنڌ ۾ احتجاج ڪيو ويو آهي. ڪراچي ۾ شاهراهه فيصل، نمائش، انچولي، ملير 15 ۽ ٻين هنڌن تي مجلس وحدت مسلمين ۽ ٻين هنڌن تي ڌرڻو هڻي ڇڏيو، جڏهن ته اڄ سڄي سنڌ ۾هڙتال جو اعلان ڪيو ويو آهي. ڳڙهي خيري، ڪنب، نوشهري فيروز، راڻي پور، فيض گنج، ٺري ميرواهه، جوهي، مٽياري، ٽنڊي ڄام، حيدرآباد، سکر، ٽنڊي الهيار ۽ ٻين شهرن ۾ شيعا علما ڪائونسل ۽ ٻين تنظيمن احتجاجي مظاهرا ڪيا. هوڏانهن سني اتحاد ڪائونسل، متحده قومي موومينٽ، فنڪشنل ليگ جي امتياز شيخ ۽ ٻين به هڙتال جي حمايت ڪئي آهي. ڪراچي واپاري اتحاد به هڙتال جي حمايت ڪئي آهي.
شڪارپور: لکي در وٽ امام بارگاهه ۾ ٿيل ڌماڪي ۾ هڪ زخمي تڪليف سبب دانهون ڪري رهيو آهي
شڪارپور انتهاپسندن جي نشاني تي، اسپتال ۾ زخمي تڙپندا رهي
شڪارپور: شڪارپور جي تاريخ ۾ پھريون ڀيرو وڏو واقعو پيش آيو آھي جڏھن ته ان کان اڳ ۾ اڳوڻي ايم اين اي ڊاڪٽر محمد ابراھيم جتوئي تي ٻه ڀيرا آپگھاتي حملا ٿي چڪا آھن جنھن ۾ پھريون واقعو ڊاڪٽر محمد ابراھيم جتوئي جي ڳوٺ ۾ نپيئرا آباد ۾ 10 محرم الحرام دوران ٿيو جڏھن ته ٻيو واقعو 5 مئي 2013 عام چونڊن دوران ڳوٺ کان شڪارپور ايندي ٽول پلازا وٽ پيش آيو ٽيون واقعو شڪارپور ڀرسان درگاھ غلام شاھ ماڙي شريف ۾ پيش آيو جنھن ۾ درگاھ جي گادي نشين سيد حاجن شاھ آپگھاتي حملي ۾ شھيد ٿي ويو ھو ۽ ٽي ٻيا عقيدت مند پڻ شھيد ٿيا ھئا، ڊاڪٽر محمد ابراھيم جتوئي کان علاوه ماڙي شريف ۾ ٿيل واقعي جي جاچ اڃان تائين نه ٿي سگھي آھي، جڏھن ته وزير اعليٰ سنڌ طرفان ڪيل اعلان مطابق اڄ تائين واقعي جي شھيدن جي وارثن کي اعلان ڪيل رقم نه ملي سگھي آھي، ٻي طرف شڪارپور ۾ دھشتگردي جو ھڪ ٻيو وڏو واقعو ڪجھ سال اڳ پيش آيو جنھن ۾ سکر شڪارپور جي قومي شاھراھ تي 45 کان وڌيڪ آئل ٽينڪر ساڙيا ويا ھئا، جنھن جي جاچ به اڃان تائين مڪمل ٿي نه سگھي آھي، ٻي طرف ڳوٺ نپيئرا آباد ۾ ٿيل خودڪش حملي ۾ پوليس انسپيڪٽر حنيف کوسو سخت متاثر ٿيو ھو شڪارپور جي سول اسپتال کي ساليانه ڪروڙين رپين جي بجيٽ ملڻ باوجود اسپتال ۾ سھوليت اڻپوريون رھيون، ناقص ڪارڪردگي سبب زخمي تڙپندا رھيا رت ڏيڻ لاءِ ايندڙ ماڻھن جو خون ميچ ڪرڻ لاءِ سھوليت اڻپوري ھئي اڪثر اسپتال به ماھر ڊاڪٽرن جي کو ٽ نظر آئي، سياسي وڙھاند ڪري سول اسپتال شڪارپور کي ٽيچنگ جو درجو ملڻ باوجود ۽ سکر جي غلام محمد مھر ميڊيڪل سان منسلڪ ڪرڻ باوجود ماھر ڊاڪٽر اسپتال ۾ مقرر ٿي نه سگھيا آھن، گذريل ڪيترن ئي واقعن کان وٺي اڄوڪي سانحي ۾ سول اسپتال ۾ ماھر ڊاڪٽر سان گڏو گڏ سرجن نه ھجڻ ڪري زخمي تڙپندا رھيا سرجن نه ھجڻ ڪري سکر ۽ لاڙڪاڻي ۽ ٻين شھرن کان سخت زخمين کي ريفر ڪيو ويو.
صحت سهولتن جي اڻاٺ، زخمين کي ڪراچي منتقل ڪرڻ جو فيصلو
ڪراچي (رپورٽر) سنڌ حڪومت شڪارپور سانحي بابت وفاق کان مدد گهري ورتي، جنهن بعد وفاقي حڪومت کان سي 130 جهاز ڏئي ڇڏيو آهي. لاڙڪاڻي، شڪارپور ۽ سکر اسپتالن ۾ صحت جي سهولتن جي کوٽ سبب حڪومت زخمين کي ڪراچي منتقل ڪرڻ جو فيصلو ڪيو، ان لاءِ آغا خان ۽ سي ايم ايڇ ملير ۾ علاج جا انتظام ڪيا ويا آهن. ڪمشنر ڪراچي کي ان جو انچارج مقرر ڪيو ويو آهي.
عوامي آواز بيورو چيف جو سوٽ ۽ ٻيا شهيدن ۾ شامل
شڪارپور: شڪارپور سانحي ۾ شھيد ۽ زخمي ٿيندڙن مومينن جا نالا مرڪزي امام بارگاھ ڪربلا معليٰ جي پيش امام شھيد سيد تنوير شاھ، محمد عثمان شيخ، غلام مرتضيٰ شاھ، زوار شاھ،شبير مڱڻھار، زاھد چنو، سھيل شيخ، مدد علي، ذوھيب ولد اختر سنجراڻي داون شاھ محلا،سيد محفوظ علي شاھ عمر 48 سال، غلام مصطفيٰ شاھ عمر 47 سال، ڊاڪٽر جاويد علي شاھ عمر 47 سال، نور احمد راھڙي ولد غلام محمد عمر 18 سال، وڪيل احمد سومرو عمر 25 سال، نويد سمون، شاھد چنو، خادم چنو پوليس اھلڪار، عزيز الله ولد عقيل احمد، سونو شيخ، عابد سومرو، ارشاد بابلاڻي ڪلارڪ، مقدم علي گوھر شر، فضل عباس جھلڻ 45 سال، استاد طالب حسين سمون، اي ايس آءِ خادم حسين سمون، فوٽوگرافر خرم شاھ، سجاد شيخ فوٽوگرافر، الطاف حسين بابلاڻي، مراد لوھر، سيد صابر شاھ، ڪاشف شيخ، صابر ھڪڙو،عادل شيخ عمر 12 سال، آزاد بابلاڻي، احسان سومرو، خير محمد جعفري، ايران شاھ، محبوب شاھ، پير بخش منگي، علي نقوي ۽ فخر نقوي ڀائر، ثناءُ الله اڄڻ، غلام شبير لوھر، مدد علي بکيجو، وحيد ابڙو، قمر شاھ، علي گل حاجاڻو، علي جان دايو، صدام، بابر علي، امداد چنو، شباب حيدر، عثمان، پرويز، محمد باقر عباسي، سليم بابلاڻي، وحيد احمد، مشتاق احمد سومرو پٽ لال بخش عمر 27 سال، (استاد) علي رضا شاھ، نجف علي عرف جاني عمر 22 سال ۽ زخمي شڪارپور پريس ڪلب جي ايگزيڪيٽو ڪاميٽي جو ميمبر اياز احمد سنجراڻي جو ڀاءُ لياقت سنجراڻي، راحب حاجاڻو، ڪاشف منگي ڪرم الله اڄڻ، آڪاش سميت ڪيترائي زخمي ٿي پيا جنھن کي ڳڻتي جوڳي حالت لاڙڪاڻي ۽ سکر نيو ويو. هوڏانهن سکر حرا اسپتال مان صدر الدين کوسو، نسيم شاهه، نور محمد، غلام عباس، شعيب علي، ذاڪر حسين، افضل، سجاد علي شاهه، سڪندر، علي حسن، احسان علي، اقبال احمد، مظفر علي، فيض شاهه، انصاري علي شاهه، عوامي آواز بيورو چيف اياز سنجراڻي جو وڏو ڀاءُ لياقت علي سنجراڻي ۽ ٻين کي هيليڪاپٽر ذريعي ڪراچي اماڻيو ويو.
ڌماڪي ۾ 7 کان 8 ڪلو گرام بارود استعمال، نوعيت بابت تضاد
سکر+شڪارپور: ڊي آءِ جي لاڙڪاڻو سائين رکيو ميراڻي شڪارپور واقعي بابت ميڊيا سان ڳالهائيندي ٻڌايو آهي ته ابتدائي معلومات موجب هڪ شخص ڊيوائيس کڻي امام بارگاهه ۾ ڌماڪو ڪيو جنهن جي نتيجي ۾ 50 کان وڌيڪ نمازي شهيد ۽ ڪيترائي ماڻهو زخمي ٿيا آهن، افسوسناڪ واقعي جي وڌيڪ جاچ لاءِ ٽيمون جوڙيون آهن، ايس ايس پي اسپيشل برانچ سکر شرجيل ڪريم کرل جو چوڻ آهي ته واقعي واري هنڌان 3 لاش مليا آهن جن جي سڃاڻپ نه ٿيڻ جوڳي آهي، خدشو آهي ته انهن مان هڪ لاش ڪنهن خودڪش بمبار هجي ان جي جاچ لاءِ لاشن جي ڊي اين اي ٽيسٽ ڪرائي ويندي، هوڏانهن بم ڊسپوزل اسڪواڊ سکر جي انچارج طاهر اعواڻ جو چوڻ آهي ته واقعي ۾ ڊيوائيس استعمال ڪئي وئي آهي جنهن مان بال بيرنگ هٿ ڪيا ويا آهن، ڌماڪي ۾ 7 کان 8 ڪلو ديسي بارود جو استعمال ڪيو ويو آهي.
پيش امام تنوير شاهه سميت 2 مڙهه پنجاب روانا
شڪارپور: ڌماڪي ۾ شهيد ٿيندڙ پيش امام تنوير شاهه جو مڙهه مظفر ڳڙهه ۽ هڪ ٻئي استاد امتياز شاهه جو مڙهه لاڙڪاڻي نيو ويو.
