ڇا ايندڙ عام چونڊن کانپوءِ سنڌ ۾ پ پ پ ۽ پي ٽي آءِ گڏجي حڪومت ٺاهينديون؟

[محمد خان سيال]

جيتوڻيڪ ايندڙ عام اليڪشن ۾ گھڻو وقت رهيل آهي، تنهن ڪري روزانو تيزيءَ سان بدلجندڙ سياسي صورتحال جي باري ۾ ڪابه پڪي اڳڪٿي نه ٿي ڪري سگھجي پر حالتن کي ڏسندي ايترو چئي سگھجي ٿو ته ايندڙ عام چونڊن ۾ پ پ پ ۽ ايم ڪيو ايم يا ان جو ڪو به گروپ اڳ جيتريون سيٽون کڻي ڪونه سگھندو جو اڪيلي سر سنڌ ۾ سرڪار ٺاهي سگھن تنهن ڪري سنڌ اندر هڪ ڀيرو وري گڏيل سرڪار جُڙندي جنهن ۾ پنهنجن خامين ۽ خوبين جي باوجود، پ پ پ مکيه پارٽي طور لازمي شامل هوندي، گڏيل سرڪار ۾ ايم ڪيو ايم يا ان جو ڪو گروپ يا وري پي ٽي آءِ شامل هوندي يا وري ٽيئي گڏ به ٿي سگھن ٿا ـ
ايندڙعام اليڪشن ۾ به سنڌي قومپرست هڪ ـ اڌ سيٽن کان وڌيڪ کڻي نه سگھندا جن جا ڪيترا ئي سبب موجود آهن ـ هڪ ته قومپرست پاڻ ۾ هڪ نه ٿي سگھيا آهن، جيڪي آهن سي وري هڪٻئي جي ڏاڙهي پٽڻ ۾ پورا آهن ـ مٿان قومپرستن جون مکيه تنظيمون عام اليڪشن ۾ سڌي ريت حصو ڪونه وٺي سگھنديون جو سندن ليڊر سائين جي ايم سيد کين هدايت ڪري ويو آهي ته هو اليڪشن ۾ حصو ڪونه وٺن جنهن جو مطلب اهو ٿيو ته عام اليڪشن جو ميدان خالي ڇڏيندا ۽ ائين ڪرڻ سبب اهڙا به اميدوار ڪامياب ٿيندا جن کي سنڌ جي مفاد سان گھٽ دلچسپي هوندي ۽ مال ڪمائڻ سان گھڻي ـ بهرحال، بلجندڙ صورتحال کي آڏو رکي ڪا قطعي اڳڪٿي نه ٿي ڪري سگھجي ـ