حسن درس اسانجو عشق هي آخر، غلامي کي ٿڏي وجهندو

[سليمان وساڻ]

اسانجو عشق!

حسن درس

اسانجو عشق هي آخر،
غلامي کي ٿڏي وجهندو،
اسان کي چونڊ آ ڪرڻي ته،
پنهنجو پيار ڪيئن هوندو؟
اسان جي محبتن جو ،
مک مهانڊو ڪيئن هجڻ گهرجي،
اسان کي هن هوا تي،
پير ڏيئي ڪيئن هلڻ گهرجي،
اسان جو سور ڇا آهي،
انهي کي ڪيئن سلڻ گهرجي،
اسين پنهنجي وڇوڙن جي به،
ڪريون وارثي ويهي،
اسين پنهنجي ملڻ جي،
مالڪي به خود ڪريون بيهي،
اها مرضي اسان جي آ،
اسين ڪيئن ٿا ملڻ چاهيون،
رسڻ تي ڪيئن ٿا روئون،
۽ خوش ٿي ڪيئن کلڻ چاهيون،
اسين پنهنجي محبت جي،
سدا نرمل نشانين کي،
ڀلي مهنگو ڪري ڀانيون،
ڀلي سستو ڪري سمجهون،
اسين پنهنجي حياتين جا،
ڪريون ته فيصلا ڪهڙا،
اکيون ڪيئن ٿا ڍڪڻ چاهيون،
اسين پنهنجي اداسين جون،
ڳليون ڪيئن ٿا گهمڻ چاهيون؟!

 

[سجاد علي چنا]

واه..... مس ڪو سٺو شعر پڙهڻ لاءِ مليو آ ايترن ڏينهن ۾.

 

[عاشق سولنگي]

تمام بھترين ۽ سائين سليمان جي چونڊ ھميشه لاجواب ئي ھوندي آھي

 

[محراب علي سنڌي]

تمام بھترين چونڊ

 

[منصور سرور]

واه سائين واه