حسن درس نئين کي پراڻو ڪجي دل ڏجي

سنڌ جي ڀلوڙ شاعر حسن درس جي بهترين شاعري جنهن سموري سنڌ کي پرين جو پاڇو سمجهي پُوڄيو.

نئين کي پراڻو ڪجي دل ڏجي .
سندي دل کي ڄاڻو ڪجي دل ڏجي .

ملڻ کي رلي جئين مٿان اوڍجي.
وڇوڙو وڇاڻو ڪجي دل ڏجي.

سڄڻ کان سواءِ جي سمهڻ سوچجي.
پٿر جو وهاڻو ڪجي دل ڏجي.

امله دل جي قيمت ته ڪهڙي لڳي.
ٽڪو تنهن جو ناڻو ڪجي دل ڏجي.

مجازن جي مومل رڳن ۾ رکي .
رڳو راڻو ، راڻو ، ڪجي دل ڏجي.

اڏامڻ کان اڳتي اڪرندي (حسن).
پکين کان پڇاڻو ڪجي دل ڏجي.