تازو نيپال ۾ آيل قيامت زده زلزلي کانپوءِ ڀارت، افغانستان ۽ پاڪستان جا ڪجهه علائقا بار بار زلزلن جي جهٽڪن سان متاثر ٿيندا رهيا آهن. جنهنجي ڪري ارضيات جا ماهر هن خطي ۾ بار بار ايندڙ زلزلن جي باري ۾ تحقيق ڪري رهيا آهن. ڀارت ۾ نيشنل انسٽي ٽيوٽ آف ڊزاسٽر مئنيجمينٽ جي ماهرن هتي ويجهڙ ۾ ايندڙ زلزلن جي سببن تي تحقيق کان پوءِ هڪ خوفناڪ پيشنگوئي ڪئي آهي ته هماليه جي پهاڙن ۾ عنقريب 8.2 جي شدت جو انتهائي تباه ڪن زلزلو اچي سگهي ٿو ، ان جي ڪري ڀارت جي اترين علائقن ۽ وڏي تباهي اچي سگهي ٿي ، جڏهن ته پاڙيسري ملڪ پڻ هن زلزلي مان تمام گهڻو متاثر ٿي سگهن ٿا. ماهرن جو چوڻ آهي ته اتر طرف ۾ هماليه جي ارضي پليٽ ۽ اوڀر طرف انڊو برمي پليٽ پاڻ ۾ هڪٻئي سان ٽڪرائن ٿيون جنهن جي ڪري هتي مسلسل زلزلا اچي رهيا آهن. اخبار ٽائمز آف انڊيا جي مطابق تحقيق ڪندڙن جو چوڻ آهي ته انهن پليٽن جي ٽڪرڻ جي ڪري انهن ۾ ڏار پئجي رهيا آهن جيڪي مسلسل وڌي رهيا آهن ۽ مستقبل ۾ هن سڄي خطي يا علائقي ۾ تمام وڏي شدت وارا زلزلا اچي سگهن ٿا. ماهرن هماليه جي پهاڙن ۾ اندر ٿيندڙ ٽوڙڦوڙ جي وضاحت ۾ اهو پڻ ٻڌايو آهي ته ڀارت جا اتريان علائقا باه جي گولي ۾ گهيريل آهن ۽ هتي زمين ۾ اندر ٿيندڙ ڀڃ ڊاه ۾ وقت گذرڻ سان گڏ وڌيڪ اضافو ٿيندو رهندو. يونيورسٽي آف ڪولو راڊو جي هڪ سائنسدان راجر بلهام ، جيڪو زلزلن تي تحقيق جي حوالي سان عالمي شهرت رکي ٿو، جو چوڻ آهي ته موجوده حالات اهو ٻڌائن ٿا ته هماليه جي خطي ۾ مستقبل قريب ۾ چار وڏا زلزلا اچي سگهن ٿا، جن جي شدت ريڪٽر اسڪيل تي 8 کان وڌيڪ هوندي، ۽ جيڪڏهن انهن زلزلن جي اچڻ ۾ ڪجهه دير ٿئي ٿي ته پوءِ زمين جي اندر گڏ ٿيندڙ توانائي هڪ ناقابل يقين زلزلي جو سبب پڻ بڻجي سگهي ٿي. ڀارت جي اترين رياستن ۾ خوفناڪ زلزلن جي پيشنگوئي کانپوءِ اتي جي پهاڙي علائقن ۾ هڪ خاص قسم جي گهرن جي تعمير بابت سوچ ويچار شروع ڪئي پئي وڃي ته جيئن مستقبل ۾ ايندڙ اهڙن خوفناڪ زلزلن جي امڪاني تباهي جي ٿيندڙ نقصانن کان ممڪن حد تائين بچي سگهجي يا گهٽائي سگهجي.
