ڊي سي هاءِ اسڪول نوابشاهه جون مٺڙيون مٺڙيون يادون/ ڊرائنگ ٽيچر استاد محمد ملوڪ جو اردو ڳالهائڻ

[محمد خان سيال]

ڊي سي هاءِ اسڪول نوابشاهه ۾ اسان جو ڊرائنگ ٽيچر استاد محمد ملوڪ هو جڏهن ته هيڊماستر مشهور تعليمدان ايڇ ايم خوجا صاحب ـ استاد ملوڪ رٽائرمنٽ کانپوءِ نوابشاهه ۾ وڪالت ڪئي ۽ ٿورو وقت اڳ وفات ڪئي اٿس.

استاد ملوڪ ڀلو ڊرائنگ ٽيچر هو تنهن کي اسان جي شاگرديءَ واري زماني ۾، اردو ڳالهائڻ جو اوچتو شوق جاڳيو ـ اسان سدائين ڊارئنگ جي پيرڊ ۾، ڊرائنگ هال ۾ ويندا هئاسون جت استاد ملوڪ ڊرائنگ سيکاريندو هو پر اردو ٻوليءَ جون به سٺيون ٽنگون ڀڃندو هو ـ

هڪ ڀيري اسان ڊرائنگ هال ۾ ويٺاهئاسون. اسان سان اردو ڳالهائيندڙ شاگرد به گڏ هئا ـ اهڙي ئي هڪ شاگرد خورشيد پکي ٺاهيو، استاد ملوڪ سندس ٺاهيل پکيءَ جي ته واکاڻ ڪئي پر کيس اردوءَ ۾ چيائين: ”اگر يه بنڊ پر ھوتا تو اور اچھا لگتا“ ـ

استاد ملوڪ ته سنڌي لفظ بنڊ، ٿڙ جي معنى ۾ استعمال ڪيو هو پرغيرسنڌين لاءِ اهو لفظ گار کان گھٽ ڪونه هو ـ اسان ڏٺو ته اهو لفظ ٻڌي خورشيد جومنهن ئي لهي ويو ـ