واٽس ايپ هڪ بهترين پيغامي ايپ آهي جنهن ذريعي توهان دوستن ۽ مٽن مائٽ سان هر وقت ڳنڍيل رهو ٿا. هي نه رڳو رفتار ۾ تيز آهي پر ڊيسڪٽاپ ڪمپيوٽر سميت هر وقت لڳ ڀڳ هر فون تي نيٽورڪ ڪمپنين طرفان سستي خرچ تي موجود آهي. ڀلي ڳالهه اها به آهي ته فيس بوڪ جو في الحال ان ذريعي ڪمائڻ جو ڪو ارادو ناهي واٽس ايپ بابت اڳ پڻ هڪ جامع موضوع ” ڇا توهان واٽس ايپ بابت سڀ ڪجهه ڄاڻو ٿا؟“ موڪلجي چڪو آهي پر هتي واٽس ايپ جو هڪ منفرد استعمال سمجهائجي ٿو. واٽس ايپ استعمال ڪندڙ اڪثر شڪايتون ڪندي نظر ايندا آهن ته کين هرڪو هرو ڀرو ڪنهن نه ڪنهن گروپ ۾ شامل ڪري ٿو ڇڏي جڏهن ته سوڀر دوست هجڻ ڪري سندن گروپ کي Leave ڪرڻ بجاءِ Mute ڪري ڇڏيندا آهيون ته جيئن هرو ڀرو جي بار بار اڀرندڙ اطلاعن مان جان ڇڏائي سگهجي. ياد رهي ته اهڙا دوست اهڙين شڪايتن باوجود ڪڏهن ڪڏهن اهڙن نه وڻندڙ گروپن مان ڪم واري ۽ معلوماتي مواد وصول ٿيڻ جو به ذڪر ڪندا آهن پر کين پريشاني ان وقت ٿيندي آهي جڏهن هو اهڙو مواد ڪمپيوٽر ۾ منتقل چاهيندا هجن يا وري ڳولڻ چاهيندا هجن. مون ان جو هڪ اهڙو حل لڌو آهي جنهن کان پوءِ پريشاني بلڪل به ناهي رهي.. اميد ته توهان به عمل ڪري فائدي ۾ رهندا مون واٽس ايپ جو هڪ اهڙو گروپ ٺاهيو آهي جنهن ۾ رڳو مان ئي آهيان ۽ پوءِ گروپن مان وصول ٿيندڙ هر ڪم واري ۽ معلوماتي مواد کي ان گروپ ۾ منتقل ڪندو رهندو آهيان. جنهن کانپوءِ اهو ئي گروپ موبائيل توڙي ڪمپيوٽر تان ڳولڻ سولو ۽ پريشاني جو تڪڙو حل ثابت ٿيندو آهي. J واٽس جو اهڙو پرائيويٽ اسٽور نما گروپ ٺاهڻ لاءِ واٽس ايپ کوليو ۽ نئون گروپ ٺاهيو گروپ ٺاهڻ لاءِ توهان کان رابطو نمبر شامل ڪرڻ لاءِ پهريون پڇيون ويندو .. توهان ڪوبه نمبر شامل ڪريو هاڻي نئين ٺاهيل گروپ کي کوليو ۽ ان جي مٿان سبجيڪٽ تي ٽيپ ڪري participants واري لسٽ کوليو هاڻي شامل ڪيل رابطي نمبر تي ٽيپ ۽ هولڊ ڪندي ان نمبر کي ريموو ڪريو توهان ته ڪري ورتو. جي ها.. هاڻي توهان وٽ اهڙو گروپ موجود آهي جنهن ۾ رڳو توهان ئي شامل آهيو. اهو گروپ نه رڳو موبائيل تي پر ويب (ڊيسڪٽاپ) تي پڻ کولي سگهجي ٿو. هاڻي جيڪر توهان چاهيو ته مواد کي فون مان ڪمپيوٽر تي يا وري ڪمپيوٽر تان فون تي بغير ڪنهن تار جي منتقل ڪري سگهو ٿا. جنهن لاءِ ڪمپيوٽر برائوزر تان web.whatsapp.com کولي واٽس ايپ کوليو. ان کانسواءِ واٽس ايپ جي بلٽ ان سرچ ذريعي ڪيورڊ ڳوليندي توهان ڪنهن به پيغام تي آسانيءَ سان پهچي سگهندو.
