ڪھاڻي : اولاد (عبيد ٿھيم) ____ هُن عورتن جي آزاديءَ عنوان تي منعقد سيمينار ۾ پُرجوش تقرير ڪري بَس ڪئي ته، هال ۾ ويٺل سڀني ماين مردن کيس داد ڏِنو، آزاد خيال ڇوڪرين ساڻس سيلفي رسم پُوري ڪئي، گھر واپس موٽيو، جوڻس کان ڌيڻس جو پُڇيس : سنجھا ڪٿي آهي!؟ جوڻس وراڻي ٿِي: ”هُوءَ سهيلين سان ميوزيڪل ايوننگ پروگرام ۾ وئي آ“ هُو تپي باھ ٿي وڃي ٿو، ڪاوڙ ۾ سندس اکيون ڳاڙهيون ٿيو وڃن، جوڻس تي سڀ ڪاوڙ ڇنڊيندي چوي ٿو: ”ڇو ڇڏيئيس! توکي خبر ناهي ته معاشرو ڪيڏو خراب آ..؟ خراب ڪري ڇڏيو اٿئي ڇوڪريءَ کي... چوندو هئمين ته پُٽ آڻي ڏي، ڪميڻي تو به ڌيءَ کي ئي جنم ڏنو.. “
