نمرتا ڪيس ۾ نئون لاڙو: مقتوله مون سان شادي ڪرڻ چاهيندي هئي: جوابدار مهراڻ ابڙو جو بيان

لاڙڪاڻو: (ڇنڇر 21 سيپٽمبر2019ع)نمرتا ڪيس ۾ گرفتار جوابدار مهران ابڙو پوليس کي بيان ڏنو آهي ته نمرتا ۽ مان هڪ ٻئي سان تمام گهڻي محبت ڪندا هئاسين ۽ ٻئي شادي جا خواهشمند هئاسين. جاچ دوران پوليس نمرتا جي ٻن ڪلاس فيلوز سميت 32 ماڻهن جا بيان قلمبند ڪري ورتا آهن.

ڪاليج جي سينئر پروفيسر امرلعل پوليس کي ڏنل بيان ۾ چيو آهي ته نمرتا ڪجهه وقت کان ڪنهن مسئلي سبب پريشان رهندي هئي ۽ ڪيترائي دفعا پروفيسر امر لعل وٽ اچي رني ۽ پريشاني جو شڪار هجڻ جو ٻڌايو. پروفيسر امر لعل ٻڌايو ته هو روئندي رهي ۽ مون کي چيائين ته مون کي همت گهرجي ته مان هن مسئلي مان نڪران. تمام گهڻو پڇڻ باوجود هن مسئلو نه ٻڌايو جنهن کان پوءِ مان نمرتا کي يوگا ۽ وزرش ڪرڻ ۽ موسيقي ٻڌڻ جو مشورو ڏنو.

ان کان علاوه پوليس وٽ گرفتار نمرتا جي ڪلاس فيلو مهراڻ ابڙو نمرتا سان محبت جو اعتراف ڪري ورتو آهي. هن ٻڌايو ته نمرتا مون سان شادي ڪرڻ چاهيندي هئي. ان کان علاوه پوليس نمرتا ۽ مهراڻ جي وچ ۾ لاڳاپن تي وسيم ميمڻ نالي شخص جي دلچسپي تي به جاچ ڪري رهي آهي.

ٻئي طرف ايس ايس پي مسعود بنگش نمرتا جي وارثن سان ڪيترائي ڀيرا رابطو ڪيو آهي ۽ کين واقعي جو ڪيس داخل ڪرڻ جو چيو آهي پر نمرتا جا وارث جامعه بينظير جي وائيس چانسلر کي ڪيس ۾ نامزد ڪرڻ تي ضد ڪيو بيٺا آهن جڏهن ته نمرتا جي وارثن کي هندو ڪميونٽي جي معززين مشورو ڏنو آهي ته اداري جي سربراهه کي ڪيس ۾ نامزد ڪرڻ سان ڪيس ڪمزور ٿيندو.

Sindhi News