توڙي جو ونڊوز 11 جي سرچ فيچر ۾ بهتري آئي آهي، پر اڃا تائين اها ڪم ڪرڻ ۾ دير ڪري ٿي ۽ ڳولا مطابق نتيجا نه ٿي ڏئي. خوشقسمتي سان، هڪ مفت ٽول موجود آهي، جيڪو وڌيڪ بهتر طريقي سان ڪم ڪري ٿو. ان جو نالو Everything آهي. هي(Voidtools پاران تيار ڪيل) آهي جيڪو توهان جي PC تي سڀ ڪجهه فوري طور تي ڳولي سگهي ٿو.
Everything ونڊوز تي تيز ۽ موثر ڳولا لاءِ تيار ڪيو ويو آهي. اهو فائلن ۽ فولڊرن جا نالا انڊيڪس ڪري ٿو ۽ مسلسل تبديليون ٽريڪ ڪري انهن کي ٻيهر انڊيڪس ڪري ٿو. هي ٽول تمام هلڪو آهي، سسٽم وسيلن تي گهٽ بار وجهي ٿو، ۽ هڪ سادو ۽ آسان يوزر انٽرفيس رکي ٿو. ان جي پورٽيبل ورزن کي به استعمال ڪري سگهو ٿا، جيڪو فليش ڊرائيو تي کڻي، ٻين ڪمپيوٽرن تي فائل مئنيجمينٽ لاءِ ڪم اچي سگهي ٿو.
1. هلڪو ۽ تيز
Everything هڪ ننڍو انسٽاليشن فائل آهي، جيڪو تمام گهٽ CPU ۽ RAM استعمال ڪري ٿو، جڏهن ته ونڊوز سرچ وڌيڪ وسيلن جو استعمال ڪندي سسٽم کي سست ڪري ڇڏيندي آهي، خاص طور تي جڏهن وڏن ڊرائيوز کي انڊيڪس ڪندي آهي. هي پراڻن ۽ گهٽ وسيلن وارن ڪمپيوٽرن لاءِ به بهترين متبادل آهي، جتي ونڊوز سرچ سسٽم کي سست ڪري سگهي ٿي.
2. تيز نتيجا
جڏهن توهان Everything تي ڪابه ڳولا ڪندا، ته نتيجا فوري طور تي سامهون ايندا. ان جو انڊيڪس توهان جي سموري PC جي لوڪل ڊرائيو کي شامل ڪري ٿو، جنهن سان توهان تمام فائلون ۽ فولڊر آساني سان ڳولي سگهو ٿا.
3. لڪل (Hidden) فائلون ۽ فولڊر ڏسڻ جي سهولت
ونڊوز تي، لڪل فائلون ڏسڻ لاءِ سيٽنگون تبديل ڪرڻيون پونديون آهن، پر Everything انهن کي ڊيفالٽ طور ڏيکاري ٿو. جيڪڏهن توهان هن جو پورٽيبل ورزن استعمال ڪري رهيا آهيو، ته اهو ٽربل شوٽنگ لاءِ به بهترين ٽول آهي.
4. آساني سان انسٽاليشن
هي هڪ هلڪو وزن سافٽ ويئر آهي، جنهن جي انسٽاليشن تمام تيزي سان ٿئي ٿي. بس انسٽاليشن وزرڊ تي عمل ڪريو، ڪجهه آپشن چونڊيو (جيڪي بعد ۾ به تبديل ڪري سگهو ٿا)، ۽ ڪجهه سيڪنڊن اندر سافٽويئر تيار ٿي ويندو.
5. حقيقي وقت ۾ اپڊيٽ ٿيڻ
Everything، فائلن ۽ فولڊرن جي نالن ۾ ٿيندڙ تبديلين کي فوري طور تي انڊيڪس ڪري ٿو. جڏهن ته، ونڊوز سرچ جي انڊيڪسنگ ۾ وقت لڳي ٿو، جنهن سبب نيون يا تبديل ٿيل فائلون ڳولڻ ۾ دير ٿي سگهي ٿي.
6. پورٽيبل ورزن - USB فليش ڊرائيو تان هلائڻ
Everything جو پورٽيبل ورزن به موجود آهي، جنهن کي فليش ڊرائيو تي رکي ڪنهن به PC تي هلائي سگهو ٿا. جيڪڏهن توهان کي ڪنهن پراڻي ونڊوز سرچ واري سسٽم تي فائلون ڳولڻيون آهن، ته هي ٽول وقت بچائيندو.
7. نيٽورڪ ڊرائيو تي سرچ ڪرڻ جي سهولت
Everything نيٽورڪ تي شيئر ٿيل ڊرائيوز کي به انڊيڪس ڪري سگهي ٿو، جنهن سان مشترڪ فولڊرن ۽ فائلن کي تيزي سان ڳولي سگهجي ٿو. ياد رهي ته ڊرائيو NTFS فارميٽ ۾ هجڻ گهرجي، ٻي صورت ۾ ان کي انڊيڪس نه ٿو ڪري سگھجي.
8. مفت ۽ اشتهار کان پاڪ
Everything مڪمل طور تي مفت آهي، بغير ڪنهن اشتهارجي. جڏهن ته، ونڊوز سرچ Bing جي آنلائن ڳولا کي به شامل ڪري ٿو، جيڪا ڪڏهن ڪڏهن صارف لاءِ پريشان ڪندڙ ٿي سگهي ٿي.
حاصل مطلب: Everything هڪ لازمي اوزار
Everything مان سالن کان استعمال ڪري رهيو آهيان.
جيڪڏهن توهان OneDrive تي فائلون ڳولي رهيا آهيو، ته ونڊوز سرچ ئي صحيح رهندي، پر جيڪڏهن توهان PC ڊرائيو تي تيزي سان ڳولا ڪرڻ چاهيو ٿا، ته Everything سڀ کان سٺو انتخاب آهي.
.