سنڌ سلامت جا ساٿيو السلام عليڪم جيئي سنڌ جيئي سنڌي ٻولي ڪجهه عرصو پهرين سال 2010ع ۾ منهنجو نظم ”مٺي سنڌ توسان آ جنمن جو ناتو“ هند ۾ رهندڙ سنڌ ڄائي جاڳ سنڌي جاڳ جي تخليق ڪاره نامياري راڳياڻي” ڀيڻ ڪوشي لالواڻي“ اندور شهر انڊيا ۾ ڳايو هو انهي گيت کي ڪجهه سودي سنواري مناسب ترميم سان نئين راڳ ۾ ٽنڊو محمد خان جي نوجوان راڳي ماسٽر جهانگير نوحاڻي هن ريت پنهنجي سُر ڏنا آهن اُميد ته مون جهوني جو سنڌ مٿان پيار وارڻ وارو هي نظم توهان کي ضرور پسند ايندو.
نظم
نثاراحمدناز
مِٺِي سنڌ توسان آ جنمن جو ناتو
گهڙِيءَ هڪ جو ناهي آ صدين جو ناتو
سدا ساهه پنهنجن ۾ توکي آ پاتو
سچو نينهن توسان امڙ مون آ لاتو.
ٿِي پسجي شفقَ ۾ تو جوڀن جي لالِي،
آهين سنڌ ماتا تون جڳَ کان نرالي،
توسان چنڊ چوڏهين جي جَلِوَنِ جو ناتو
ڏيارِيءَ جي جهر مر ته ديپن جو ناتو
مٺي سنڌ توسان آ جنمن جو ناتو
قسم آبشارن جي جهرنن جو سانئڻ
۽ نارين جي چوڙين جي ڇن ڇن جو سانئڻ
سدا ساهه گهورڻ آ صدقن جو ناتو
وچن پنهنجا پارڻ ۽ واعدن جو ناتو
مٺي سنڌ توسان آ جنمن جو ناتو.
سدا سنڌ ڪهاڻِي ٿِي لکجين پنن تي،
سدا گيت بڻجي ٿِي گونجين چپن تي
ڳنڊيو ”ناز“ توسان آ گيتن جو ناتو
هي نغمن جو ناتو، هي نظمن جو ناتو
مٺي سنڌ توسان آ جنمن جو ناتو
مِٺِي سنڌ توسان آ جنمن جو ناتو
گهڙِيءَ هڪ جو ناهي آ صدين جو ناتو
سدا ساهه پنهنجن ۾ توکي آ پاتو
سچو نينهن توسان امڙ مون آ لاتو.
